မဲခေါင်၊ ဒီဇင်ဘာ ၂၇
ဆီးစစ်တံနဲ့စစ်ပြီး မူးယစ်ဆေးသုံးထားတယ်ဆိုတဲ့ အကြောင်းပြချက်နဲ့ ရပ်စောက်မြို့နယ်၊ နမ်းအွန်ကျေးရွာက လူငယ် ၇ဦးကို RCSS က ဖမ်းဆီးသွားပြီး ၂ပတ်ကျော်ကြာတဲ့အထိ မိသားစုနဲ့ အဆက်အသွယ်ပြတ်နေတယ်လို့ မိသားစုဝင်တွေနဲ့ နီးစပ်သူထံကနေ သိရပါတယ်။
ရှမ်းပြည်နယ် တောင်ပိုင်း၊ ရပ်စောက်မြို့နယ်၊ ယမ်းတွင်းငါးကြောင် အုပ်စု၊ နမ်းအွန်ကျေးရွာမှာ လူငယ် ၇ ဦးကို မူးယစ်ဆေး သုံးစွဲတယ်ဆိုပြီး ရှမ်းပြည် ပြန်လည် ထူထောင်ရေးကောင်စီ/ ရှမ်းပြည် တပ်မတော် (RCSS/ SSA)က စွပ်စွဲ ဖမ်းဆီးခဲ့တယ်လို့ မိသားစုဝင်တွေနဲ့ နီးစပ်သူ ဒေသခံတစ်ဦးက ပြောပါတယ်။
ပြီးခဲ့တဲ့ ဒီဇင်ဘာ ၁၀ ရက်နေ့ညက ဖမ်းဆီးသွားတာ ဖြစ်ပြီး ဒီနေ့ ဒီဇင်ဘာ ၂၆ အထိ မိသားစုဝင်တွေနဲ့ အဆက်သွယ် မရသေးဘူးလို့ အဲဒီဒေသခံကဆိုပါတယ်။
“ဆီးစစ်တံနဲ့ စစ်ပြီး ဖမ်းသွားတာ။ အဲဒီမှာ အကြောင်းပေါ်တာနဲ့ မူးယစ်ဆေး သုံးတယ်ဆိုပြီး ဖမ်းတာ။ ကိုယ်ဝန်စစ်တဲ့အတံလား၊ ဘာစစ်တဲ့အတံမှန်းလည်းမသိဘူး။ တောရွာဆိုတော့ ဘာမှ မသိတော့ သူတို့ လုပ်ချင်သလို လုပ်တာ” လို့ သူကပြောပါတယ်။
ဖမ်းခံရစဉ်က သူတို့ ၇ ဦးကို ခြေ၊ လက်နဲ့ လည်ပင်းတွေမှာ နောက်ပြန်ကြိုးချည်ထားပြီး သေနတ်နဲ့ ချိန်ရွယ်ထားတာကြောင့် မိသားစုဝင်တွေက စိုးရိမ်နေကြတယ်လို့ မိသားစုဝင်နဲ့နီးစပ်သူ ပအိုဝ်းတိုင်းရင်းသားတစ်ဦးက ပြောပါပါတယ်။
ဖမ်းဆီးခံရသူတွေထဲမှာ အသက် ၂၀ ကျော် အမျိုးသား ၄ ဦးနဲ့ အသက် ၃၀ ကျော်အရွယ် အမျိုးသား ၃ ဦး ပါဝင်ပြီး အားလုံးဟာ ပအိုဝ်း လူငယ်တွေ ဖြစ်တယ်လို့ သိရပါတယ်။
လတ်တလောမှာ သူတို့ ၇ ဦးလုံးကို နမ်းအွန်ကျေးရွာနဲ့ မိုင် ၃၀ ကျော်ခန့် ကွာဝေးတဲ့ နမ့်ဟူးကျေးရွာက RCSS စခန်းမှာ ချုပ်နှောင်ထားတယ်လို့ သိရပြီး မူးယစ်ဆေးဝါးအကြောင်းပြကာ တပ်သားသစ်စုဆောင်းခံရမှာကို မိသားစုဝင်တွေက စိုးရိမ်နေတယ်လို့ မိသားစုဝင်တွေနဲ့ နီးစပ်သူတစ်ဦးက ပြောပါတယ်။
အဲဒီ ဖြစ်စဉ်နဲ့ ပတ်သက်ပြီး RCSS ဘက်က ပြောရေးဆိုခွင့် ရှိသူတွေကို ဆက်သွယ်မေးမြန်းခဲ့ပေမယ့် ဖုန်းလက်ခံဖြေဆိုခဲ့ခြင်း မရှိခဲ့ပါဘူး။
CJ – 007
#MeKongNews
#ရပ်စောက်
#မူးယစ်ဆေးဝါး
#RCSS
