မဲခေါင်၊ စက်တင်ဘာ ၂၄
မြောက်ပိုင်းမဟာမိတ် – FPNCC အဖွဲ့ဝင်တွေဖြစ်တဲ့ ရှမ်းပြည်တိုးတက်ရေးပါတီ/ရှမ်းပြည်တပ်မတော် SSPP/SSAနဲ့ တအာင်းပြည်နယ်လွတ်မြောက်ရေးတပ်မတော် TNLAတပ်တို့အကြား မနေ့စက်တင်ဘာလ ၂၃ ရက်နေ့မှာ ပစ်ခတ်မှုဖြစ်ပွားခဲ့ပါတယ်။
စစ်ကောင်စီတပ်နဲ့ TNLAတို့ စစ်ရေးတင်းမာနေတဲ့ ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်၊ မိုင်းယုလေးကျေးရွာအုပ်စု မန်ပလန်ကျေးရွာအနီးမှာ SSPPတပ်က မနေ့မှာ စစ်ကြောင်း ဝင်ရောက်စဉ် ပစ်ခဲ့မှု ဖြစ်ပွားခဲ့တာလို့ ဒေသခံတွေက ပြောပါတယ်။
မူဆယ်မြို့ဘက်ကို ဦးတည်တဲ့ SSPPတပ်ဖွဲ့တို့နဲ့ TNLAတပ်တို့ မနေ့ နေ့လည် ၃ နာရီခွဲဝန်းကျင်ကနေ နာရီဝက်အကြာ အချင်းချင်း ပစ်ခတ်မှုဖြစ်ပွားခဲ့ပြီး လက်ရှိမှာလည်း နှစ်ဖက်တပ်အကြား စစ်ရေးတင်းမာနေတယ်လို့ ဒေသခံ မိုင်းယုလေးကျေးရွာသားတစ်ဦးက ပြောပါတယ်။
“ မနေ့က ပစ်ကြတယ်။ အပြင်းအထန်တော့မဟုတ်ဘူး။ သူတို့အချင်းချင်း ပစ်ခတ်မှားတာလို့ပြောကြတယ်။ အခုထိ SSPPက မူဆယ်ဘက်တက်ဖို့ အဲလမ်းကို သုံးလို့မရသေးဘူး” လို့ သူက ဆိုပါတယ်။
ပစ်ခတ်မှုကြောင့် နှစ်ဖက်တပ်ဖွဲ့ဝင်တွေ ထိခိုက်ကျဆုံးမှုကိုတော့ မသိရှိရသေးဘဲ သတင်းထုတ်ပြန်တာမျိုးလည်း မရှိသေးပါဘူး။
ပစ်ခတ်မှုဖြစ်ပွားတဲ့ မန်ပလန်ကျေးရွာအနီးမှာ နှစ်ဖက်တပ်ဖွဲ့တွေ လှုပ်ရှားနေကြဆဲ ဖြစ်တာကြောင့် ကျေးရွာခံ ၅၀ ကျော်က မိုင်းယုလေးရွာမှာ တိမ်းရှောင်နေကြပါတယ်။
မိုင်းယုလေးရွာထဲ တိမ်းရှောင်လာတဲ့ မန်ပလန်ရွာခံ တစ်ဦးက “ ရှောင်တဲ့သူတွေက နီးစပ်ရာ ဆွေမျိုးတွေမှာနေတာ။ အခုခြေနေက သူတို့အချင်းချင်း ပြန်ပစ်ကြမှာကို စိုးရိမ်လို့ ရွာထဲ မပြန်ရဲသေးဘူး” လို့ ပြောပါတယ်။
ဒီကိစ္စနဲ့ ပတ်သက်ပြီး SSPPနဲ့ TNLAတို့ရဲ့ ပြောရေးဆိုခွင့်ရှိသူတွေကို မဲခေါင်က ဖုန်းဆက်သွယ်မေးမြန်းခဲ့ပေမယ့် ဆက်သွယ်လို့ မရသေးပါဘူး။
ပြီးခဲ့တဲ့ ဩဂုတ် လဆန်းပိုင်းကစပြီး ဒီနေ့ စက်တင်ဘာလ ၂၄ ရက်နေ့အထိ မူဆယ်မြို့နယ် စယ်လန့်ကျေးရွာမှာ စစ်ကောင်စီတပ်နဲ့ TNLAတပ်တို့ တိုက်ပွဲပြင်းထန်ခဲ့ပါတယ်။
SSPPနဲ့ TNLAတပ်ဖွဲ့တို့ဟာ မြောက်ပိုင်း မဟာမိတ်ဖြစ်သလို တိုင်းရင်းသားလက်နက်ကိုင် ၇ ဖွဲ့နဲ့ ဖွဲ့စည်းထားတဲ့ ပြည်ထောင်စုနိုင်ငံရေးဆွေးနွေး ညှိနှိုင်းရေးကော်မတီ – FPNCC ရဲ့ အဖွဲ့ဝင်တွေလည်း ဖြစ်ပါတယ်။
ပြီးခဲ့တဲ့ စက်တင်ဘာလ ၂၂ ရက်နေ့ ကွတ်ခိုင်မြို့နယ် ခိုမုန်းကျေးရွာအနီးက ကောင်းမှုရွာမှာ ထိုးစစ်ဆင်လာတဲ့ စစ်ကောင်စီတပ်နဲ့ TNLA တို့ တိုက်ပွဲ ပြင်းထန်နေခဲ့ပြီး စစ်ကောင်စီတပ်ဘက်က သေဆုံးမှုများလို့ ဂျက်လေယာဉ်နဲ့ ဗုံးကြဲ တိုက်ခိုက်ခဲ့ပါတယ်။
CJ – 014
