မဲခေါင်၊ ဒီဇင်ဘာ ၈
ပဲခူးတိုင်း၊ ကျောက်ကြီးမြို့နယ်၊ မုန်းမြို့ပေါ်ရှိ စစ်ရေးပစ်မှတ်မဟုတ်တဲ့ လူနေရပ်ကွက်တွေကို လေကြောင်းက ဗုံးကြဲနေတာကြောင့် စစ်ဘေးရှောင်တဲ့ပြည်သူ သောင်းနဲ့ချီပြီး ရှိနေတယ်လို့ ကရင်အမျိုးသားအစည်းအရုံး (KNU) က မနေ့ ဒီဇင်ဘာ ၇ ရက်နေ့မှာ သတင်းထုတ်ပြန်ပါတယ်။
မုန်းမြို့၊ ရေလဲကျေးရွာအတွင်းကို စစ်ကောင်စီက ဗုံးကြဲတာကြောင့် ဘုရားကျောင်း ၁ ခုနဲ့ နေအိမ် ၄ လုံးပျက်စီးခဲ့တယ်လို့ ဆိုပါတယ်။ အဲ့ဒီလို ဗုံးကြဲတာကြောင့် မုန်းမြို့ပေါ် ရပ်ကွက်တွေနဲ့ အနီးအနားကျေးရွာ ၉၅ ရွာက ပြည်သူ ၆၈၄၀၃ ဦး ထွက်ပြေးနေရတယ်လို့ KNU ထုတ်ပြန်ချက်က ဆိုပါတယ်။
စစ်ဘေးရှောင်များအတွက် KNU က တတ်နိုင်သလောက်ကူညီပေးနေပေမယ့် စားနပ်ရိက္ခာ၊ နေရာထိုင်ခင်း၊ အမိုးအကာ၊ စောင်နဲ့ ဆေးဝါးတွေ လိုအပ်နေတယ်လို့ ဆိုပါတယ်။
မုန်းမြို့က စစ်ကောင်စီစခန်းတွေဖြစ်တဲ့ ခမရ-၅၉၀နဲ့ ၅၉၉ တပ်တွေကို KNLA နဲ့ PDF ပူးပေါင်းအဖွဲ့တွေက ဒီဇင်ဘာ ၅ ရက်နေ့မှာ တိုက်ခိုက်သိမ်းပိုက်ခဲ့ပါတယ်။
အဲ့ဒီတိုက်ပွဲမှာ ဒုတပ်ရင်းမှူးအပါ စစ်ကောင်စီတပ်သား ၁၉ ယောက် လက်နက်ချအညံ့ခံပြီး တပ်မိသားစုဝင် ၄၂ ယောက်ကို စစ်သုံ့ပန်းအဖြစ် ဖမ်းဆီးခဲ့ပါတယ်။
မုန်းမြို့အတွင်းက စစ်ကောင်စီစခန်းတွေ ဗျူဟာအရဖြစ်ပြီး စခန်းတွေကို တပ်ပြန်စွဲနိုင်ပြီလို့ စစ်ကောင်စီထိန်းချုပ်မီဒီယာတွေက ဖော်ပြပါတယ်။
အဲ့ဒီဖော်ပြချက်ဟာ ဝါဒဖြန့်သတင်းသာဖြစ်ပြီး ဖမ်းမိထားတဲ့ စစ်ကောင်စီအဖွဲ့နဲ့ စစ်သုံ့ပန်းဓာတ်ပုံတွေကို တော်လှန်ရေးအဖွဲ့တွေက မနေ့ ဒီဇင်ဘာ ၇ ရက်နေ့မှာ ထုတ်ပြန်ပါတယ်။
#MeKongNews
#ကရင်
#မုန်းမြို့
#စစ်ကောင်စီ
#ဗုံးကြဲ
#စစ်ဘေးရှောင်