မဲခေါင်၊ ဖေဖော်ဝါရီ ၇
မန္တလေးတိုင်း၊ မလှိုင်မြို့နယ်က ကျေးရွာတွေမှာ စစ်ကောင်စီက ပြည်သူ့ စစ်သူ့စစ်အင်အား စုဆောင်းနေတယ်လို့ မတ္ထီလာခရိုင် အမှတ် ၂ တပ်ရင်းနဲ့ မလှိုင် ပြည်သူ့ကာကွယ်ရေးအဖွဲ့ (ပကဖ)တို့က ဖေဖော်ဝါရီလ ၆ ရက်နေ့ ရက်စွဲနဲ့ ပူးတွဲ ထုတ်ပြန်ထားပါတယ်။
စစ်ကောင်စီတပ်ကို တစ်နိုင်ငံလုံးက တော်လှန်ရေး အင်အားစုတွေ ထိုးစစ်ဆင် တိုက်ခိုက်နေတာကြောင့် အကျအဆုံးများနေပြီး တပ်ရင်းအလိုက် ထွက်ပြေးတာတွေလည်း ရှိနေတာကြောင့် သူတို့ စိုးမိုးနိုင်တဲ့ နယ်မြေတွေမှာ အဓမ္မ လူအင်အား စုဆောင်းနေတာလို့ ထုတ်ပြန်ချက်မှာ ဖော်ပြထားပါတယ်။
လတ်တလောမှာ ပြည်သူ့စစ်အမည်ခံ စစ်သင်တန်း တက်ရောက်ဖို့အတွက် ကျေးရွာအုပ်ချုပ်ရေးမှူးတွေကနေတဆင့် မဲနှိုက်ရွေးချယ်ပြီး အဓမ္မဖိအားပေး ခိုင်းစေနေတယ်လို့ ထုတ်ပြန်ချက်အရ သိရပါတယ်။
မလှိုင်ဒေသခံ တစ်ဦးက “စီစဉ်နေတုန်းပဲ ရှိပါသေးတယ်။ အုပ်ချုပ်ရေးမှူးတွေက တစ်အိမ်တက်ဆင်း လိုက်ပြောနေတာပေါ့။ ဒါပေမယ့် စီစဉ်နေတယ်ဆိုရင်တော့ တကယ် လုပ်မှာပါ။ သူတို့ မလုပ်ရဲတာ ဘာမှ မရှိဘူးလို့ ပြောထားတယ်လေ” လို့ ပြောပါတယ်။
တော်လှန်ရေး အင်အားစုတွေ အနေနဲ့ ပြည်သူ့စစ် သင်တန်းတက်ရောက်ဖို့ ဖိအားပေး ခိုင်းစေနေတဲ့ တာဝန်ရှိသူ အဆင့်ဆင့်ကို အရေးယူဆောင်ရွက်သွားမယ်လို့ ထုတ်ပြန်ချက်မှာ သတိပေးထားပါတယ်။
စစ်အာဏာသိမ်းပြီး နောက်ပိုင်းကတည်းက မလှိုင်မြို့မှာ အုပ်ချုပ်ရေးမှူး အဖွဲ့ဝင်တွေနဲ့ စစ်ကောင်စီ သတင်းပေး ဒလန် ပျူစောထီးတို့ မကြာခဏ လုပ်ကြံသတ်ဖြတ် ခံနေရပေမယ့် စစ်ကောင်စီ အမာခံ ထောက်ခံသူတွေကို အမြဲလူစားထိုး ခန့်အပ်နေတယ်လို့ မြို့ခံတွေက ပြောပါတယ်။
CJ-007
#MeKongNews
#မလှိုင်
#ပြည်သူ့စစ်
#စစ်ကောင်စီ
#စုဆောင်း
