မဲခေါင်၊ ဇန်နဝါရီ ၂၄
မီဇိုရမ်ပြည်နယ်၊ လဲန်ပွီး(Lengpui )လေဆိပ်မှာလမ်းချော်သွားလို့ စစ်ကောင်စီလေယာဉ်ပေါ်ကလူနာတွေသွားကယ်တဲ့ အရေးပေါ်လူနာတင်ယာဉ်ဟာလည်း လေဆိပ်အထွက် ယာဉ်မတော်တဆ ထပ်မံဖြစ်ပွါးခဲ့တယ်လို့ လေဆိပ်ဝန်ထမ်းတွေဆီက သိရပါတယ်။
အဲဒီလူနာတင်ယာဉ်ဟာ အရေးပေါ်ထွက်ပေါက်ကနေထွက်လာစဉ် ခုံးကျော်တံတားနဲ့ ငြိပြီး အချိန်အတော်ကြာသောင်တင်နေခဲ့ပြီးမှ ကားဟာ နောက်ပြန်ဆုတ်နိုင်ခဲ့တယ်လို့သိရပါတယ်။
“လူနာယာဉ်ပေါ်ပါလာတဲ့လူနာတွေ ထပ်မံထိခိုက်မှုရှိ၊မရှိတော့ မသိရပေမယ့် လူနာတင်ယာဉ် ကိုယ်ထည်တော့ ပျက်စီးမှုအချို့ရှိတယ်”လို့ အိုက်ဇောဒေသခံတစ်ဦးကပြောပါတယ်။
AA နဲ့တိုက်ပွဲမှာ ရှုံးနိမ့်ပြီး အိန္ဒိယကိုထွက်ပြေးတဲ့ စစ်ကောင်စီတပ်သားတွေကို သွားခေါ်တဲ့ လေယာဉ်ဟာ ဇန်နဝါရီလ ၂၃ရက်နေ့မှာ မီဇိုရမ်ပြည်နယ်ထဲက အိုက်ဇောလ်မြို့လေယာဉ်ကွင်းမှာ ဆင်းသက်စဉ် ပြေးလမ်းချော်သွားခဲ့ပါတယ်။
လေယာဉ်မှူးနဲ့ အမှုထမ်း ၁၄ ဉီးအနက် ၈ ဦး ဒဏ်ရာရရှိခဲ့ကြပြီးဒဏ်ရာရရှိတဲ့ လေယာဉ်အမှုထမ်းတွေကို ဆေးရုံသို့ပို့ဆောင်ဖို့ လေဆိပ်ကိုသွားကြိုတဲ့အရေးပေါ်လူနာတင်ကားဟာ လေဆိပ်အထွက်မှာ အခုလို မတော်တဆမှုထပ်ဖြစ်ခဲ့တာဖြစ်ပါတယ်။
ရက္ခိုင့်တပ်တော် (AA) နှင့်ဖြစ်ပွါးခဲ့တဲ့တိုက်ပွဲတွေအတွင်း ထွက်ပြေးလာတဲ့ စစ်ကောင်စီတပ်ဖွဲ့ဝင် ၂၇၆ဦး မီဇိုရမ်ပြည်နယ်၊ လောင်လိုင်ခရိုင်၊ ဗန်သုဘန်ကား ကျေးရွာမှာ ဇန်နဝါရီလ ၁၇ ရက်နေ့က ရောက်ရှိလာခဲ့တာပါ။
အဲဒီကတဆင့် အိုက်ဇောလ်မြို့ရှိ အာသံရိုင်ဖယ်ဌာနချုပ်ကို ဇန်နဝါရီလ ၂၁ရက်နေ့ မှာ ရောက်ရှိခဲ့ပြီး ဇန်နဝါရီလ ၂၂ရက် မနေ့က ၁၈၄ဦးကို မြန်မာစစ်တပ်လေယာဉ်နဲ့ လဲန်းပွီလေဆိပ်ကို လာရောက်ခေါ်ဆောင်ပြီး စစ်တွေမြို့ကို ပို့ဆောင်ခဲ့တယ်လို့ All India Radio News က ထုတ်ပြန်ခဲ့ပါတယ်။
ဇန်နဝါရီလ ၂၃ရက်မှာ ဒုတိယအသုတ်အနေနဲ့လက်ကျန်၉၂ဦးကို လာရောက်ခေါ်ဆောင်စဉ်မှာ တိမ်းမှောက်မှုဖြစ်ပွါးခဲ့တာဖြစ်ပါတယ်။
အခုတကြိမ် အိန္ဒိယနိုင်ငံထဲကိုထွက်ပြေးလာတဲ့ စစ်ကောင်စီတပ်သား ၂၇၆ဦးမှာ အရာရှိ ၃၆ဦး နဲ့ တပ်သား ၂၄၀ပါဝင်ပြီး ၁၁ဦးမှာ ဒဏ်ရာရရှိထားတယ်လို့ ဒေသခံသတင်းတွေမှာ ဖော်ပြထားပါတယ်။
CJ-012
#MeKongNews
#မီဇိုရမ်
#စစ်ကောင်စီ
#လေယာဉ်
#လူနာတင်ကား