မဲခေါင်၊ မေ ၈
ရှမ်းပြည်နယ် တောင်ပိုင်း၊ မြို့တော် တောင်ကြီးမှာ ပြီးခဲ့တဲ့ ရက်ပိုင်းကစပြီး လိုင်းကြေး ပေးထားတဲ့ ဘား၊ ကေတီဗီနဲ့ ကလပ်တွေကို စစ်ကောင်စီ လက်ပါးစေ ရဲတပ်ဖွဲ့က ရက်အကန့်အသတ်မရှိ ပိတ်ခိုင်းထားတယ်လို့ သိရပါတယ်။
ဖရဲငွေတောင်ရပ်ကွက်၊ ရွှေတောင်ကြား အိမ်ယာ အနီးမှာ ဖွင့်ထားတဲ့ Crazy Night Music Bar ကို ပြီးခဲ့တဲ့ ဧပြီ၊ ၂၉ ရက်နေ့က စပိတ်ခိုင်းပြီး မေလ ၄ ရက်နေ့က စကာ တမြို့လုံးက ဘား၊ ကလပ်နဲ့ ကေတီဗီတွေကို ပိတ်ခိုင်းတာလို့ သိရပါတယ်။
“Crazy Night Bar ကို ရဲ၊ စရဖ တွေက လိုင်းကြေး အရင်ကောက်တယ်။ ပြီးမှ နောက်တစ်ဖွဲ့က ဝင်တာ။ ထောင်ကားတွေနဲ့ပါ လာဖမ်းတာ။ ဖွင့်တုန်းက သူတို့ပဲ ဖွင့်ခွင့်ပြုထားတာ။ ညဆို ရဲတွေ ဝင်ထွက်စားသောက်ပြီး ပိုက်ဆံမရှင်းဘဲ ပြန်ကြတာပဲလေ” လို့ တောင်ကြီးမြို့ခံ တစ်ဦးက မဲခေါင်သတင်းဌာနကို ပြောပါတယ်။
Crazy Night Music Bar ဟာ ဧပြီ ၂၉ ရက်နေ့မှာ တေးသံရှင် ရွှေထူး လာမယ့် အစီစဉ်ကိုပါ အရေးပေါ် ဖျက်သိမ်းခဲ့ရတယ်လို့ မြို့ခံတွေက ပြောပါတယ်။
“အဲ့ဒီ ဘားက အရင်လ (ဧပြီလ) ၄ ရက်နေ့တည်းက ရွှေထူးလာမယ်ဆိုပြီး ပွဲကို သုံးလေးခါလောက် ရက်ရွှေ့နေတာ။ ပထမတော့ ကိုရွှေထူး နေမကောင်းလို့ ရက်ရွှေ့တာ။ နောက်အခေါက်တွေ ကျတော့ အဲ့ဆိုင်က လုပ်တာ။ ဒီတခါလည်း ဧပြီ ၂၉ သေချာပြီဆိုပြီး ကျနော်တို့က တောင်ကြီး ကားလက်မှတ် ဝယ်ပြီး ရောက်နေပြီကို အဲ့နေ့ နေ့လယ်မှာ ကပ်ဖျက်သွားတာ” လို့ Crazy Night Bar မှာ ပြုလုပ်မယ့် အဆိုတော် ရွှေထူး ပွဲကို ကြည့်ဖို့ ရန်ကုန်ကနေ လာရောက်တဲ့ လူငယ် တစ်ဦးက ဆိုပါတယ်။
Crazy Night Bar မှာ အိုက်စ် မူးယစ်ဆေး အမြောက်အများ ဖမ်းမိခဲ့တယ်လို့ သတင်းတွေ ထွက်ပေါ်ခဲ့သလို ရဲ၊ စရဖ တွေနဲ့ မူးယစ်ရဲတွေ သဘောထား မတိုက်ဆိုင်မှုကြောင့် တမြို့လုံးက ဆိုင်တွေကိုပါ စစ်ဆေးမယ်ဆိုပြီး ပိတ်ခိုင်းတာလို့ သတင်း ထွက်ပေါ်နေပေမယ့် သီးခြား အတည်ပြုနိုင်တာတော့ မရှိသေးပါဘူး။
အခု ပိတ်ခံထားရတဲ့ ထဲမှာ သီးသန့်ခန်းတွေနဲ့ အရက်၊ ဘီယာ သီးသန့်ရောင်းတဲ့ ဘား၊ ကလပ်နဲ့ ကေတီဗီတွေ အများစု ပါဝင်ပါတယ်။
အာဏာသိမ်းပြီးနောက် ၂၀၂၂ ခုနှစ်အတွင်း တောင်ကြီးမြို့နယ်မှာ ဘားနဲ့ ကလပ် ဆိုင်သစ် ၁၀ ခုထက်မနည်း ဖွင့်လှစ်လာပြီး စစ်ကောင်စီရဲ့ ဝန်ကြီး ပိုင်ဆိုင်တဲ့ ဘားတွေ အပါအဝင် ရဲ၊ စရဖနဲ့ ပအိုဝ်းပြည်သူ့စစ် (PNO) တို့ ရှယ်ယာဝင်ထားတဲ့ ဘားနဲ့ ကလပ်တွေလည်း ပါဝင်နေပါတယ်။
CJ-001
#MeKongNews
#တောင်ကြီး
#ကြိုးဆွဲချ
#ပအိုဝ်းပြည်သူ့စစ်
#ကေတီဗီ
