မဲခေါင်၊ စက်တင်ဘာ ၂၂
ရှမ်းပြည်နယ်ရဲ့ မြို့တော် တောင်ကြီးမြို့၊ ကျောင်းကြီးစုရပ်ကွက်၊ အဝေရာမီးပုံးပျံကွင်းနဲ့ ဘူတာရုံဘေးက ကျူးကျော်တဲ ၁၀ လုံးကျော်ကို စစ်တိုင်းမှူး အမိန့်နဲ့ ဖျက်သိမ်းလိုက်တယ်လို့ အနီးနားမှာ နေထိုင်သူတွေက ပြောပါတယ်။
စက်တင်ဘာလ ၁၇ ရက်နေ့က ကျူးကျော် ဆိုင်ခန်း ၄ ခန်းကို ဖျက်သိမ်းပြီးနောက် မနေ့ စက်တင်ဘာ ၂၁ ရက်နေ့ မနက်ပိုင်းမှာ ကျူးကျော်တဲ့တွေ ဖျက်သိမ်းသွားတာလို့ ဆိုပါတယ်။
“အရင်ကတည်းက သူတို့ ခွင့်ပြုလို့နေတယ်။ သူတို့ ဖျက်ဆိုတော့လည်း ဖျက်ရတာပေါ့။ တရားဝင်တော့ မဟုတ်ပေမယ့် သူတို့လည်း ဌာနဆိုင်ရာတွေကို ပေးပြီးတော့ ဆောက်ထားတာပဲ။ ဌာနဆိုင်ရာတွေက စားပြီးနားမလည် လုပ်တာပေါ့” လို့ ဒေသခံ တစ်ဦးက ပြောပါတယ်။
အဲဒီ ကျူးကျော်တဲတွေဟာ စစ်ကောင်စီတပ်၊ ရဲစခန်းနဲ့ မြန်မာ့ မီးရထား စတဲ့ ဌာနဆိုင်ရာတွေကို နားလည်မှုနဲ့ ငွေပေးနေထိုင်တာဖြစ်ပြီး စက်တင်ဘာလ ၁၀ ရက်နေ့က ဖျက်သိမ်းဖို့ စစ်တိုင်းမှူးက လက်ညှိုးထိုး အမိန့်ပေးသွားတာလို့ သူက ဆက်ပြောပါတယ်။
ဖျက်သိမ်းခံရတဲ့ ကျူးကျော်တဲတွေဟာ မိုးကာ၊ ဝါးတွေနဲ့ ယာယီ ဆောက်လုပ်ထားတာဖြစ်ပြီး နေထိုင်သူတွေဟာ လမ်းလုပ်သား၊ ပျံကျဈေးသည်၊ နေ့စား ကျဘမ်းလုပ်သား စတဲ့ အောက်ခြေ လူတန်းစားတွေ ဖြစ်တယ်လို့ သိရပါတယ်။
အဲဒီ ကျူးကျော်တွေရဲ့ သက်တမ်းဟာ ၃ နှစ်ကျော် ကြာပြီ ဖြစ်တာကြောင့် အောက်ခြေ လူတန်းစားတွေအတွက် နစ်နာ ဆုံးရှုံးမှုတွေ ရှိနေပြီး အိမ်အသစ်ရှာဖို့ ငွေကြေး အခက်အခဲတွေ ရှိနေတယ်လို့ သိရပါတယ်။
CJ-007
#MeKongNews
#တောင်ကြီးမြို့
#အဝေရာမီးပုံးပျံကွင်း
#တိုင်းမှူး