မဲခေါင်၊ ဒီဇင်ဘာ ၂
ရှမ်းပြည်နယ်ရဲ့ မြို့တော်၊ တောင်ကြီးမြို့မှာ တန်ဆောင်တိုင် ကာလအပြီး အုပ်စုဖွဲ့ ခြိမ်းခြောက် လုယက် ငွေတောင်းသူတွေ သောင်းကျန်းနေတယ်လို့ မြို့ခံတွေက ပြောပါတယ်။
နိုဝင်ဘာလ ၂၇ ရက်နေ့၊ တန်ဆောင်တိုင် လပြည့်ည ပန့်သကူ ကောက်တာ အကြောင်းပြုပြီး လမ်းမပေါ် သွားလာနေတဲ့ ကားတွေကို အော်ဟစ်ဆဲဆို ငွေတောင်းတာ၊ ကားမှန်တွေ ရိုက်ခွဲတာ၊ ဆိုင်ကယ်တွေကို အုပ်စုဖွဲ့ လမ်းပိတ် ခြိမ်းခြောက် လုယက်ရာက ဒီကနေ့ အထိ သောင်းကျန်းနေတယ်လို့ ဆိုပါတယ်။
“တန်ဆောင်တိုင် ပွဲပြီးတော့ ကျန်ခဲ့တာနေမှာ။ အဓိကတော့ ခိုးဆိုးလုနှိုက်တွေ။ နောက်ပြီး မအလ (မင်းအောင်လှိုင်) အစီအစဉ်နဲ့ ပွဲကြည့်ဖို့ တစ်ရက် တစ်သောင်းနဲ့ လွှတ်ထားတဲ့ မဘသ အဖွဲ့ဝင်တွေ။ သူတို့တွေ ကျူးလွန်နေတာ” လို့ တောင်ကြီးမြို့ခံ တစ်ဦးက ပြောပါတယ်။
အဲဒီ ခြိမ်းခြောက် ငွေတောင်း လုယက်နေတဲ့ အုပ်စုဟာ ဗိုလ်ချုပ်အောင်ဆန်း လမ်းမကြီး တစ်လျှောက်၊ အရှေ့မြို့ပတ်လမ်း စစ်တပ်ဝင်း အနီးနဲ့ လူပြတ်တဲ့ လမ်းကြိုလမ်းကြားတွေမှာ စောင့်ဆိုင်း လှုပ်ရှားလေ့ရှိပြီး တစ်ချို့ ညတွေမှာ နေရာအပြောင်းအလဲ လုပ်ကြတယ်လို့ သိရပါတယ်။
“ပန့်သကူ ပစ်တဲ့ညက အရမ်းသောင်းကျန်း နေတာ။ ကိုယ်တိုင်တောင် ပြေးနိုင်လို့ လွတ်လာတာ။ ကြည့်လိုက်တော့လည်း ရုပ်ခံတွေက မြို့ခံတွေနဲ့ မတူဘူး။ အခုလည်း တချို့ညတွေမှာ တွေ့နေရတယ်။ ညအချိန်မတော် လူပြတ်တဲ့ လမ်းကြားတွေ မသွားဖို့ သတိပေးချင်တယ်” လို့ ကိုယ်တိုင် ကြုံတွေ့ခဲ့ရသူ တောင်ကြီးမြို့ခံ တစ်ဦးက ပြောပါတယ်။
ဒါ့အပြင် တန်ဆောင်တိုင်ပွဲအပြီး တောင်ကြီးမြို့မှာ ညဘက် ဆိုင်ကယ် ပျောက်ဆုံးမှုတွေ ပိုများလာပြီး မြို့မဈေး တစ်ဝိုက်မှာ ခါးပိုက်နှိုက်တာတွေ ကြုံတွေ့နေရတယ်လို့ မြို့ခံတွေက ဆိုပါတယ်။
စစ်အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့က စပြီး တောင်ကြီးမြို့မှာ ခိုးမှု၊ လုယက်၊ လိမ်လည်မှု၊ အနုကြမ်းစီးမှုတွေ မကြာခဏ ဖြစ်ပေါ်နေပေမယ့် စစ်ကောင်စီ လက်အောက်ခံ ရဲတပ်ဖွဲ့က ဖမ်းဆီး အရေးယူတာ နည်းပါးတယ်လို့ မြို့ခံတွေက ပြောပါတယ်။
CJ-007
#MeKongNews
#တောင်ကြီးမြို့
#မဘသ
#တန်ဆောင်တိုင်
