မဲခေါင်၊ ဧပြီ ၆

ရှမ်းပြည်အရှေ့ပိုင်း၊ တာချီလိတ်မြို့သို ဘုန်းကြီးပျံကိစ္စအတွက် ဧပြှီလ ၅ ရက် နေ့လယ်မှာ ရောက်ရှိလာတဲ့ စစ်ခေါင်းဆောင်ဟာ ညနေပိုင်းမှာပဲ လာတဲ့လေယာဉ်နဲ့ ပြန်သွားတယ်လို့ သိရပါတယ်။

တာချီလိတ်မြို့မှာ ယနေ့ ဧပြီ ၆ ရက် မှာ ပြုလုပ်မယ့် နဂါးနှှစ်ကောင်ဆရာတော်ဘုရားရဲ့ စျာပနအခမ်းအနားကို မနေ့က နေ့လည်၁၂ နာရီခန့်မှာ ရောက်လာပြီးနောက် ညနေပိုင်း ၅ နာရီခန့်မှာ ပြန်သွားတာလို့ ဒေသသတင်းအရင်းအမြစ်ထံက သိရပါတယ်။

“ကြားတာတော့ ထပ်မလာတော့ဘူးကြားတယ်၊ ညှိ/ကွပ် မောင်မောင်အေးကို လွှဲခဲ့တယ်လို့ကြားတယ်၊ သူတို့လူတွေကလွဲလို့ အနားကပ်လို့ မရဘူး၊ ဖုန်းမရိုက်ရ၊ အိတ်မပါရ၊ ရေဘူးတောင် ယူလို့မရဘူး၊ အရမ်းစစ်နေတာ၊ ၁၅ မိုင် ပတ်ပတ်လည်မှာလဲ တပ်တွေဖြန့်ချထားတယ်၊ မြို့ထဲမှာလဲ လုံခြုံရေး အရမ်းတင်းကြပ်ထားတာ၊ သူပြန်သွားတာ ကောင်းပါတယ်၊ မြို့အတွက် အန္တရာယ်လျော့သွား တာပေါ” လို့ ဒေသ သတင်းအရင်းအမြစ်က မဲခေါင်ကို ပြောပါတယ်။

စျာပနပွဲလာရောက်သူတွေအနေနဲ့ နံပါတ်စဉ်တပ် လည်ဆွဲတွေတပ်ဖို့၊ အိတ်တွေ ရေဗူးနဲ့ဖုန်းတွေ ယူဆောင်ခွင့် ကန့်သတ်ထားတယ်လို့ သိရပါတယ်။

နဂါးနှစ်ကောင် ဆရာတော်ရဲ့ စျာပနအစီအစဉ်မှာ ယနေ့ ဧပြီလ ၆ ရက် နေ့လည် ၁၂ နာရီမှာ နဂါးနှစ်ကောင်ကျောင်းတိုက်မှ ဆရာတော်ရဲ့ ရုပ်ကလပ်ကို ပင့်ဆောင်ပူဇော်တာ၊ ညနေ ၃နာရီမှာ စျာပနမဏ္ဍပ်မှာ ပံ့သကူသင်္ကန်းလှူဒါန်းတာ၊ တရားနာရေစက်ချတာတွေပြုလုပ်ပြီးနောက် တေဇောဓာတ်နဲ့ အန္တိမအဂ္ဂိစျာပနပူဇော်တာတွေ ပြုလုပ်မှာ လို့ သိရပါတယ်။

သက်တော် ၉၇ နှစ်၊ ၀ါတော် ၇၇ နှစ် ရှိတဲ့ နဂါးနှစ်ကောင်ပရိယတ္တိစာသင်တိုက်ရဲ့ ဦးစီးပဓာန နာယက ဘဒ္ဒန္တဓမ္မသီရိ ဆရာတော်ဘုရားကြီးဟာ ပြီးခဲ့တဲ့ ဖေဖော်ဝါရီ ၈ ရက် မနက် ၀၀ နာရီ ၀၂ မိနစ်အချိန်မှာ ဘဝနတ်ထံ ပျံလွန်တော်မူခဲ့တာ ဖြစ်ပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)