မဲခေါင်၊ ဖေဖော်ဝါရီ ၂၇
တာချီလိတ်မြို့၊ ရန်အောင်မြေရပ်ကွက်ထဲက ကျားဖြန့်လုပ်ငန်းတစ်ခုကို ဖေဖော်ဝါရီလ ၂၆ရက် မနက်အစောပိုင်းက စစ်တပ်နဲ့ရဲက ဝင်ဖမ်းရာမှာ တရုတ်နိုင်ငံသား ၂၀၀ ကျော် ဖမ်းဆီးရမိခဲ့တယ်လို့ သတင်းရင်းမြစ်တွေထံက သိရပါတယ်။
ဖေဖော်ဝါရီ ၂၅ ရက် ည ၁၂ နာရီကျော် ၂၆ရက် မနက်အစောပိုင်းမှာ တာချီလိတ်မြို့၊ ရန်အောင်မြင်ရပ်ကွက်က ‘ဝ’ ကွင်းအတွင်းမှာရှိတဲ့ ကျားဖြန့်လုပ်ငန်းကိုဝင်ဖမ်းခဲ့တာလို့သိရပြီး သက်သေခံပစ္စည်းတွေလည်း သိမ်းဆည်းရမိတယ်လို့ သိရပါတယ်။
ဒါပေမယ့် ဖမ်းဆီးရမိသူအရေအတွက် အတိအကျနဲ့ သိမ်းဆည်းရမိတဲ့ ပစ္စည်းတွေကို ထုတ်ပြန်ကြေညာခြင်းမရှိသေးပါဘူး။
ဖေဖော်ဝါရီ ၂၅ရက် နေ့လည်ပိုင်းမှာ ကျိုင်းတုံ – ယန်းလှပူးပေါင်းစစ်ဆေးရေးဂိတ်မှာ တရားမဝင် တရုတ်နိုင်ငံသားတစ်ဦးကို ဖမ်းဆီးရမိပြီး သူ့ဟာတာချီလိတ်က ကျားဖြန့်လုပ်ငန်းအိမ်တစ်ခုမှာ ပိတ်လှောင်ခံထားရာကနေ ထွက်ပြေးလာတာလို့စစ်ဆေးတွေ့ရှိရာကတဆင့် အခုလို ဝင်ရောက်ဖမ်းဆီးခဲ့တာ ဖြစ်တယ်လို့ မဲခေါင်သတင်းရင်းမြစ်က ပြောပါတယ်။
အဲဒီတရုတ်နိုင်ငံသားဟာ တရုတ်နိုင်ငံစီချွမ်ပြည်နယ်က ဖြစ်ပြီး ပန်ဆန်းမှာနေထိုင်ရာကနေ ပန်ဆန်း-မိုင်းယန်း-မိုင်းခတ်-ကျိုင်းတုံ-တာချီလိတ် လမ်းကြောင်းအတိုင်း လူကုန်ကူးခံရပြီး ပိတ်လှောင်ထားခံရတာလို့ သိရပါတယ်။
လက်ရှိမှာ ကျားဖြန့်လုပ်ငန်းနဲ့ပတ်သက်လို့ ဖမ်းမိတဲ့ တရုတ်နိုင်ငံသား ၅ သောင်းခန့်၊ ဗီယက်နမ် ၁၀၇၁ ဦး၊ အိန္ဒိယ ၄ ဦး၊ ထိုင်း ၅၃၇ ဦး၊ မလေးရှား ၁၃၃ ဦး၊ စင်္ကာပူ ၂ ဦး၊ ထိုင်ဝမ် ၄ ဦး၊ တောင်ကိုရီးယား ၂၀ ဦးနဲ့ ယူဂန်ဒါ ၁ ဦးတို့ကို သက်ဆိုင်ရာနိုင်ငံတွေဆီ ပြန်လွှဲပေးလိုက်ပြီလို့ စစ်ကောင်စီက ဖေဖော်ဝါရီ ၈ ရက် က ထုတ်ပြန်ထားပါတယ်။
ရှမ်းမြောက်မှာ ၁၀၂၇ စစ်ဆင်ရေးစတင်ပြီးနောက်ပိုင်း တရုတ်နိုင်ငံသားတွေဦးစီးလုပ်ကိုင်တဲ့ အွန်လိုင်းငွေလိမ်လုပ်ငန်း – ကျားဖြန့်တွေဟာ ရှမ်းပြည်အရှေ့ပိုင်းနဲ့ မြန်မာနိုင်ငံတွင်းကို ပြောင်းရွှေ့ပျံ့နှံ့သွားတာ ဖြစ်ပါတယ်။
MK – 012