မဲခေါင်၊ ဧပြီ ၁၈
ရှမ်းပြည်တောင်ပိုင်း၊ ညောင်ရွှေမြို့နယ်၊ လင်လမ်တောင်ကျေးရွာအုပ်စု၊ ညောင်လေးပင်ရွာအနီးမှာ ဧပြီလ ၄ ရက်နေ့ကတည်းက စစ်ကောင်စီနဲ့ တော်လှန်ရေးအင်အားစုကြား တိုက်ပွဲပြင်းထန်နေပြီး စစ်ကောင်စီဘက်က ထိခိုက်သေဆုံးမှုတွေ ရှိတယ်လို့ ဒေသခံတွေက ပြောပါတယ်။
ဧပြီလ ၄ ရက်နေ့မှာ ပအို၀်းပြည်သူ့စစ်(PNA)နဲ့ စစ်ကောင်စီ ပူးပေါင်းတပ်တွေဘက်က ၇ ဦး၊ ဧပြီလ ၁၃ ရက်နေ့မှာ အယောက် ၃၀ ကျော်သေဆုံးခဲ့ပြီး အယောက် ၂၀ ကျော် ပြင်းထန်ဒဏ်ရာရကာ အောင်ပန်း ကုတင် ၇၀၀ စစ်ဆေးရုံဆီကို ပို့ဆောင်ထားတယ်လို့ သိရပါတယ်။
ဒေသတွင်း သတင်းအရင်းအမြစ် တစ်ဦးက “စစ်တပ်ဘက်က အရင်ထွက်ပြေးတာ။ ကျန်ခဲ့တဲ့ PNO တွေက အဓမ္မစုဆောင်းခံရတာ။ ကောင်းကောင်း မတိုက်တတ်သေးဘူး။ ရက်ပိုင်းလောက်ပဲ သင်တန်းတက် ထားကြတာ”လို့ ပြောပါတယ်။
ဒါ့အပြင် အရင်ထွက်ပြေးသွားတဲ့ စစ်ကောင်စီတပ်သားတချို့က လက်နက်ကြီးနဲ့ ရမ်းသန်း ပစ်ခတ်တာကြောင့် အချင်းချင်းထိမှန်ပြီး သေဆုံးတာတွေလည်း ရှိတယ်လို့ PNA နဲ့ နီးစပ်သူတွေဆီက သိရပါတယ်။
ပင်လောင်းဒေသခံတစ်ဦးက “အခု ညောင်လေးပင်မှာ ကျသွားတဲ့ PNO တွေက ကျနော်တို့ဘက်မှာ လာခေါ်သွားတာတွေ။ အဓမ္မစုဆောင်းတာတော့ မဟုတ်ဘူး။ သွားချင်တဲ့ လူတွေကို တစ်ရွာလုံးက စုပြီး သိန်းတစ်ရာဆိုတစ်ရာ အဲလိုပေးရတယ်။ ကြေးစားသဘောပေါ့” လို့ ပြောပါတယ်။
ဧပြီလ ၁၃ ရက်နေ့က ဖြစ်ပွားခဲ့တဲ့တိုက်ပွဲမှာ မဟာမိတ်တော်လှန်ရေး အင်အားစုတွေဘက်ကလည်း ၅ ဦး ကျဆုံးခဲ့တယ်လို့ အင်းလေးပြည်သူ့ကာကွယ်ရေးတပ် (IPDF)က ထုတ်ပြန်ထားပါတယ်။
MK-015
