မဲခေါင်၊ ဧပြီ ၁၀
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ အင်းလေးရေပေါ်ခန်းမမှာ စစ်ကောင်စီက ဦးဆောင်ကျင်းပမယ့် အင်းလေးရေပေါ်သင်္ကြန် ပွဲတော်ကို ဒေသတွင်း တော်လှန်ရေး တက်ကြွလှုပ်ရှားတဲ့ အဖွဲ့အစည်းတွေက ကန့်ကွက်ရှုတ်ချတယ်လို့ သက်ဆိုင်ရာ တာဝန်ရှိသူတွေက ပြောပါတယ်။
စစ်ကောင်စီ လက်အောက်ခံ ဟိုတယ်နဲ့ ခရီးသွားလာရေး ဝန်ကြီးဌာနက လာမယ့် ဧပြီလ ၁၃ ရက်ကနေ ၁၆ ရက်နေ့အထိ ၄ ရက်ကြာ ကျင်းပသွားမယ့် အင်းလေးရေပေါ်သင်္ကြန်ကို ဒေသတွင်း မငြိမ်သက်မှုတွေကြောင့် ကန့်ကွက်ရတာလို့ ဆိုပါတယ်။
Justice Movement for Community – Innlay (JMC) အဖွဲ့အစည်း တည်ထောင်သူ ဒေါ် ယုလှိုင်သင်းက “ပြည်ပမှာနေတဲ့ ကျမတို့တောင်မှ ဒီစစ်မှုထမ်း ဥပဒေအကျုံးဝင်တဲ့ လူငယ်တွေနဲ့ ပတ်သက်ပြီး အရမ်း ပြာယာခတ်ရတယ်။ နောက်ပြီး လူငယ်တွေ ထွက်ဖို့ လမ်းကြောင်းတွေလည်း စီစဉ်ပေးရတယ်။ ခရီးစရိတ်မရှိရင် ကျမတို့ကပါ စိုက်ထုတ်ပေးရတဲ့ အထိပေါ့။ အဲလို အနေအထားမှာ ဒီလို ပွဲကြီး ထလုပ်တာက လုံးဝ အဓိပ္ပာယ် မရှိဘူးလို့ ခံစားရတယ်။ ဒါကြောင့် ဒီပွဲကို ဖြစ်အောင် လုပ်မယ်ဆိုတဲ့ လူတွေကို ကျမ အံ့ဩရတယ်” လို့ ပြောပါတယ်။
အင်းလေး ရေပေါ်သင်္ကြန်ကို ၂၀၁၉ ခုနှစ်က စတင်ကျင်းပခဲ့ပြီး COVID-19 ကပ်ရောဂါ ကာလနဲ့ စစ်အာဏာသိမ်းမှု ဖြစ်စဉ်တွေကြောင့် ၃ နှစ်ကြာရပ်ဆိုင်းခဲ့ရကာ ပြီးခဲ့တဲ့နှစ်ကမှ စစ်ကောင်စီရဲ့ ဦးဆောင်မှုနဲ့ ပြန်ကျင်းပတာလို့ ဒေသခံတွေဆီက သိရပါတယ်။
အဲဒီ နှစ်အတွင်း စစ်ကောင်စီ လက်အောက်ခံ အုပ်ချုပ်ရေးမှူးတွေရဲ့ ခြိမ်းခြောက် ဖိအားပေးမှုကြောင့် တစ်ရွာကို ယိမ်းအဖွဲ့ တစ်ဖွဲ့စီ ပါဝင်ခဲ့ကြရပေမယ့် ဒီနှစ်သင်္ကြန်မှာတော့ ပါဝင်သူ နည်းနိုင်တယ်လို့ အင်းလေးအမျိုးသမီးသမဂ္ဂ မကြိုးကြာက သုံးသပ်ပါတယ်။
“ဒီနှစ် သင်္ကြန်က ခါတိုင်း နှစ်ထက်တော့ လူမစည်နိုင်ဘူးလို့ ယူဆတယ်ပေါ့နော်။ ဘာကြောင့်လဲဆိုတော့ စစ်တပ်က စစ်မှုထမ်း ဥပဒေ ထုတ်ပြီးတော့ လူငယ်တွေကို အတင်း စစ်မှုထမ်းခိုင်းတဲ့အတွက် စစ်မှုမထမ်းချင်တဲ့ အင်းလေးဒေသ လူငယ်တော်တော်များများက နိုင်ငံခြားထွက်တာ ရှိသလို PDF ထဲ ဝင်ကြတာလည်း များတယ်ပေါ့နော်။ မနှစ်ကဆို ဒီချိန် အကတိုက်နေလောက်ပြီ။ ဖောင်တော်ဦး ဘုရားပွဲတုန်းက ရိုးရာပွဲ ဖြစ်တာတစ်ကြောင်း၊ စစ်မှုထမ်းလည်း မရှိသေးတော့ မပြောလိုဘူပေါ့။ ဒီနှစ်သင်္ကြန်ပွဲက မပျော်ရရင်လည်း ဘာမှ ဖြစ်မသွားလောက်ပါဘူး။ ပွဲဖြစ်ခဲ့ရင်တော့ ဘယ်သူတွေ ပါဝင်နေမလဲဆိုတာ ကျမတို့ စောင့်ကြည့်နေမှာပါ။ ပြီးတော့ စစ်တပ်နဲ့ ပူးပေါင်းသူအဖြစ် သတ်မှတ်တာပေါ့နော်။ တစ်နိုင်ငံလုံး စစ်မီးဟုန်းဟုန်း တောက်နေတဲ့အချိန်မှာ ဒီလိုပွဲတော် ကျင်းပတာကို ကန့်ကွက်တယ်ပေါ့နော်”
သင်္ကြန်ပွဲတော် ကျင်းပမယ့် ရေလည်မဏ္ဍပ်ကို ဧပြီလ ၁ ရက်နေ့ကတည်းက ဆောက်လုပ်နေပေမယ့် ပြီးခဲ့တဲ့နှစ်ကလိုမျိုး မဖြစ်မနေ ပါဝင်ကြဖို့အတွက် တစ်ရွာချင်းစီ တစ်အိမ်တက်ဆင်း လိုက်လံဆော်ဩတာမျိုးတော့ မရှိသေးဘူးလို့ ဆိုပါတယ်။
အင်းလေးဒသတွင်း နိုင်ငံအေးချမ်းသယောင် ဝါဒဖြန့်ဖို့အတွက် စစ်ကောင်စီက ခေါင်းစယ်အမျိုးမျိုးနဲ့ ပွဲတော်တစ်ခုပြီး တစ်ခု ကျင်းပဖို့ စီစဉ်နေပြီး လက်ရှိမှာ စစ်ကောင်စီထောက်ခံတဲ့ အင်အား လျော့နည်းလာတာကြောင့် ထိရောက်မှု မရှိဘူးလို့ ဒေသခံတွေဆီက သိရပါတယ်။
MK-014
