မဲခေါင် ၊ ဒီဇင်ဘာ ၁၉
ရှမ်းပြည်နယ်တောင်ပိုင်း၊ ဆီဆိုင်မြို့နယ်မှာ စိုက်ပျိုးရေးလုပ်ငန်း သုံးဖို့ စက်သုံးဆီတွေကို စစ်ကောင်စီက ဝယ်ယူခွင့်မပေးဘဲ ပိတ်ထားတဲ့အတွက် ခြံမြေတွေကို ထွန်ယက် လုပ်ကိုင်နိုင်ခြင်းမရှိသေးဘူးလို့ စိုက်ပျိုးရေးလုပ်ကိုင်နေကြတဲ့ ဒေသခံတွေကပြောပါတယ်။
စစ်ကောင်စီလက်အောက်ခံ အုပ်ချုပ်ရေးဌာနနဲ့ စစ်ကောင်စီတပ်ဖွဲ့ဝင်တွေဟာ ဆီဆိုင်မြို့နယ်အတွင်းမှာ ဓာတ်ဆီ၊ ဒီဇယ်တွေကို လွတ်လပ်စွာ ရောင်းချခွင့်မပြုဘဲ ကားတစ်စီးကို သုံးသောင်းကျပ်ဖိုးသာ ရောင်းချရမယ်လို့ ဆီဆိုင်တွေကို တားမြစ်ထားတာဖြစ်ပါတယ်။
ဆီဆိုင်မြို့နယ်အတွင်းမှာ ကားဆိုင်ကယ်ထဲ ထည့်ဖို့ကလွဲပြီး တစ်ခြားဘယ်အကြောင်းအရာနဲ့မှ စက်ဆီရောင်းချခွင့်မပြုဘဲ ဗူးတွေ၊ ပီပါတွေနဲ့ ဆီရောင်းချတာ သယ်ယူတာကို စစ်ကောင်စီနဲ့ ပြည်သူ့စစ်တွေက ဖမ်းဆီးအရေးယူနေတာဖြစ်ပါတယ်။
“ဓာတ်ဆီ ဒီဇယ်တွေကို ဗူးတွေ ပီပါတွေနဲ့ မရောင်းပေးဘူး၊ သယ်လို့လည်းမရဘူး သူတို့တွေ့ရင် ဖမ်းတယ်။ အဲ့လို ဝယ်လို့မရတော့တဲ့အတွက် ခြံတွေကို ထွန်ယက်ဖို့ ရေတင်ဖို့ ဘာမှ လုပ်လို့မရတော့ဘူး။ ဆီတွေကို ဗူးတွေနဲ့ ဝယ်လို့ရရင် ခြံထဲကို ရေမောင်းသွင်းပြီး စိုက်ပျိုးရေးလုပ်လို့ရတယ်။ အခုက ဗူးနဲ့ ဝယ်လို့မရဘူးဆိုတော့ ခြံလည်းလုပ်လို့မရတော့ဘူး။ ထွန်စက်သမားတွေလည်း ဆီဝယ်လို့မရတော့ မထွန်နိုင်တော့ဘူး ရပ်ထားရတယ်” လို့ ဆီဆိုင်မြို့နယ် ဒေသခံတောင်သူတစ်ဦးကပြောပါတယ်။
စစ်ကောင်စီဟာ ပြီးခဲ့တဲ့ နိုဝင်ဘာလကတည်းက ဆီဆိုင်မြို့နယ်အတွင်းရှိ ဆီဆိုင်ပိုင်ရှင်တွေကို ခေါ်ယူပြီး ဗူးတွေ ပီပါတွေနဲ့ မရောင်းချဖို့ ခံဝန်လက်မှတ်ထိုးခိုင်းခဲ့ပါတယ်။
စစ်ကောင်စီဟာ ကရင်နီပြည်နယ်ကို စက်သုံးဆီမရောက်အောင် ပိတ်ဆို့ဖြတ်တောက်မှုတစ်ခုအနေနဲ့ ကရင်နီပြည်နယ်နဲ့ နယ်စပ်ခြင်းထိစပ်တဲ့ ဆီဆိုင်မြို့နယ်ကို အခုလို စက်သုံးဆီဝယ်ယူရောင်းချခွင့် ကန့်သတ်လာတာဖြစ်ပါတယ်။
“သူတို့ ကရင်နီဖက်ကို ပိတ်ချင်ရင် ကရင်နီထဲကို သွားတဲ့လမ်းပေါ်မှာ သူတို့ဂိတ်တွေ တန်းစီရှိနေတာပဲ သူတို့ဂိတ်ကို ကျော်ပြီးသယ်လို့မှ မရတာ။ အခုက ပြည်သူတွေ တမင်သက်သက် ဒုက္ခရောက်အောင် လုပ်နေတာပါ။ စက်သုံးဆီတောင် လုံလောက်အောင် မဖြန့်ပေးနိုင်ပဲနဲ့ အတင်းအစိုးရလုပ်ချင်နေသေးတယ်။ သူတို့မပြုတ်သမျှ တောင်သူလယ်သမားတွေလည်း ကိုယ့်အလုပ်တောင်ကောင်းကောင်းလုပ်နိုင်မှာ မဟုတ်တော့ဘူး” လို့ ဆီဆိုင်မြို့နယ်မှ ဒေသခံတစ်ဦးကပြောပါတယ်။
လက်ရှိအချိန်မှာ ဆီဆိုင်မြို့နယ်အတွင်းဟာ စက်သုံးဆီ ရှားပါးမှုကြောင့် ဓာတ်ဆီ ၁ လီတာကို ကျပ် ၄၀၀၀ မှ ၆၀၀၀ အထိပေးရပြီး ဒီဇယ် ၁ လီတာကို ကျပ် ၅၀၀၀ အနိမ့်ဆုံးပေးဝယ်နေရတာဖြစ်ပါတယ်။
CJ-002
#MeKongNews
#ဆီဆိုင်
#ဆီဆိုင်မြို့နယ်
#စိုက်ပျိုးရေး
#အခက်အခဲ
#တောင်သူ
