စိုင်းခွန်
ဗမာလူမျိုးတွေ ဘာဖြစ်လို့ ဗမာစစ်ခေါင်းဆောင်တွေကို ခေတ်အဆက်ဆက် တော်လှန်ကြသလဲ။ မတရားတာလုပ်လို့ ဗမာအချင်းချင်း ခေါင်းပုံဖြတ်လို့ တော်လှန်တာဖြစ်ပါတယ်။ ဗမာခေါင်းဆောင်တွေဟာ အထက်တန်းလွှာတွေဖြစ်ပြီး ဗမာပြည်သူတွေကို သူတို့ထက်အဆင့်နိမ့်သူအဖြစ် ပြုမူဆက်ဆံဖိနှိပ်ကြတယ်။ ဘက်ပေါင်းစုံ ဖိနှိပ်တယ်။ တိုးတက်တဲ့ ဗမာလူထုကြီးက လူမျိုးရယ်လို့ သဘောမထားတော့ဘဲ လူလူချင်း ဖိနှိပ်တာကို မခံနိုင်လို့ တော်လှန်တာဘဲဖြစ်တယ်။
အဖိနှိပ်ခံ ပအိုဝ်းတွေလဲ အာဏာရှင်နဲ့ပေါင်းစားနေတဲ့ PNO လူကြီးတွေကို အဖိနှိပ်ခံ အနှိမ်ခံ ပြည်သူအနေနဲ့ မြင်တတ်ကြဖို့လိုတယ်။ အဲ့ဒီ PNO လူကြီးတွေ ဆိုသူတွေဟာ ဗမာလူမျိုးနဲ့တကွ မြန်မာပြည် လူမျိုးပေါင်းစုံ ပြည်သူတွေကို ဖိနှိပ်ကုပ်သွေးစုပ်နေတဲ့ စစ်အာဏာရှင်တွေနဲ့ တဂိုဏ်းတည်းသားတွေဘဲ။ စစ်အာဏာရှင်တွေရဲ့ လက်ဝေခံတွေဖြစ်တယ်။ သူတို့ဟာ သူတော်ကောင်း ယောင်ဆောင်သူတွေသာဖြစ်ကြောင်း သူတို့အလုပ်ကိုကြည့်ရင် ဆင်ပြောင်ကြီး လယ်ပြင်မှာ ဖြတ်သွားသလို ဘွင်းဘွင်းကြီး မြင်နေရပါတယ်။
PNO ဟာ ပအိုဝ်းတွေရဲ့ ဦးဆောင်သူအခန်းမှာနေပြီး ဘာဥပဒေမှ ပြဌာန်းမထားနိုင်ဘူး။ သူတို့ရဲ့ ပါးစပ်ကထွက်သမျှ ဥပဒေအုပ်ချုပ်နေတာ ဖြစ်ပါတယ်။ တကယ်တန်း နစ်နာတာက ပအိုဝ်းပြည်သူတွေပါဘဲ။
ပအိုဝ်းဒေသကို သူတို့ပိုင်ပစ္စည်းပိုင်သဖွယ်၊ ပအိုဝ်းလူမျိုးကို သူတို့ကိုယ်ပိုင်ဥစ္စာလို လုပ်ချင်သလို လုပ်နေခဲ့ကြတာ ၃၃ နှစ် ကြာညောင်းခဲ့ပြီ။ ပအိုဝ်းတွေ ဉာဏ်ပညာကြီးကြီးနဲ့ မြင်တတ်ဖို့ အချိန်တန်ပြီပါပြီ။
ဗမာစစ်အာဏာရှင်တွေနဲ့ သူ့တပည့် PNO ပအိုဝ်းအာဏာရှင်တွေရဲ့ သဘောသဘာဝက အတူတူပါပဲ။
တနိုင်ငံလုံးမှာ ပြည်သူက အာဏာရှင်ကို အပြီးအပိုင်ရှင်းဖို့ လုပ်နေတဲ့အချိန်မှာ PNO လူကြီးတွေ အသည်းအသန် ဗမာအာဏာရှင်ကို အပြင်းအထန် ကာကွယ်နေရခြင်းက သူတို့တွေဟာ ဘဝတူတွေမို့ အရိုးကိုက်ရရေး သူတို့မိသားစုကောင်းစားရေးအတွက် ပအိုဝ်းပြည်သူတွေကို လက်နက်ဆင် အသေခံခိုင်းနေတာ ပအိုဝ်းတွေသိဖို့ အလွန်အရေးကြီးပါတယ်။
ဗမာအာဏာရှင်တွေ အဖက်ဖက်ချွတ်ချုံကျနေချိန်မှာ PNO ကို အကြီးအကျယ် ဖိအားပေး အကြပ်ကိုင် စေခိုင်းလာတယ်။ တော်လှန်ရေးအင်အားစုတွေကို တိုက်ဖို့ လူအင်အားချိနဲ့လာတဲ့ ဗမာစစ်အာဏာရှင်တွေဟာ PNO ကနေတဆင့် ပအိုဝ်းအရပ်သားတွေကို အကြပ်ကိုင် လက်နက်တပ်ဆင်ပြီး အများစုကို ပဋိပက္ခဖြစ်တဲ့နေရာများသို့ ပို့ဆောင်ကာ သေကြေပျက်စီးစေပြီး အချို့ကို ပအိုဝ်းတော်လှန်ရေးအင်အားစုကို ပြန်တိုက်ခိုင်းတယ်။
စစ်ကောင်စီနဲ့လက်အောက်ခံ PNO ပြည်သူ့စစ်ဟာ ကချင်၊ ချင်း၊ ကရင်နီ၊ ကရင်၊ စစ်ကိုင်း၊ ရှမ်းမြောက်ဒေသတွေကို စစ်ပညာမတတ်တဲ့ ပအိုဝ်းအရပ်သားတွေကို သေနတ်တပ်ဆင်ပေးပြီး ပို့ဆောင်နေပါတယ်။ လူမသိ သူမသိ သွားသေကြရပြီး နာရေးတောင်လုပ်ခွင့်မရှိတာ အလွန်ပင်ဝမ်းနည်းဖွယ်ကောင်းလှပါတယ်။
သမိုင်းတပတ်လည်ပါပြီ။ အာဏာရှင်နဲ့ အပေါင်းအပါများ ပျက်သုဉ်းသောခေတ်သို့ ရောက်ပါပြီ။
တော်လှန်သူများ
ပြည်သူလူထုတရပ်လုံး
ပအိုဝ်းအမျိုးသားများ
မတွေဝေနဲ့ ရှေ့သို့ ရဲရဲချီတက်
ရဲရဲတိုက် ရဲရဲအောင်ပွဲခံပါ။
ဗမာအာဏာရှင်ကိုတိုက်တာ ဗမာကိုတိုက်တာ မဟုတ်ဘူး။ စစ်မိစ္ဆာ ဘီလူးတွေကို တိုက်တာ။ PNO ပြည်သူ့စစ်ကို တိုက်တာ ပအိုဝ်းကို တိုက်တာမဟုတ်ဘူး။ စစ်ဘီလူး မိစ္ဆာရဲ့တပည့် စစ်သရဲသဘက် ကျွန်ကောင်တွေကို တိုက်တာပါ။
ဒီနိုင်ငံ ဒီမြေ ဒီတော်လှန်ရေးမှာ လူမျိုးချင်းတိုက်တာမရှိ၊ စနစ်ဆိုးကို တိုက်နေတာပါ။ မတွေဝေနဲ့ တိုက်ကြ တော်လှန်ကြ။
#MeKongNews
