~ လင်းမောင် ~
တရုတ်နိုင်ငံတစ်ဝှမ်းတွင် ရေကြီးရေလျှံမှုများ၊ လုပ်သားမငြိမ်မသက်မှုများနှင့် ဒေသတွင်း ဆန္ဒပြပွဲများ ပြန့်နှံ့လာသည်နှင့်အမျှ တရုတ်အစိုးရသည် ပြည်သူတို့၏ မကျေနပ်မှုများကို ပိုမိုကြီးထွားသွားစေနိုင်သည့် အွန်လိုင်းအရေးအသားများကို နှိမ်နင်းရန် ကြိုးပမ်းမှုများကို အရှိန်မြှင့်လုပ်ဆောင်လာခဲ့ရာ၊ အာဏာပိုင်များသည် ဗီဒီယိုတင်သူများကိုတင်မကဘဲ ထိုဗီဒီယိုများကို မျှဝေသူ သို့မဟုတ် မှတ်ချက်ပေးသူများကိုပါ ပစ်မှတ်ထားလာနေသည်။
အတွင်းသတင်း သိရှိသူများနှင့် ဒေသခံများ၏ အဆိုအရ ရဲတပ်ဖွဲ့သည် လူမှုကွန်ရက်လှုပ်ရှားမှုများကို စောင့်ကြည့်မှုများ တိုးမြှင့်ခဲ့ပြီး၊ အသုံးပြုသူများကို စစ်ဆေးမေးမြန်းခြင်း၊ ၁၀ ရက်အထိ အုပ်ချုပ်ရေးပိုင်းဆိုင်ရာ ဖမ်းဆီးထိန်းသိမ်းခြင်းများနှင့် ပိုမိုဆိုးရွားသော ဖြစ်စဉ်များတွင် အာဏာပိုင်များက “အပျက်သဘောဆောင်သော သတင်းအချက်အလက်များ” ဟု ဖော်ပြသည့်အရာများကို ဖြန့်ဝေသည်ဟု စွပ်စွဲခံရသူများအား ရာဇဝတ်ကြောင်းအရ အရေးယူဆောင်ရွက်ခြင်းများ ပြုလုပ်လျက်ရှိသည်။
ယင်းနှိမ်နင်းမှုသည် ဒေသအတော်များများတွင် ဆိုးရွားသော ရေကြီးမှုများနှင့် ရင်ဆိုင်နေရချိန်၊ ဘေးအန္တရာယ် ကယ်ဆယ်ရေး လုပ်ဆောင်ပုံအပေါ် ဝေဖန်မှုများ ကြီးထွားလာချိန်တို့တွင် ပေါ်ပေါက်လာခြင်း ဖြစ်သည်။
တရုတ်အရာရှိများသည် လုပ်အားခ အငြင်းပွားမှုများ၊ ဆေးဘက်ဆိုင်ရာ အငြင်းပွားဖွယ်ရာများနှင့် ဒေသတွင်း နစ်နာချက်များအပေါ် လူထု၏ ခံပြင်းမှုများ မြင့်တက်လာခြင်းနှင့်လည်း ရင်ဆိုင်နေကြရသည်။
ပေကျင်းအစိုးရသည် ဒေသန္တရအစိုးရများကို ရေကြီးရေလျှံမှု ထိန်းချုပ်ရေး လုပ်ငန်းစဉ်များနှင့် မငြိမ်မသက်မှုများကို တားဆီးရန် တာဝန်ပေးထားသည့် ၎င်း၏ ကျယ်ပြန့်သော ပြည်တွင်းလုံခြုံရေး ယန္တရားအတွက် တည်ငြိမ်မှု ထိန်းသိမ်းရေး နှစ်ခုလုံးကို အားကောင်းစေရန် ညွှန်ကြားထားကြောင်း တရုတ်ကွန်မြူနစ်ပါတီ (CCP) ၏ အတွင်းလူတစ်ဦးက ပြောကြားခဲ့သည်။
“အာဏာပိုင်တွေ အကြောက်ဆုံးက သာမန်ပြည်သူတွေဟာ မြေပြင်မှာ ဖြစ်ပျက်နေတာတွေကို ရိုက်ကူးပြီး အွန်လိုင်းပေါ် တင်လိုက်မှာကိုပါပဲ” ဟု အင်တာနက်အသုံးပြုသူတစ်ဦးက အွန်လိုင်းတွင် ရေးသားခဲ့သည်။
တရုတ်မှ ရေမြုပ်နေသော ရပ်ကွက်များ၊ ကြန့်ကြာနေသော ကယ်ဆယ်ရေး လုပ်ငန်းစဉ်များ သို့မဟုတ် လူလုံးထွက်မလာသော ဒေသန္တရအရာရှိများ ပါဝင်နေသည့် ရုပ်သံများက တာဝန်ယူမှု၊ တာဝန်ခံမှုရှိရန် ပြည်သူ၏ တောင်းဆိုမှုများကို မြန်မြန်ဆန်ဆန် ဖြစ်ပေါ်စေခဲ့သည်။
လူမှုကွန်ရက်ပို့စ်များအရ ယင်းလှုပ်ရှားမှုက လက်ရှိတွင် အွန်လိုင်းပို့စ်များ ဖျက်ပစ်ခြင်းကို မလွန်ဆန်နိုင်လောက်အောင် ပြန့်နှံ့နေပြီ ဖြစ်သည်။ အာဏာပိုင်များသည် ဖြစ်စဉ်များကို ရိုက်ကူးသူများကို ခြေရာခံခြင်း၊ ဗီဒီယိုများကို ပျံ့နှံ့စေသူများကို ဖော်ထုတ်ခြင်းနှင့် သီးသန့် မက်ဆေ့ဂျ်ဂရု(ပ်)များအတွင်း ပြောဆိုမှုများကိုပင် စောင့်ကြည့်ခြင်းများ ပြုလုပ်နေကြသည်။ အထူးသဖြင့် ထိုသို့သော ရုပ်သံမှတ်တမ်းများ ကျယ်ပြန့်စွာ ပျံ့နှံ့နေသည့် ပြည်ပပလက်ဖောင်းများကို ကြည့်ရှုနိုင်ရန် တရုတ်နိုင်ငံသား အများအပြားက အင်တာနက် ကန့်သတ်ချက်များကို ကျော်လွှားနေကြခြင်းအပေါ် အရာရှိများက စိုးရိမ်နေကြသည်။
မြင့်တက်လာသော ဆင်ဆာဖြတ်တောက်မှုသည် ဇူလိုင် ၇ ရက်မှ ဇူလိုင် ၁၃ ရက်အတွင်း ပျံ့နှံ့ခဲ့ပြီး ပြည်နယ်အများအပြားတွင် ဆန္ဒပြပွဲများကို ပြသထားသည့် ဗီဒီယိုစီးရီးများ၏ နောက်ဆက်တွဲအဖြစ် ပေါ်ပေါက်လာခြင်း ဖြစ်သည်။ ထိုရုပ်သံမှတ်တမ်းများတွင် ဟီဘေးပြည်နယ်၌ ခွဲစိတ်ပြီးနောက် လူနာတစ်ဦး သေဆုံးသွားခဲ့ရသဖြင့် အဖြေတောင်းခံနေကြသည့် ပူဆွေးဝမ်းနည်းနေသော မိသားစုများ၊ ဓာတ်လိုက်မှုနှင့် ဆက်နွှယ်သည့် သေဆုံးမှုအတွက် ဆန္ဒပြနေကြသည့် ဆွေမျိုးများ၊ တိုတောင်းသော နွေရာသီကျောင်းပိတ်ရက်များကို ကန့်ကွက်ဆန္ဒပြနေကြသည့် ကျောင်းသားများ၊ မရရှိသေးသော လုပ်အားခများအတွက် တံတားတစ်စင်းပေါ်သို့ တွယ်တက်နေကြသည့် ကွမ်ရှီးရှိ ဆောက်လုပ်ရေးလုပ်သားများနှင့် လက်ကျန်လစာများကို တောင်းဆိုနေကြသည့် ယူနန်ရှိ ရွှေ့ပြောင်းလုပ်သားများ ပါဝင်သည်။ အချို့သော ရုပ်သံအပိုင်းအစများတွင် ရဲတပ်ဖွဲ့က ဆန္ဒပြသူများကို ဖမ်းဆီးထိန်းသိမ်းနေသည်ကို ဖော်ပြထားသည်။
ကွမ်တုံပြည်နယ်မှ ဝါဒဖြန့်ချိရေး လုပ်ငန်းများတွင် ပါဝင်နေသော ပြည်သူ့ဝန်ထမ်းတစ်ဦးက ဒေသန္တရအစိုးရများသည် ထိုကဲ့သို့သော ဖြစ်စဉ်များ ပြည်ပကြည့်ရှုသူများထံ ရောက်ရှိသွားပါက ပေကျင်း၏ စစ်ဆေးစုံစမ်းမှု ရောက်လာမည်ကို စိုးရိမ်နေကြကြောင်း ပြောကြားခဲ့သည်။
“ဒေသန္တရအရာရှိတွေဟာ အရေးယူခံရမှာကို စိုးရိမ်နေကြပါတယ်” ဟု ၎င်းက ပြောကြားခဲ့ပြီး၊ အေဂျင်စီများ၊ ဆေးရုံများနှင့် ပြည်သူ့အဖွဲ့အစည်းများသည် ဝန်ထမ်းများအား အရေးပေါ်အခြေအနေများ သို့မဟုတ် ဆန္ဒပြပွဲများနှင့် ဆက်နွှယ်သည့် ပို့စ်များကို လျစ်လျူရှုခြင်း၊ မျှဝေခြင်း သို့မဟုတ် like ပေးခြင်းများမှ ရှောင်ကြဉ်ကာ အပြုသဘောဆောင်သော စွမ်းအင်များကိုသာ မြှင့်တင်ရန် ညွှန်ကြားထားကြောင်း အဖွဲ့အစည်းများက ဆိုသည်။
ထိုလှုပ်ရှားမှုသည် ရပ်ရွာအဆင့်အထိ ရောက်ရှိသွားပြီဖြစ်ပြီး၊ ဒေသတွင်း လူမှုမီဒီယာအဖွဲ့များအတွင်း အနုတ်လက္ခဏာဆောင်သော ရုပ်သံများ မပျံ့နှံ့စေရန် ဒေသခံများအား နယ်မြေခံဝန်ထမ်းများက သတိပေးနေကြသည်။
ရေကြီးမှုနှင့် ဘေးအန္တရာယ်များနှင့် ဆက်နွှယ်သည့် အွန်လိုင်းသတင်းမှားများဟု ဆိုသော အမှုပေါင်း ၂၅ မှုကို အရေးယူဆောင်ရွက်ခဲ့ကြောင်း ပြီးခဲ့သည့် ဇူလိုင် ၁၃ ရက်တွင် တရုတ်ပြည်သူ့လုံခြုံရေးဝန်ကြီးဌာနက ကြေညာခဲ့သည်။ အာဏာပိုင်များက လူ ၄ ဦးကို ရာဇဝတ်ကြောင်းအရ ထိန်းသိမ်းထားပြီး ၂၃ ဦးမှာ အုပ်ချုပ်ရေးပိုင်းဆိုင်ရာ ပြစ်ဒဏ်များ ချမှတ်ခံရခဲ့ကာ၊ လူမှုကွန်ရက် အကောင့်အတော်များများ ပိတ်သိမ်းခံခဲ့ရပြီး၊ အသုံးပြုသူများကို ဘေးအန္တရာယ်နှင့် ဆက်နွှယ်သည့် အကြောင်းအရာများကို ပြန်လည်မျှဝေခြင်း၊ ပြုပြင်ဖန်တီးခြင်း သို့မဟုတ် AI ကို အသုံးပြု ဖန်တီးခြင်းများ မပြုလုပ်ရန် သတိပေးခဲ့ကြောင်း ပြောကြားခဲ့သည်။
အာဏာပိုင်များသည် တိုးပွားလာနေသော ပြည်သူတို့၏ စိတ်ပျက်အားလျော့မှုများကို ထိန်းချုပ်ရန် ကြိုးပမ်းနေကြသဖြင့် တရုတ်နိုင်ငံ၏ အဓိက အွန်လိုင်းပလက်ဖောင်းများတစ်လျှောက် ဆင်ဆာဖြတ်တောက်မှုများမှာ သိသိသာသာ တင်းကျပ်လာကြောင်း ဒေသခံများက ပြောကြားကြသည်။
#MeKongNews
