မဲခေါင်၊ နိုဝင်ဘာ ၃
ပို့ကုန်ရငွေ ဖြေလျော့မှုပေးရန် စီးပွားရေးလုပ်ငန်းရှင်များက စစ်ကောင်စီကို တင်ပြတောင်းဆိုထားပေမယ့် လက်ရှိအချိန်ထိ ဖြေလျော့မှုမရှိသေးကြောင်း ပို့ကုန်သွင်းကုန်လုပ်ငန်းရှင်ဆီက သိရပါတယ်။
ပြည်ပတင်ပို့နေတဲ့ ပို့ကုန်ရငွေ ၅၀ ရာခိုင်နှုန်းကို လွတ်လပ်စွာ လဲလှယ်သုံးစွဲခွင့်ပြုရန်နဲ့ ပို့ကုန်ရငွေ ၁၀၀ ရာခိုင်နှုန်း လွပ်လပ်စွာသုံးစွဲခွင့်ပေးရေးဆိုပြီး လုပ်ငန်းရှင်အဖွဲ့ ၂ ဖွဲ့ခွဲကာ တောင်းဆိုခဲ့တယ်လို့ သိရပါတယ်။
ပြီးခဲ့တဲ့အောက်တိုဘာ ၁၆ ရက်က စစ်ကောင်စီရဲ့ စီးပွား/ကူးသန်း ပြည်ထောင်စုဝန်ကြီး ဦးထွန်းအုံနဲ့ ပို့ကုန်လုပ်ငန်းရှင် ၁၄၀ ခန့် ညှိနှိုင်းအစည်းအဝေးပြုလုပ်စဉ်က တောင်းဆိုထားပေမယ့် အခုချိန်ထိ ထူးခြားမှုမရှိသေးဘူးလို့ လုပ်ငန်းရှင်များထံက သိရပါတယ်။
“လုပ်ပေးမယ်သာပြောတယ် အခုထိတော့ ဘာမှမထုတ်ပြန်သေးဘူး၊ တစ်ခုခုဖြေလျော့မှ အဆင်ပြေနိုင်မယ့်အနေအထား၊ အခုဆို ပို့ကုန်သမားကမပို့နိုင်ဘူး၊ တိုက်ပွဲအခြေနေတွေကြောင့် လမ်းကြောင်းအခက်အခဲလည်း ပါတာပေါ့၊ ပို့တိုင်းရှုံးနေပြီ” လို့ ပို့ကုန်လုပ်ငန်းရှင် တစ်ဦးကပြောပါတယ်။
ပို့ကုန်ရငွေရဲ့ ၅၀ ရာခိုင်နှုန်းကို ၂၁၀၀ ကျပ်နဲ့ ရောင်းပေးရပြီး ကျန်တဲ့ ၅၀ ရာခိုင်နှုန်းကို၂၉၂၀ ကျပ်နဲ့ ဘဏ်တွေကို ရောင်းရကာ ရာခိုင်နှုန်းနှစ်ခုကို ပြန်ပေါင်းချုပ်လိုက်ပါက ၂၅၁၀ ကျပ်နီးပါးဖြစ်နေတဲ့အတွက် ထုတ်လုပ်မှုစရိတ်နဲ့ ကိုက်ညီမှုမရှိဘူးလို့ သိရပါတယ်။
“ပို့ကုန်လုပ်ငန်းကို ဖြည့်လျော့မှုမပေးရင် မှောင်ခိုကြီးလာတော့မယ်၊ သွင်းကုန်သာမှောင်ခိုလုပ်တာကြားဖူးပေမယ့်၊ အခုကပို့ကုန်မှောင်ခိုပို့နေရပြီ၊ အမှန်တကယ်လုပ်သူတွေက ရှုံးပြီးရင်းရှုံးဘဲ၊ ပို့ကုန်မရှိရင် တိုင်းပြည်နိုင်ငံခြားဝင်ငွေ ရှားပါးမှုက ဆိုးသထက်ဆိုးလာဖို့ဘဲရှိတယ်” လို့ နယ်စပ်ကုန်သည်တစ်ဦးကပြောပါတယ်။
ပို့ကုန်အများစုမှာလယ်ယာထွက်ကုန်အပေါ် အခြေခံထားတာကြောင့် ပို့ကုန်တင်ပို့မှုလျော့ကြပါက ဆက်စပ်ကဏ္ဍတွေဖြစ်တဲ့ တောင်သူများပါ ထိခိုက်လာနိုင်တယ်လို့လည်း ကုန်သည်များကပြောပါတယ်။
စစ်ကောင်စီလက်အောက်ခံ စီး/ကူးဝန်ကြီးဌာနရဲ့ စာရင်းဇယားတွေအရ ပို့ကုန်တင်ပို့မှုရဲ့ယခင်ဘဏ္ဍာနှစ် ပထမ ၆ လတာနှင့် ယခု ဘဏ္ဍာနှစ် ပထမ ၆ လတာ ကာလတူ နှိုင်းယှဉ်ပါက ဒေါ်လာ ၁ ဘီလီယံခန့် လျော့ကြနေတာ ဖြစ်ပါတယ်။
MK-006
#MeKongNews
#ပို့ကုန်
#လုပ်ငန်းရှင်
#စစ်ကောင်စီ
#တောင်းဆို
