မဲခေါင်၊ ဒီဇင်ဘာ ၄

မြဝတီ-ကော့ကရိတ် အာရှလမ်းမကြီးတလျှောက် တိုက်ပွဲတွေကြောင့် ကုန်ကားများ ရာနဲ့ချီ ပိတ်မိနေပြီး ၊ ကုန်သွယ်ရေးရပ်တန့်ထားလိုက်ရပြီလို့ နယ်စပ်ကုန်သည်များထံက သိရပါတယ်။

ဒီဇင်ဘာလ ၁ ရက် မှစတင်ကာ အာရှလမ်းကြောင်းတလျှောက်ရှိ စစ်ကောင်စီတပ်စခန်းများကို ကရင်အမျိုးသား အစည်းအရုံး (KNU) နဲ့ ပြည်သူ့ကာကွယ်ရေးတပ် (PDF) တပ်ဖွဲ့များက ဝင်ရောက်တိုက်ခိုက်နေတာကြောင့် တိုက်ပွဲအပြင်းအထန်ဖြစ်ပွားနေပြီး အဆိုပါနေရာသို့ရောက်ရှိနေတဲ့ ကုန်ကားများအပါအဝင်၊ ခရီးသွားကားများ ပိတ်မိနေတယ်လို့လည်း ဒေသခံတွေရဲ့ပြောပြချက်အရသိရပါတယ်။

“ ကော့ကရိတ်လမ်းကြောင်းက ပိတ်နေတယ်၊ စစ်ကောင်စီဘက်က လေယာဥ်တွေနဲ့ပါကြဲနေတော့ ၊လွတ်လမ်းရှာမရဘူး၊ ကုန်အပြည့်နဲ့ ကားတွေပိတ်မိနေတာ၊ ကား ရာချီတယ်၊ ကုန်တန်ကြေးက တွဲကားဆိုရင် ၂၃ တန်ရှိတယ်၊ ၁၀ ဘီးကားဆိုရင် ၁၇ တန်ရှိတယ်၊ ထိုင်းကနေသွင်းလာတဲ့ကုန်များတဲ့အတွက် တန်ကြေးတွေကများတယ်၊ ဘီလီယံနဲ့ချီပိတ်မိနေတာ‘ လို့ မြဝတီနယ်စပ်ကုန်သည်တစ်ဦးက ပြောပါတယ်။

ပြီးခဲ့သည့်နှစ်၊ နှစ်ကုန်ပိုင်းကလည်း အာရှလမ်းပေါ်တွင် အာဏာသိမ်းစစ်တပ်နှင့် ကရင်အမျိုးသား လွတ်မြောက်ရေးတပ်မတော် (KNLA) ဦးဆောင်သည့် ပူးပေါင်းမဟာမိတ်တပ်များကြား တိုက်ပွဲများဖြစ်ပွားခဲ့တာကြောင့် ကုန်ကားများပိတ်မိပြီး ၊ ထိုင်းဘက်သို့တင်ပို့မယ့် လယ်ယာထွက်ကုန်များ ပျက်စီးဆုံးရှုံးမှုရှိခဲ့တယ်လိို့လည်း သိရပါတယ်။

“ အခုက တရုတ်လမ်းကြောင်းရော၊ ထိုင်းဘက်ရောပိတ်သွားပြီဆိုတော့၊ စစ်ကောင်စီက ပို့ကုန်ရငွေမရှိသလောက်ဖြစ်သွားပြီ၊ သွင်းကုန်အတွက် ပါမစ်တွေ၊ ဒေါ်လာရောင်းချပေးမှုအပိုင်းတွေက အခုထက်ပိုဆိုးလာတော့မယ်၊ တရုတ်ဘက်ကုန်ပို့မရကတည်းက အထိနာနေတာ၊ ဒီပုံစံတိုင်းဆိုစစ်ကောင်စီက စီးပွားရေးကိုထိန်းချူပ်မနိုင်လောက်တော့ဘူး၊ အခြေခံလူတန်းစားတွေကတော့အထိပိုနာမယ့်သဘောရှိတယ်’ လို့ စီးပွားရေးလုပ်ငန်းရှင်တစ်ဦးက သုံးသပ်ပြောကြားပါတယ်။

အာရှလမ်းမကြီးကို အသုံးပြုလို့ရတာ တစ်လကျော်သာရှိသေးကြောင်းနဲ့ ၊လက်ရှိမှာတော့ နှစ်ဖက်တိုက်ပွဲပြင်းထန်နေတာကြောင့်၊ ကုန်သွယ်ရေးလုံးဝရပ်တန့်ကာ၊ စောင့်ကြည့်အနေအထားသာဖြစ်တယ်လို့ ကုန်သည်များက ဆိုပါတယ်။

ထိုင်းဘက်မှမြန်မာသို့ CMP လုပ်ငန်း သုံး ကုန်ကြမ်းပစ္စည်းများ၊ ဆေးဝါးများ၊ စားသောက်ကုန်၊ ဆောက်လုပ်ရေးပစ္စည်း များ တင်သွင်းပြီး မြန်မာဘက်မှ စိုက်ပျိုးရေးထုတ်ကုန်များ၊ ကုန်စိမ်းများ၊ ရော်ဘာ၊ ရေထွက်ကုန်များ တင်ပို့နေချိန်ဖြစ်တယ်လို့လည်း သိရပါတယ်။

လက်ရှိအချိန်ထိ ထိုင်း၊မြန်မာ တံတား ပိတ်ထားခြင်းမရှိဘဲ၊ ထိုင်းဘက်ကကားအဝင်ရှိပြီး၊ မြန်မာဘက်ရှိသက်ဆိုင်ရာ ဂိုဒေါင်တွေမှာပစ္စည်းချထားလျက်ရှိပြီး၊ ကုန်သွယ်ရေးဇုံအတွင်းရှိ စစ်ကောင်စီဝန်ထမ်းများ ထွက်ပြေးတိမ်ရှောင်သွားကြပြီလို့လည်း ကုန်သည်များထံကသိရပါတယ်။

ဒီဇင်ဘာ ၁ ရက်နေ့တွင်ပင် ကော့ကရိတ်မြို့ လှိုင်ဝစစ်ဆေးရေးဂိတ်အနီး လက်နက်ကြီးထိမှန်ကာယာဉ်မောင်း ၁ ဦး သေဆုံးကာ ကုန်တင်ကား ၂ စီး မီးလောင်ခဲ့တယ်လို့ သိရပါတယ်။

MK-006

#MeKongNews

#တိုက်ပွဲ

#ကုန်စည်

#ရပ်တန့်

#အာရှလမ်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)