မဲခေါင်၊ နိုဝင်ဘာ ၂၇
တရုတ်-မြန်မာနယ်စပ် ကျင်စန်းကျော့ ကုန်သွယ်ရေးဂိတ်မှာ နိုဝင်ဘာ ၂၃ ရက်နေ့က မီးလောင်မှုကြောင့် ပျက်စီးသွားတဲ့ကုန်ကားများအတွက် အာမခံကြေးငွေ မရဘူးလို့ ကုန်ကားပိုင်ရှင်တွေထံက သိရပါတယ်။
ကုန်သွယ်ရေးဂိတ် တိုက်ခိုက်ခံရမှုမှာ ကုန်ကားအစီးရေ ၂၅၀ ကျော် ပျက်စီးဆုံးရှုံးပြီး ကားတစ်စီးတန်ကြေးမှာ သိန်းတစ်ထောင်နီးပါးရှိကာ၊ ကားပေါ်တွင်ပါသည့် ကုန်တန်ဖိုးမှာလည်း သိန်းရာချီရှိတဲ့အတွက် ဆုံးရှုံးနစ်နာမှုပိုမိုဖြစ်နေတယ်လို့ ကုန်သည်များကဆိုပါတယ်။
“အခုခြေနေက တစ်ဖက်ကိုတစ်ဖက် အပစ်တွေတင်နေတုန်းဘဲ၊ စစ်မက်နဲ့ပတ်သက်ပြီးဖြစ်တဲ့အတွက် အာမခံကုမ္မဏီတွေက မလျော်ဘူးလို့ပြောတယ်၊ အခုက ညှိနှိုင်းနေတုန်းဘဲ တာဝန်ရှိသူဆိုတာတွေကလည်း အကုန်တိုက်ပွဲစကတည်းက ထွက်ပြေးသွားတာ၊ ဝါယာရှော့ဖြစ်ပြီး ကားမီးလောင်တာမဟုတ်ဘူး ၊ စစ်မက်ကြောင့်ဖြစ်တာဆိုပြီး လျော်ကြေးငွေကို မလျော်ဘူးဆိုတဲ့သဘော ကုန်သည်တွေနဲ့ ကားအုံနာတွေက ခံရမယ့်သဘောဖြစ်နေတယ်၊ အခုထိဖြေရှင်းပေးမယ့်သူမရှိဘူး” လို့ နယ်စပ်ကုန်သည်တစ်ဦးကပြောပါတယ်။
အဆိုပါ မီးလောင်ကျွမ်းသွားတဲ့ ကားများထဲတွင် တရုတ်နိုင်ငံသားပိုင် ကားများလည်းပါပြီး ဆုံးရှုံးမှုအတွက်ညှိနှိုင်းမှုတွေလုပ်ဆောင်နေတယ်လို့ သိရပါတယ်။
မီးလောင်သွားတဲ့ ကားတွေဟာ တရုတ်နိုင်ငံထဲက ထုတ်တဲ့ စက်ပစ္စည်း၊ စားသောက်ကုန်နဲ့ အိမ်သုံးပစ္စည်း၊ ကြိတ်သားတွေနဲ့ ပလပ်စတစ်သုံးပစ္စည်း တင်ဆောင်ထားတဲ့ ကားတွေဖြစ်ပြီး နယ်စပ်တိုက်ပွဲတွေကြောင့် ပိတ်မိနေတာပါ။
စစ်ကောင်စီတပ်ဟာ ကုန်ကားတွေထားတဲ့ ဂိတ်ဝန်းကို အကာအကွယ်ယူပြီး နိုဝင်ဘာ ၂၀ ရက်နေ့က ဝင်ရောက် တပ်စွဲခဲ့တယ်လို့ တော်လှန်ရေးအဖွဲ့တွေဘက်က ပြောပါတယ်။
ကျင်စန်းကျော့ကုန်သွယ်ရေးစခန်းထဲမှာ ကုန်ကားပေါင်း ၁ ထောင်ကျော်ရှိသလို ဆယ်ဝမ်းဟွာကျင်းကားဝန်းထဲမှာလည်း ကုန်ကား ၂၅၀ ခန့်ရှိနိုင်တယ်လို့ ခန့်မှန်းထားကြပါတယ်။
MK-006
#MeKongNews
#ကျင်စန်းကျော့
#ကုန်ကား
#မီးလောင်
#အာမခံကြေး