မဲခေါင်၊ ဩဂုတ် ၁၅
မန္တလေးတိုင်း၊ မိုးကုတ်မြို့ကနေ ပြင်ဦးလွင်၊ မန္တလေး ဘက်ကို စစ်ရှောင်ကြသူတွေဟာ မနေ့ ဩဂုတ် ၁၄ ရက်နေ့ ညနေပိုင်းမှာ နောင်ချိုမြို့နယ်၊ အင်ဝိုင်းကျေးရွာ သကြားစက်အနီးက တံတားကျိုးသွားတာကြောင့် လမ်းပိတ်မိနေတယ်လို့ စုံစမ်းသိရပါတယ်။
“တံတားကျိုးလို့ ပိတ်လိုက်ပြီ။ အင်ဝိုင်းဘုန်းကြီးကျောင်းမှာ စုပြုံပြီး အိပ်နေရတယ်။ ပြန်လှည့်မယ်ဆိုလည်း ညက ဖြတ်လို့မရတော့ဘူးလေ။ တချို့ကတော့ ကသာဘက်ကနေ ပတ်သွားမယ် ကြားတယ်” လို့ ယာဉ်မောင်း တစ်ဦးက ပြောပါတယ်။
မိုးကုတ် – ပြင်ဦးလွင် လမ်းကို ပြီးခဲ့တဲ့ ရက်ပိုင်းတွေက စစ်ကောင်စီဘက်ကနေ ပိတ်ထားတာကြောင့် စစ်ဘေးရှောင်ကြသူတွေဟာ မိုးကုတ် – ဟိုခို – နောင်ချို – ကျင်ဂနိုင်လမ်းက ပတ်သွားနေရတာပါ။
ဒါ့အပြင် မနေ့မှာလည်း စစ်ကောင်စီဖက်က မိုးကုတ် – ပြင်ဦးလွင် လမ်းကို ယာယီသဘောအနေနဲ့ ဖွင့်လှစ်ပေးခဲ့ပေမယ့် မိုးရက်ဆက်ရွာသွန်းမှုတွေကြောင့် ကားငယ်တွေအတွက် အဆင်မပြေဖြစ်နေပြီး နောင်ချိုဘက်လမ်းကိုပဲ ဆက်လက် အသုံးပြုနေရတယ်လို့ ဆိုပါတယ်။
“သကြားစက် ရောက်တဲ့ကားတွေတော့ ပြန်လှည့်လို့ မရတော့ဘူး။ မရောက်သေးတဲ့ လူတွေတော့ ကျောက်မဲ – ပြင်ဦးလွင်လမ်းနဲ့ ဟန်မြင့်မိုရ် – ကျောက်ဂူလမ်း သွားကြတယ်” လို့ ယာဉ်မောင်း တစ်ဦးက ဆက်ပြောပြပါတယ်။
ပြင်ဦးလွင်ရောက်ဖို့ ပတ်သွားရတဲ့ လမ်းများစွာရှိပေမယ့် ဝက်ဝံစစ်ဆေးရေးဂိတ်ကို စစ်ကောင်စီဘက်က ပိတ်ထားတာကြောင့် အဲဒီ နေရာတစ်ဝိုက်မှာလည်း ကားအစီးရေ ရာချီပိတ်မိနေတယ်လို့ ဒီနေ့မနက်ပိုင်း ရရှိတဲ့ သတင်းတွေအရ သိရပါတယ်။
မိုးကုတ် – ပြင်ဦးလွင်လမ်းနဲ့ ဝက်ဝံစစ်ဆေးရေးဂိတ်ကို စစ်ကောင်စီဘက်က မြေပြင်အခြေအနေအရ ပိတ်လိုက် ဖွင့်လိုက်လုပ်နေသလို မိုးကုတ် အဝင်/ထွက်ကိုလည်း တော်လှန်ရေး အင်အားစုတွေက လုံခြုံရေးအရ ရက်ခြားပြီး ဖွင့်ပေးနေတယ်လို့ ယာဉ်မောင်းတွေက ပြောပါတယ်။
MK-014
