မဲခေါင်၊ ဧပြီ ၁၀
ရှမ်းပြည်နယ်တောင်ပိုင်းနဲ့ ကရင်နီ(ကယား)နယ်စပ်တွေ ဖြစ်တဲ့ ဖယ်ခုံနဲ့ မိုးဗြဲက စစ်ကောင်စီတပ်တွေကို တော်လှန်ရေးတပ်ဖွဲ့တွေ တိုက်ခိုက်နေလို့ တိုက်ပွဲတွေ ပြင်းထန်နေတယ်လို့ ရှမ်းတောင်တော်လှန်ရေးအဖွဲ့နဲ့နီးစပ်တဲ့အသိုင်းအဝန်းက သိရပါတယ်။
ဖယ်ခုံအခြေပြု ခမရ ၄၂၁ နဲ့ ကရင်နီအစ မိုးဗြဲ ခမရ ၄၂၂ တို့ကို ဧပြီလ ၃ ရက်နေ့ကတည်းက တိုက်ခိုက် နေတဲ့ KNDF တော်လှန်ရေးတပ်ဖွဲ့ပါဝင်တဲ့ ရှမ်းတောင်တော်လှန်ရေးတပ်ဖွဲ့တွေဟာ ဧပြီလ ၈ ရက်နေ့မှာ ထပ်မံရောက်ရှိလာတဲ့ တော်လှန်ရေးတပ်ဖွဲ့ တွေနဲ့ပူးပေါင်းပြီးအင်အားတွေ စုစည်းကာ တိုက်ခိုက်နေလို့ တိုက်ပွဲတွေ အပြင်းအထန်ဖြစ်ပွားနေပါတယ်။
တိုက်ပွဲပြင်းထန်နေလို့ မနေ့က စစ်ကောင်စီက လေယာဉ်နဲ့ ဆက်တိုက် ဗုံးကြဲနေသလို ဖယ်ခုံအခြေပြုအမြောက်တပ်ကလည်း လက်နက်ကြီးပစ်ကူပေးနေတယ်လို့ သိရပါတယ်။
ဖယ်ခုံဘက်ကနေ လက်နက်ကြီးနဲ့ ထီးရီး၊ ရေပူ၊ နန်းတုတ်၊ ကုန်းသာ၊ ဟိုပန်၊ တောင်ပို့ကွဲရွာတွေကို နေ့စဉ်နီးပါး ပစ်ခတ်နေလို့ ရွာသူရွာသားတွေထွက်ပြေးတိမ်းရှောင်နေရပါတယ်။
ဖယ်ခုံဘက်မှာ တိုက်ပွဲတွေပြင်းထန်နေလို့ လွိုင်ကော်ဘက်က လမ်းအချို့ကို တော်လှန်ရေးတပ်တွေက ပိတ်ထားသလို ညောင်ရွှေဘက်မှာလည်း စစ်ကောင်စီနဲ့လက်အောက်ခံ PNA ပြည်သူ့စစ်က ပေါင်းပိန်းဂိတ်မှာ ပြည်သူတွေရဲ့ ကားတွေကိုချောဆွဲပြီး ပျားပင်၊ မိုင်းသောက်နဲ့ ကန်အရှေ့ပတ်လမ်းတွေမှာ စစ်ဆေးရေး အထူးတင်းကြပ်နေတယ်လို့ သိရပါတယ်။
ပြီးခဲ့တဲ့ ဧပြီလ ၄ ရက်က နမ့်ဘွန်ကနေ စစ်ကြောင်းထိုးလာတဲ့ စစ်ကောင်စီနဲ့ လက်အောက်ခံ PDF တွေကို တော်လှန်ရေးတပ်ဖွဲ့တွေက သတ်ကွင်းအတွင်း တိုက်ခံရလို့ ပြည်သူ့စစ် ၇ ဦး သေဆုံးခဲ့ပါတယ်။
လက်ရှိမှာ လွိုင်ကော်ကို ပြန်လည်ထိုးဖောက်ဖို့ ကလော တပ်မ-၅၅ မှာ ထိုင်ခဲ့တဲ့ စစ်ကောင်စီရဲ့ဒုချုပ်ဟာ မော်လမြိုင်မှာ ဒရုန်းဗုံးထိပြီးဒဏ်ရာ အပြင်းအထန်ရထားလို့ ရှမ်းတောင်နဲ့ကယား စစ်မြေပြင်ကို မကြီးကြပ်နိုင်သလို မြဝတီမှာ အကြီးအကျယ်ရှုံးနိမ့်နေတဲ့ စစ်ကောင်စီကို ပိုမို အနိုင်ရဖို့၁၁၁၁ စစ်ဆင်ရေးကို အားဖြည့် အင်အားတွေနဲ့ တိုက်ပွဲတွေကို တိုးမြင့်တိုက်ခိုက်နေတာလို့ သိရပါတယ်။
MK-012
