မဲခေါင်၊ ဇန်နဝါရီ ၁၉
ပဲခူးတိုင်း ဒေသကြီး၊ ပဲခူးမြို့ထွက်၊ ကလိစစ်ဆေးရေးဂိတ်ကို ဇန်နာဝါရီလ ၁၇ ရက် ည ၉ နာရီခွဲအချိန်လောက်က ပဲခူးမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)နဲ့ ဒိုက်ဦး ကာကွယ်ရေးတပ် (DDF) တို့က မိုင်းဆွဲ တိုက်ခိုက်ခဲ့တယ်လို့ အဖွဲ့တာဝန်ရှိသူတွေက ပြောပါတယ်။
မိုင်း ၂ လုံးနဲ့ ဖောက်ခွဲ တိုက်ခိုက်ခဲ့ပြီးနောက် စစ်ကောင်စီတပ်သား ၂ ဦးနဲ့ ရဲတပ်သား တစ်ဦးတို့ ပြင်းထန်ဒဏ်ရာ ရရှိခဲ့ပြီး ညတွင်းချင်း ရန်ကုန်တိုင်း ဒေသကြီး၊ မင်္ဂလာဒုံ စစ်ဆေးရုံကို ပို့ဆောင်လိုက်ရတယ်လို့ ဆိုပါတယ်။
စစ်ဆေးရေးဂိတ်နဲ့ နီးစပ်သူ တစ်ဦးက “ပေါက်ကွဲသံကြားပြီး လူနာတင်ကားတွေ ရောက်လာတယ်။ ၃ ရောက်ထိပြီလို့ အော်သံတွေ ကြားတယ်။ ဒဏ်ရာက တော်တော်ပြင်းပုံ ရတယ်” လို့ ပြောပါတယ်။
ဆင်ဖြူကွင်း လမ်းထိပ်မှာ ဘယ်ရီကားရပ်ထားပြီး ကုန်ကားတွေကို ပိုက်ဆံကောက်နေတဲ့ ကလိစစ်ဆေးရေးဂိတ်နဲ့ အမှတ် ၂ နယ်မြေ ရဲစခန်းဟာ ဒီဇင်ဘာလ ၃၁ ရက်နေ့ မနက် ၅ နာရီလောက်တုန်းကလည်း မိုင်းဆွဲ တိုက်ခိုက်ခံရဖူးပါတယ်။
အဲဒီ တိုက်ခိုက်မှုတုန်းက စစ်ကောင်စီတပ်သား ၂ ဦး ပွဲချင်းပြီး သေဆုံးခဲ့ပြီး ၂ ဦးပြင်းထန် ဒဏ်ရာ ရရှိခဲ့ပေမယ့် လုံခြုံရေး အင်အားတိုးချထားတာမျိုး မရှိခဲ့တာကြောင့် အခုလို ဒုတိအကြိမ် တိုက်ခိုက်ခံရတာလို့ တပ်တွင်း သတင်းအရင်းအမြစ် တစ်ဦးက သုံးသပ်ပါတယ်။
“ဒဏ်ရာရတာတော့ သတင်းတက်နေကြပြီ။ တပ်ဘက်ကတော့ ထိခိုက်သူ မရှိဘူးလို့ သတင်းထုတ်ထားတယ်။ ဒုတိယ တစ်ခေါက် ခံရတာဆိုတော့ တော်တော်ကို ပေါ့ဆလို့ ဖြစ်တာ။ အင်အားတိုးဖို့ကလည်း အထက်အမိန့် မကျသေးဘူး ထင်တယ်”
မိုင်းဆွဲ တိုက်ခိုက်မှုအပြီးမှာ တော်လှန်ရေး အင်အားစုတွေဘက်က တစ်စုံတစ်ရာ ထိခိုက်မှု မရှိဘဲ ပြန်လည် ဆုတ်ခွါနိုင်ခဲ့တယ်လို့ ပဲခူးမြို့နယ် ပကဖနဲ့ DDF တပ်ဖွဲ့တို့က ထုတ်ပြန်ထားပါတယ်။
လတ်တလောမှာ တပ်မ ၆၆၊ ၇၇ လက်အောက်ခံ တပ်ရင်းတွေနဲ့ ပျူစောထီး ပူးပေါင်းတပ်တွေဟာ ပဲခူးမြို့အတွင်း ကင်းလှည့် စစ်ဆေးနေတယ်လို့ မြို့ခံတွေက ပြောပါတယ်။
CJ-007
#MeKongNews
#စစ်ကောင်စီ
#ပဲခူး
#ကလိ
#စစ်ဆေးရေး