မဲခေါင်၊ ဧပြီ ၈
ရှမ်းပြည်တောင်ပိုင်း၊ နမ့်စန်မှာစစ်မှုထမ်းဖို့ မူးယစ်ဆေးဝါး သုံးစွဲတဲ့သူတွေကို စစ်ကောင်စီတပ်ဖွဲ့က လိုက်လံခေါ်ဆောင်ပြီး စစ်သင်တန်းပေးနေတယ်လို့ နမ့်စန်မြို့ခံတစ်ဦးက ပြောပါတယ်။
နမ့်စန်မြို့ပေါ်မှာ စစ်မှုထမ်းဖို့ တစ်ရပ်ကွက်နှစ်ယောက်နှုန်းနဲ့ မဲနှိုက်ရမှာဖြစ်တာကြောင့် လူငယ်တချို့ တိမ်းရှောင်မှုတွေရှိခဲ့ပါတယ်။ ဒီအခြေအနေတွေကြောင့် စစ်ကောင်စီဟာ မူးယစ်ဆေးဝါး သုံးစွဲသူတွေကို စစ်မှုထမ်းဖို့ ပစ်မှတ်ထားလာတာပါ။
“ ဒီအသုတ်မှာတော့ မူးယစ်သုံးတဲ့သူတွေကို စစ်သင်တန်းပေးမှာ၊ နောက်အသုတ်တွေမှာတော့ တစ်ရပ်ကွက်ကို ၂ ယောက်သွားရမယ်တဲ့ ပြီးခဲ့တဲ့လကတည်းက မူးယစ်သုံးတဲ့သူတွေကိုခေါ်တယ်။ ရပ်ကွက်အုပ်ချုပ်ရေးတွေနဲ့ လိုက်ခေါ်တယ် လူအယောက် ၃၀ ကျော်လောက်ရတယ်” လို့ နမ့်စန်မြို့ခံတစ်ဦးက မဲခေါင်ကိုပြောပါတယ်။
မူးယစ်ဆေးဝါးသုံးစွဲတဲ့သူတွေကို နမ့်စန်က စစ်ကောင်စီတပ်မှာ မူးယစ်ဆေးအရင်ဖြတ်ပြီး သင်္ကြန်ပြီးမှာ စစ်သင်တန်းပေးမှာလို့ သူက ဆက်ပြောပါတယ်။
ကျေးရွာတွေမှာလည်းစစ်မှုထမ်းဖို့အတွက် အစည်းအဝေးလုပ်ခဲ့ပေမဲ့ မူယစ်သုံးစွဲတဲ့သူတွေကို အရင်ခေါ်ဆောင်သွားမယ်လို့ နောက်ထပ်ဒေသခံ အမျိုးသားတစ်ဦးက ပြောပါတယ်။
“ ကျေးရွာသူကြီး ဥက္ကဌတွေကို စစ်ကောင်စီအဖွဲ့တွေလာပြောတာရှိတယ်။ လူတွေမပေးနိုင်သေးရင် မူယစ်သုံးတဲ့သူတွေကို အရင်စုပေးတဲ့ သုံးတဲ့သူတွေကို မူယစ်မသုံးအောင်သူတို့ဖျက်ပေးမယ်တဲ့။ ရွာကလူတွေတစ်ချို့က မဟုတ်မှတ်နေတယ်။ တစ်ချို့မူယစ်သုံးတဲ့သူတွေက ကြောက်လို့ ထွက်ပြေးတာရှိတယ်” လို့ မဲခေါင်ကိုပြောပါတယ်။
နမ့်စန်မှာ လက်နက်ကိုင်တပ်ဖွဲ့တွေများတာကြောင့် တစ်ချို့မိသားစုတွေဟာ ပြည်သူစစ်တပ်နဲ့ ရှမ်းပြည်ပြန်ထည်ထူထောင်ရေးကောင်စီ RCSS တပ်ဖွဲ့ထံ စစ်မှုထမ်းဖို့ ဝင်ရောက်သွားသူတွေ ရှိကြတယ်လို့ ဆိုပါတယ်။
စစ်ကောင်စစ်ရဲ့ စစ်ဥပဒေကြောင့် နမ့်စန်မြို့မှာ ထွက်ပြေးနေတဲ့လူငယ်တွေကို ပြန်လာဖို့ စစ်ကောင်စီက မတ်လ ၁၈ ရက်မှာ ထုတ်ပြန်ပါတယ်။
MK 011