မဲခေါင်၊ မတ် ၂၁
ရှမ်းပြည်တောင်ပိုင်း၊ ပင်လောင်းနဲ့ဖယ်ခုံကြားက ဆောင်းပြောင်း တိုက်ပွဲတွေ ပြင်းထန်စွာဖြစ်ပွားနေသလို စစ်ကောင်စီဘက်အကျအဆုံးများတဲ့အတွက် စစ်ကောင်စီ ဒုကာချုပ်ကိုယ်တိုင် တပ်မ-၅၅ မှာထိုင်ပြီး ကိုယ်တိုင်ဦးစီးနေတယ်လို့ စစ်ရေးအရင်းအမြစ်တွေထံက သိရပါတယ်။
မတ်လ ၂၀ ရက် မှာ KNDF နဲ့ PDF ပူးပေါင်းတပ်တွေက စစ်ကြောင်း ၃ကြောင်းနဲ့ ဆောင်းပြောင်း-တောင်မဲသင်းလမ်းခွဲ အရှေ့ဘက်၊ တောင်ဘက်ကနေ ဆောင်းပြောင်းမှာ တပ်စွဲထားတဲ့ စစ်ကောင်စီတပ်ကို လာရောက်ထိုးစစ်ဆင်ရာမှာ မနက် ၁၀ နာရီလောက်က တိုက်ပွဲတွေပြင်းထန်စွာဖြစ်ပွားခဲ့တယ်လို့ ဒေသအရင်းအမြစ်တွေထံက သိရပါတယ်။
စစ်ကောင်စီဖက်က နေ့လည် ၁၂ နာရီခွဲလောက်မှာ ရဟတ်ယာဉ်ပစ်ကူလာပြီးတဲ့နောက် လက်နက်ကြီး ပစ်ခတ်နေတာရှိပြီး တိုက်ပွဲငြိမ်သွားတယ်လို့ သိရပါတယ်။
“ဟိုဖက်တော့ အထိအခိုက်မသိရပေမယ့် ကျတာတွေရှိတယ်လို့ကြားတယ်၊ ဒီဖက်တော့ ကား ၂ စီးနဲ့ သေဆုံးဒဏ်ရာရတာတွေ အပြည့်သယ်ပြီး အမြန်မောင်းသွားတာတွေ့တယ်” ဟု အောင်ပန်းကို ဆောင်းပြောင်းက စစ်ရှောင်လာသူ ၁ ဦးက မဲခေါင်ကိုပြောပါတယ်။
ဆောင်းပြောင်းရွာသားတွေဟာ ထီဗီဘက်ကို စစ်ဘေးရှောင်ပေမယ့် ညနေ ၄ နာရီလောက်မှာ ထီဗီရွာတောင်ဘက်ကို လက်နက်ကြီး ၃ လုံးကျလာလို့ ညောင်ရွှေကနေ အောင်ပန်းဘက်ကို ထပ်ရှောင်ရတယ်လို့ ပြောပါတယ်။
“ဒီမှာလဲ ဒုကာချူပ်ကိုယ်တိုင် ခုတင် ၇၀၀ စစ်ဆေးရုံကို လာတာသိရတယ်၊ ဒဏ်ရာရတာ ရာနဲ့ချီတယ်လို့လဲကြားတယ်၊ ဒီမှာတောင် ရဲတကက ကနေ ငြိမ်းထားတဲ့ မြင့်တင်တောင် ရာထူးတိုး ကြယ်ကြီးတပ်ပြီး သေနတ်နဲ့ လူကြီးလမ်းကြောင်းယူပေးနေတာတွေ့ရတယ်၊ တပ်မ ၅၅ ထဲမှာ ဒုကာချုပ်ရောက်နေတယ်လို့လဲ ကြားတယ်၊ ခုတင် ၇၀၀ ကိုတော့ စစ်ကားတွေ အဝင်အထွက်များနေတယ်၊ လုံခြုံရေးလဲ အရင်ထက် ပိုချထားတာတွေ့ရတယ်” လို့ အောင်ပန်းဒေသခံတစ်ဦး က မဲခေါင်ကို ပြောပါတယ်။
ပြီးခဲ့သည့် ဇန်နဝါရီလ ၂၁ ရက် ဟိုပုံးမြို့နယ်၊ စံဖူး(လုံးဟီး)က စခဲ့တဲ့ ပအိုဝ်းဒေသတိုက်ပွဲတွေဟာ ယနေ့ ၂ လပြည့်တဲ့ မတ်လ ၂၁ ရက်မှာတော့ ဆီဆိုင်ကို စစ်ကောင်စီပြန်မရသေးတဲ့အပြင် ဟိုပုံး၊ မိုင်းပန်၊ လွိုင်လင်၊ မောက်မယ်နဲ့ပင်လောင်းဘက်တွေကို စစ်ဘောင်ကျယ်ပြန့်လာနေတာ မှာ အခု ရှမ်းကယားနယ်စပ် ဖယ်ခုံဘက်မှာ တိုက်ပွဲတွေ ပြင်းထန်လာနေတာဖြစ်ပါတယ်။
PNLO တပ်ဖွဲ့တွေနဲ့အတူ PNDF(KK) အပါအဝင် အတည်မပြုနိုင်သေးပေမယ့် မြေပြင်သတင်းတွေအရ ရှမ်းမြောက်မှာတိုက်ပွဲဝင်ခဲ့တဲ့ BPLA တပ်ဖွဲ့တွေလဲ ရှမ်းတောင် စစ်မြေပြင်မှာ ပါဝင်တိုက်ခိုက်နေတယ်လို့ သိရှိရပါတယ်။
ကရင်နီပြည်နယ် ၁၁၁၁ စစ်ဆင်ရေးရဲ့ ဆက်စပ်တိုက်ပွဲတွေအရ ပင်လောင်းနဲ့ဖယ်ခုံမြို့ကြား တိုက်ပွဲတွေ ပြင်းထန်နေတယ်လို့ KNDF ကထုတ်ပြန်ထားပါတယ်။
ယင်း မိုးဗြဲ-ဖယ်ခုံ ဒေသအတွင်း တိုက်ပွဲတွေမှာ အလယ်ပိုင်းတိုင်းစစ်ဒေသ၊ ရှမ်းတောင်ဗျူဟာ(၁) တပ်ရင်းတွေဖြစ်တဲ့ ၁၀၀၁ MB-1၊ ၁၀၀၂ PK-1၊ ၁၀၀၆ PK-2၊ ၁၀၀၇ MB-2 ၊ ၁၀၀၄ PKS-PDF နဲ့ ရှမ်းတောင်ဗျူဟာ(၂) တပ်ရင်းတွေဖြစ်တဲ့ ၁၀၀၃၊ ၁၀၀၅။ ၁၀၀၈ ၊ ၁၀၀၉ IPDF၊ ၁၀၁၁ တပ်ရင်းတွေ အပြင် KNDF ဗျူဟာ(၁) တပ်ရင်းတွေဖြစ်တဲ့ KNDF BO-3 ၊ KNDF B)-11 ၊ KNDF BO-22 ၊ နဲ့ မြို့ပြတော်လှန်ရေးတပ်ဦး URF ၊ ခုခံတော်လှန်ရေးအင်အားစု တွေပါဝင်နေတယ်လို့ သိရပါတယ်။
ယမန်နှစ် ဧပြီလကသြဂုတ်လအထိ တိုက်ပွဲဖြစ်ပွားခဲ့ပြီး ယခုမတ်လ ၁၇ ရက်မှာတကျော့ပြန်ဖြစ်ပွားလာတဲ့ တိုက်ပွဲတွေကို နေပြည်တော်ကို အနီးဆုံးရောက်နိုင်တဲ့ တံခါးပေါက်ဖြစ်တဲ့ လွိုင်ကော်နဲ့ ပအိုဝ်းဒေသ မကျရေး ဒုကာချုပ်ကိုယ်တိုင်လာရောက်ဦးစီးနိုင်တာဖြစ်နိုင်တယ်လို့ စစ်ရေးသုံး သပ်နေသူတွေက သုံးသပ်နေကြပါတယ်။
MK-012