မဲခေါင်၊ ဖေဖော်ဝါရီ ၂၂

ရှမ်းပြည်တောင်ပိုင်း၊ ဆီဆိုင်မြို့အတွင်း ပိတ်မိနေဆဲဖြစ်တဲ့ ခေါင်းဒဏ်ရာရသူအပါအဝင် ပြည်သူ ၂၀ ဦးခန့်ကို ကယ်ထုတ်ရန်အတွက် ကားအခက်အခဲရှိနေတယ်လို့ ဆီဆိုင်စစ်ဘေးရှောင်တွေကို ကူညီနေတဲ့ အဖွဲ့ဝင်တစ်ဦးက မဲခေါင်သတင်းဌာနကို ပြောပါတယ်။

သူတို့ဟာ ဆီဆိုင်မြို့မှာ တိုက်ပွဲတွေစဖြစ်ခဲ့တဲ့ အချိန်က ယာဉ်ကားမရှိသူတွေ၊ ငွေကြေးမတတ်နိုင်သူတွေ၊ တိုက်ပွဲတွေကို ခဏလို့ပဲ ယူဆသူတွေဟာ ဆီဆိုင်မြို့က အဝေးကို ထွက်မပြေးပဲ အနီးအနား တောတောင်တွေမှာ ပုန်းခိုရင်း ကျန်ရှိနေခဲ့ကြတာလို့ သိရပါတယ်။

ယမန်နေ့ ဖေဖော်ဝါရီ ၂၁ ရက်က နောက်ကျောမှာပြင်းထန်ဒဏ်ရာရနေတဲ့ အမျိုးသမီး ၁ ဦးနဲ့ ၁၃နှစ်အရွယ်မိန်းကလေးငယ်တ ၁ ဦး မိသားစုဝင် ၁ ဦး ကို ကားဝင်ခက်လို့ ဆိုင်ကယ်နဲ့ သယ်ထုတ်လာရပြီးနောက် ကားနဲ့တင်ဆောင်ကာ စဝ်စံထွန်းဆေးရုံကို ကယ်ထုတ်တင်ပို့ပြီးတဲ့နောက်မှာ ကျန်ရှိနေသေးတဲ့ ဒဏ်ရာရသူတွေအပါအဝင် ၂၀ ဦးခန့် ကျန်ရှိနေတာဖြစ်တယ်လို့ သိရပါတယ်။

ကျန်ရှိနေသူတွေထဲမှာ ခေါင်းဒဏ်ရာရသူ ၁ ဦးနဲ့ ခြေလက်ဒဏ်ရာရသူ ၃ ဦး၊ လေဖြတ်နေသူ ၁ ဦးနဲ့ ကိုယ်ဝန်ဆောင် ၁ဦးအပြင် သက်ကြီးရွယ်အို၊ ကလေးငယ်တွေ စုစုပေါင်း ဆီဆိုင်မြို့ သီရိရပ်ကွက်က ပြည်သူ ၂၀ ဦးလို့သိရပါတယ်။

ကျနော်တို့ သွားခေါ်ပေးလို့ရတယ်၊ လိုတာက ကားနဲ့ဆီ စရိတ်ပဲ၊ သူတို့နေတဲ့နေရာနဲ့မြို့ထဲကို ကားနဲ့ဝင်ရင် အန္တရာယ်ရှိလို့ ဆိုင်ကယ်နဲ့ ဒဏ်ရာရသူ တစ်ယောက်စီကို တင်ပြီး သယ်ထုတ်လာရတာ၊ ခုလဲ ဆိုင်ကယ်တွေနဲ့ထုတ်ပြီး ကားနဲ့တဆင့်ပို့လို့ရတယ်၊ စိုးရိမ်တာက ခေါင်းမှာဒဏ်ရာရနေတဲ့သူနဲ့ လေဖြတ်လူနာတွေပဲ အရင်သယ်ထုတ်ရမှာ၊ ကြာလေ အသက်အန္တရာယ်ရှိလေပဲလို့ လူနာတွေကို ခေါ်ဆောင်ရာမှာ ကိုယ်တိုင်ပါဝင်ခဲ့တဲ့ လူငယ်တစ်ဦးက မဲခေါင်ကို ပြောပါတယ်။

အဓိက တော့ ဒဏ်ရာရသူနဲ့ လေဖြတ်ထားသူကို ဦးစားပေးသယ်ထုတ်ဖို့လိုအပ်နေတာလို့ ဆိုပါတယ်။

မြို့ထဲ ကားဝင်ဖို့ခက်လို့ ဆိုင်ကယ်တွေနဲ့သယ်ထုတ်ပြီး လွတ်တဲ့နေရာတစ်ခုမှာ စုရပ်လုပ်ပြီးကားနဲ့တဆင့် ခေါ်ထုတ်ဖို့ စီစဉ်ထားတယ်လို့ ပြောပါတယ်။

ဆီဆိုင်မြို့ကို ရက်ပိုင်းအတွင်း စစ်ကောင်စီက အင်အားအလုံးအရင်းနဲ့ထိုးစစ်ဆင်မယ့် သတင်းတွေကြောင့် မြို့တွင်းပိတ်မိနေတဲ့သူတွေ အန္တရာယ် ပိုမိုလာနေတဲ့ အခြေအနေဖြစ်လို့ အမြန်ကယ်ထုတ်ဖို့ လိုအပ်နေတာလို့ သူက ပြောပါတယ်။

အလားတူ တိုက်ပွဲတွေကြောင့် ဟိုပုံးက ဂူတစ်ခုထဲ ပိတ်မိနေသူ ၃၀ ဦးကလည်း သူတို့ကို ကူညီကယ်ဆယ်ပေးဖို့ အကူအညီတောင်းခံနေတယ်လို့ ဟိုပုံးမြို့ခံ တစ်ဦးက ပြောပါတယ်။

လတ်တလောမှာ ဟိုပုံး ထမ်ဆမ့်၈ူအနီးနဲ့ မဲနယ်တောင်ကြော၊ မိုင်းပွန် နမ်းဗေးခံးရွာတွေဘက်မှာ တိုက်ပွဲတွေ ပြင်းထန်နေလို့တောင်ကြီး-ကျိုင်းတုံကားလမ်းကို ခရီးသွားတွေ သွားလာခွင့် ပိတ်ထားနေတယ်လို့ သိရှိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)