မဲခေါင်၊ မတ် ၆
ရှမ်းပြည်တောင်ပိုင်း၊ ဆီဆိုင်မြို့ကို ယမန်နေ့ မတ်လ ၅ရက်မှာ စစ်ကောင်စီက လက်နက်ကြီးနဲ့အသေခံဒရုန်း ကြိမ်ရေ ၁၀၀ ကျော်နဲ့ ပစ်ခတ်ဖျက်ဆီးနေတယ်လို့ PNLA ယနေ့ မတ်လ ၆ ရက် မှာ သတင်းထုတ်ပြန်ပါတယ်။
စစ်ကောင်စီပစ်ခတ်တဲ့ လက်နက်ကြီးကြောင့် ဆီဆိုင်မြို့ ဆေးရုံအဆောက်အဦနဲ့ မြို့တွင်း အဆောက်အဦအချို့ ထိခိုက်ပျက်စီးခဲ့တယ်လို့ ဆိုပါတယ်။
အလားတူပဲ စစ်ကောင်စီဟာ မဲနယ်တောင်ဘက်ကိုလည်း ဟိုပုံးမြို့ကနေ လက်နက်ကြီး ၁၈ ကြိမ်ပစ်ခတ်ခဲ့တယ်လို့ PNLA ထုတ်ပြန်ချက်က ဆိုပါတယ်။
ဒါ့အပြင် မဲနယ်တောင်ဒေသမှာ အများပြည်သူသွားလာနေတဲ့ လမ်းတွေကို မြေတူးစက်တွေနဲ့ စစ်ကောင်စီက ဖျက်ဆီးခဲ့လို့ PNLA က ပြင်ဆင်ပေးခဲ့ပြီး ကားတွေ ပြန်သွားလို့ရပြီလို့ ဆိုပါတယ်။
စစ်ကောင်စီတပ်ဟာ ကုန်စည်စီးဆင်းမှုအဓိက ဟိုပုံး-မိုင်းပွန် လမ်းမကြီးကို ဖွင့်ပိတ် လုပ်နေတာဖြစ်လို့ ကုန်သည်နဲ့ ပြည်သူတွေ အခက်အခဲကြုံနေရတယ်လို့ ဆိုပါတယ်။
ဖေဖော်ဝါရီ ၁ ရက် ကနေ ယနေ့အထိ ပြည်တွင်း ကျန်းမာရေးကဏ္ဍအပေါ် စစ်ကောင်စီရဲ့ အကြမ်းဖက်တိုက်ခိုက်မှုပေါင်း ၁၂၀၀ ကျော်ရှိခဲ့ပြီး ဆေးရုံ၊ ဆေးပေးခန်း ပျက်စီးမှု ၃၀၈ ခု၊ ကျန်းမာရေးလုပ်သားတွေ သတ်ဖြတ်ခံရမှု ၁၀၄ ဦးနဲ့ ကျန်းမာရေးလုပ်သားတွေ ထိခိုက်ဒဏ်ရာရမှု ၁၃၆ ဦးရှိခဲ့တယ်လို့ သတင်းတွေအရသိရပါတယ်။
အခုလည်း ဆီဆိုင်မြို့က ပြည်သူတွေ အားထားရတဲ့ ကျန်းမာရေးအဆောက်အဦဆေးရုံကို ပစ်ခတ်တိုက်ခိုက်တာဟာ ဂျနီဗာသဘောတူညီချက်ပါ ဆေးရုံ၊ ဆေးပေးခန်းနဲ့ ဆေးအမှတ်အသားပါ အဆောက်အဦ၊ ယာဉ်၊ လူတွေကို မတိုက်ခိုက်ရဘူးဆိုတာကို ပြောင်ပြောင်တင်းတင်း ချိုးဖောက်နေတဲ့ စစ်ရာဇဝတ်ကျူးလွန်မှုလို့ အထက်မြန်မာပြည် နိုင်ငံရေး အကျဉ်းသားဟောင်းကွန်ရက်ရဲ့ အဖွဲ့ဝင် တစ်ဦးက ဝေဖန်ပြောဆိုလိုက်ပါတယ်။
MK-012