မဲခေါင် ၊ ဇန်နဝါရီ ၁၆

ရှမ်းပြည်နယ်မြောက်ပိုင်းမှာ အပစ်ခတ်ရပ်စဲရေး သဘောတူညီမှုကို လက်မှတ်ရေးထိုးထားပေမယ့် စစ်ကောင်စီတပ်ဖွဲ့ဟာ လေကြောင်း လက်နက်ကြီးတွေနဲ့ နေ့စဉ်တိုက်ခိုက်ပြီး အပစ်ခတ်ရပ်စဲရေးသဘောတူညီမှုကို ပေါ်ပေါ်တင်တင်ချိုးဖောက်နေတယ်လို့ TNLA က ပြောပါတယ်။

မနေ့ညက ထုတ်ပြန်တဲ့ စစ်ရေးအခြေအနေဖော်ပြချက်မှာ TNLA ကအဲ့ဒီလို ပြောဆိုထားတာဖြစ်ပါတယ်။ ဇန်နဝါရီလ ၁၁ ရက်နေ့မှာ အပစ်ရပ်ဖို့ သဘောတူညီခဲ့ပေမယ့် စစ်ကောင်စီဟာ နေ့စဉ်နေ့တိုင်း မရပ်မနား တိုက်ခိုက်မှုတွေကို ဆက်လက်ပြုလုပ်နေတာဖြစ်တယ်လို့ TNLAကပြောပါတယ်။

မနေ့မှာ ထိတွေ့တိုက်ပွဲဖြစ်ပွားမှုမရှိဘဲ စစ်ကောင်စီရဲ့ ကျောက်မဲမြို့နယ်ရှိ ၅၀၂ တပ်စခန်းဟာ ပါးပုတ်ကျေးရွာကို လက်နက်ကြီးနဲ့ ၄ ကြိမ် ပစ်ခတ်တိုက်ခိုက်ခဲ့တယ်လို့ TNLA ကဆိုပါတယ်။

ဒါအပြင် ကျောက်မဲမြို့နယ်ရှိ စစ်ကောင်စီတပ်ဟာ သံဘိုရွာအနီးတဝိုက်ကိုလည်း နေ့လည် ၂ နာရီ ၁၅ မိနစ်အချိန်မှာ လက်နက်ကြီးနဲ့ (၅)ကြိမ် ပစ်ခတ်တိုက်ခိုက်ခဲ့ပါတယ်။

မနေ့ ၁၂ နာရီအချိန်မှာလည်း နောင်ချိုမြို့နယ် အုမ္မတီးလမ်းခွဲမှာ တပ်စွဲထားတဲ့ စစ်ကောင်စီတပ်ဟာ သုံးဆယ်ရွာကို လက်နက်ကြီးနဲ့ (၃)ကြိမ် ပစ်ခတ်တိုက်ခိုက်ခဲ့တယ်လို့ ထုတ်ပြန်ချက်မှာဖော်ပြထားပါတယ်။

TNLA ရဲ့ တပ်မဟာ(၅)စစ်ဒေသ၊ ကွတ်ခိုင်မြို့နယ် မိုင်းယုလေး၊ လွယ်ကန်၊ လွယ်ကုန်ရွာအနီးတဝိုက်ကိုလည်း စစ်ကောင်စီတပ်က Mi35 တိုက်ခိုက်ရေးရဟက်ယာဉ်နဲ့ (၁)ကြိမ် လာရောက်ပစ်ခတ်တိုက်ခိုက်ခဲ့တယ်လို့ TNLA က ဆိုပါတယ်။

ပြီးခဲ့တဲ့ ဇန်နဝါလရီလ ၁၁ ရက်နေ့မှာ အပစ်ခတ်ရပ်စဲရေးလက်မှတ် ထိုးခဲ့ပြီးနောက် ဇန်နဝါရီလ ၁၅ ရက်နေ့အထိ စစ်ကောင်စီတပ်ဟာ တအာင်းတပ်မတော် PSLF/TNLA တည်ရှိရာ ကျောက်မဲ၊ မိုးကုတ်၊ လားရှိုးမြို့နယ်သို့ နေ့စဉ် လက်နက်ကြီးနဲ့ ပစ်ခတ်တိုက်ခိုက်လျက်ရှိပြီး စစ်ကောင်စီရဲ့ လုပ်ရပ်ဟာ အပစ်ခတ်ရပ်စဲရေးလက်မှတ်ကို နေ့စဉ်အကြိမ်ကြိမ် ပေါ်ပေါ်တင်တင်ချိုးဖောက်ခြင်းဖြစ်တယ်လို့ TNLA ကပြောပါတယ်။

ရှမ်းပြည်နယ်မြောက်ပိုင်းမှာ ၁၀၂၇ စစ်ဆင်ရေးအတွင်း တအာင်းတပ်မတော် TNLA ဟာ မြို့ ၇ မြို့ထက်မနည်းကို သိမ်းပိုက်နိုင်ခဲ့ပြီး လက်ရှိအချိန်မှာ အုပ်ချုပ်စီမံရေးယန္တရားများ သက်ဝင်လည်ပတ်အောင် ဆောင်ရွက်နေလျက်ရှိပါတယ်။

CJ-002

#MeKongNews

#TNLA

#ချိုးဖောက်

#အပစ်ရပ်

#လက်နက်ကြီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)