မဲခေါင်၊ နိုဝင်ဘာ ၁၆

မွန်ပြည်နယ်၊ ကျိုက်မရောမြို့နယ်၊ ချောင်းနှစ်ခွကျေးရွာ၊ နယ်မြေရဲစခန်းနဲ့ တံတားဂိတ်စခန်းကို တော်လှန်ရေး ပူးပေါင်းတပ်တွေ တိုက်ခိုက်ခဲ့ရာ ၆ ရက်တာအတွင်း စစ်တပ်ဘက်က ၂၈ ဦး အညံ့ခံ လက်နက်ချခဲ့ပြီး လက်နက်မျိုးစုံ ၅၅ လက် သိမ်းဆည်းရမိ ခဲ့တယ်လို့ သိရပါတယ်။

အဆိုပါ တိုက်ပွဲအတွင်း KNLA၊ PDF ပူးပေါင်းစစ်ကြောင်းတွေနဲ့ ဒရုန်းတပ်ဖွဲ့ဘက်က ရဲဘော် ၃ ဦး ကျဆုံးခဲ့ပြီး ၁၀ ဦး ထိခိုက်ဒဏ်ရာ ရခဲ့တယ်လို့ အထူးစစ်ဆင်ရေးတပ်ဖွဲ့ S.O.F က ဒီနေ့ မနက် ထုတ်ပြန်ပါတယ်။

“ချောင်းနှစ်ခွ တံတားဂိတ်စခန်း ကတော့ လုံးဝ ကျသွားတယ်။ တံတားရော လမ်းပိုင်းရော အဲ့ဒီမှာအခု တိုက်ပွဲ ကလည်း မပြီးသေးဘူးလို့ ပြောရမှာပေါ့။ သူတို့ စစ်ကြောင်းကလည်း အခု စစ်ကြောင်းထိုးလာတဲ့ အခြေအနေ ရှိတယ်။ ချောင်းနှစ်ခွ ရဲစခန်းမှာလည်း တိုက်ပွဲ ဆက်ဖြစ်နေဆဲပဲ ပေါ့နော်” လို့ S.O.F တပ်ဖွဲ့ ပြန်ကြားရေး တာဝန်ခံက မဲခေါင်သတင်းဌာနကို ပြောပါတယ်။

KNLA နဲ့ PDF တော်လှန်ရေး ပူးပေါင်းတပ်ဖွဲ့တွေဟာ နိုဝင်ဘာ ၁၀ ရက်နေ့ကစပြီး ချောင်းနှစ်ခွ နယ်မြေရဲ စခန်းနဲ့ တံတား ဂိတ်စခန်းကို ထိုးစစ်ဆင် တိုက်ခိုက်ခဲ့တာ ဖြစ်ပါတယ်။

နိုဝင်ဘာ ၁၁ ရက်နေ့၊ ည ၁၂ နာရီမှာတော့ အဆိုပါ စခန်း ၂ ခုကို စစ်ကူလာတဲ့ တပ်မ (၂၂) လက်အောက်ခံ ခလရ (၈၁) စစ်ကောင်စီစစ်ကြောင်းနဲ့ S.O.F စစ်ကြောင်း ဖက်ထေးကုန်းရွာ သင်္ချိုင်းအနီး တိုက်ပွဲ ဖြစ်ပွားခဲ့ပြီး စစ်တပ်ဘက်က ၃ ဦးသေဆုံးကာ ၇ ဦး ဒဏ်ရာပြင်းထန်ခဲ့ကာ ခဲယမ်းကျည်တွေ သိမ်းဆည်းရမိခဲ့ပါတယ်။

နိုဝင်ဘာ ၁၂ ရက်နေ့၊ မနက် ၈ နာရီခွဲကစပြီး ဘုရားကုန်း အနီးမှာ နေရာယူထားတဲ့ အင်အား ၅၄ ဦးပါ စစ်ကောင်စီ စစ်ကြောင်းနဲ့ တနေကုန် တိုက်ပွဲ ပြင်းထန်ခဲ့ရာ စစ်တပ်ဘက်က ဗိုလ်မှူး တစ်ဦးနဲ့ ဒုဗိုလ်ကြီး ၂ ဦး စနိုက်ပါ ထိမှန် သေဆုံးခဲ့တယ်လို့ S.O.F တပ်ဖွဲ့က ပြောပါတယ်။

နိုဝင်ဘာ ၁၃ ရက်နေ့မှာတော့ ဖက်ထေးကုန်းကျေးရွာထဲက ဘုရားကုန်းမှာ တိုက်ပွဲ ဆက်လက် ပြင်းထန်ခဲ့ရာ စစ်တပ်ဘက်က ဗိုလ်မှူး တစ်ဦး၊ ဒုဗိုလ် ၂ ဦး အပါအဝင် ၁၄ ဦးသေဆုံးခဲ့ပြီး ၂၈ ဦး လက်နက်ချ အညံ့ခံကာ ၁၂ ဦးကတော့ ဆုတ်ခွာ ထွက်ပြေးသွားတယ်လို့ S.O.F ကထုတ်ပြန်ပါတယ်။

ချောင်းနှစ်ခွတံတား ဂိတ်စခန်းကို နိုဝင်ဘာ ၁၃ ရက်နေ့၊ ညနေ ၃ နာရီခွဲမှာ တော်လှန်ရေး မဟာမိတ်တပ်တွေ အပြီး သိမ်းပိုက်နိုင်ခဲ့ပြီး ချောင်းနှစ်ခွရွာဘက် စစ်ကြောင်းထိုးလာတဲ့ စစ်ကောင်စီတပ်ကို ချေမှုန်းကာ လက်နက်ချ အညံ့ခံသူတွေ ရှိခဲ့ကြောင်းကို ဗိုလ်အယ်စေးဝါး ဦးဆောင်တဲ့ Lion Battalion Commando Special Force ဗျူဟာစစ်ကြောင်း တပ်ခွဲ (၃) က နိုဝင်ဘာ ၁၄ ရက်မှာ ရုပ်သံနဲ့တကွ ထုတ်ပြန်ပါတယ်။

မနေ့က နိုဝင်ဘာ ၁၅ ရက်နေ့ ညပိုင်းမှာလည်း ချောင်းနှစ်ခွ တံတား တိုက်ပွဲအတွင်း ထွက်ပြေးခဲ့တဲ့ စစ်ကောင်စီတပ်ကို ထပ်မံ ပိတ်ဆို့ ရှင်းလင်းရာ စစ်တပ်ဘက်က ၅ ဦး သေဆုံးပြီး လက်နက်တွေ ထပ်မံ သိမ်းဆည်း ရရှိခဲ့တယ်လို့ ဆိုပါတယ်။

လက်ရှိ စစ်ကောင်စီတပ်က ချောင်းနှစ်ခွဘက်ကို ဆက်လက် စစ်ကြောင်းထိုးနေပြီး ‌ချောင်းနှစ်ခွကျေးရွာ အပါအဝင် အနီးဝန်းကျင်က ကျေးရွာတွေနဲ့ လမ်းတွေကို တောင်ကလေး ရဲစခန်းကနေ ၁၂၀ မမ လက်နက်ကြီးနဲ့ အဆက်မပြတ် ပစ်ခတ်နေတယ်လို့ သိရပါတယ်။

စစ်တပ်ဘက်က လက်နက်ကြီး၊ လေကြောင်း ပစ်ခတ်မှုတွေကြောင့် ချောင်းနှစ်ခွနဲ့ ဖက်တေးကုန်းကျေးရွာ ဒေသခံ တွေဟာ နီးစပ်ရွာ ကျေးရွာ ဘုန်းကြီးကျောင်းနဲ့ မြို့တွေကို ထွက်ပြေးခိုလှုံနေရပြီး လူသားချင်း စာနာမှုဆိုင်ရာ အကူအညီတွေ လိုအပ်နေတယ်လို့ ဒေသတွင်း လူမှုကူညီရေးအဖွဲ့တွေက ပြောပါတယ်။

MK -009

#MeKongNews

#ချောင်းနှစ်ခွ

#KNLA

#လက်နက်ချ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)