မဲခေါင်၊ မတ် ၇
ရှမ်းပြည်မြောက်ပိုင်း၊ ကျောက်မဲမြို့မှာ စစ်ကောင်စီ၊ SSPP နဲ့ TNLA တို့ ၃ ပွင့်ဆိုင် စစ်ရေးပြင်ဆင်မှုများပြုလုပ်နေပြီး SSPP က ကျောက်မဲမြို့ပေါ် အထိ ယူနီဖောင်းအပြည့်အစုံနဲ့ ဝင်ရောက်အခွန်ကောက်ခံနေတယ်လို့ သိရပါတယ်။
ကျောက်မဲမြို့အခြေစိုက် စကခ(၁)နဲ့ ခမရ ၅၀၁ ၊ ၅၀၂ တွေ မှာ လိုက်ကျင်း၊ ကတုတ်ကျင်းတွေကို ဘက်ဟိုးများနဲ့ အခိုင်အမာပြင်ဆင်တူးဖော်နေသလို ကျောက်မဲမြို့ပတ်ဝန်းကျင်နဲ့အနီးတဝိုက် မန္တလေး-မူဆယ် ပြည်ထောင်စုလမ်းမြောက်ဘက် ဧရိယာအများစုမှာ TNLA က စစ်ရေးပြင်ဆင်နေကာ လမ်းတောင်ဘက်ခြမ်းနဲ့ ယခင် ခလရ ၂၂ နောက် ပြောင်းရွှေ့သွားတဲ့ အမြောက်တပ်ရှိနေရာမှာ SSPP ကဝင်ရောက်နေပြီး စစ်ရေး အခိုင်အမာတည်ဆောက်နေတာ ရက်ပိုင်းအတွင်း အင်အားရာချီ ရောက်ရှိနေတယ်လို့ ဒေသခံတွေက ပြောပါတယ်။
SSPP ဟာ ကွမ်းယာဆိုင်ကအစ ရွှေဆိုင်အဆုံးမြို့ပေါ်ကို ယူနီဖောင်းလက်နက်အပြည့်အစုံ၊ ကားတွေနဲ့ ဝင်ရောက်ပြီး စာရင်းတွေကောက်ယူကာ အခွန်ဖြတ်ပိုင်းတွေ ပေးသွားတယ်လို့သိရပါတယ်။
အခွန်သွားပေးရတာက ကျောက်မဲအနောက်ဖက် မိုးကုတ်-ကျောက်မဲလမ်း ကျောက်မဲက ၇ မိုင်အကွာက မိုင်းတင်းရွာမှာ သွားပေးရတာ၊ ရွှေဆိုင်စာရင်းတွေ၊ မြေအရောင်းအဝယ်ပြုလုပ်သူတွေ စာရင်းအားလုံးကောက်သွားတယ်၊ TNLA ကတော့ ကောက်တာမတွေ့ရဘူးလို့ ဒေသခံတစ်ဦး က ပြောပါတယ်။
သူကိုယ်တိုင်လည်း ဆိုင်အတွက် ကျပ် ၂၅ သိန်း ပေးဆောင်ခဲ့ရပြီး ၂၀၂၄ ခုနှစ် ၁ နှစ် စာဖြစ်တယ်လို့ ပြောပါတယ်။
ကျောက်မဲအထိုင်ချ အမြောက်တပ်နဲ့ဒုံးတပ်ဟာ နောင်ချို၊ မိုင်းငေါ့ ဘက်ကို လက်နက်ကြီးနဲ့ နေ့စဉ်လိုပစ်ခတ်နေတာမှာ ယမန်နေ့ မတ်လ ၅ ရက်က မိုင်းငေါ့က ခေါက်ဆွဲစက်တစ်ခုကိုထိမှန်လို့ ပျက်စီးခဲ့တယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၂၄/၂၅/၂၆ ရက်တွေကလည်း စစ်ကောင်စီအမြောက်တပ်က ပစ်ခတ်လို့ နောင်ချိုမြို့နယ်၊ သုံးဆယ်ရွာကနေအိမ် ၁လုံးနဲ့ ဆမ္မဆယ်ရွာက ဒေသခံတွေထွက်ပြေးတိမ်းရှောင်ရတာ ရှိခဲ့သလို အသက် ၅၀ အရွယ် အမျိုးသား ၁ ဦး လက်နက်ကြီးထိမှန်သေဆုံးခဲ့ရတယ်လို့ သိရပါတယ်။
လက်ရှိအခြေအနေမှာ TNLA က ၁၀၂၇ စစ်ဆင်ရေးအတွင်း သိမ်းပိုက်ခဲ့တဲ့ မြို့ ၃ မြို့ကို စစ်ကောင်စီက စစ်အုပ်ချုပ်ရေးကြေညာတဲ့အပေါ်မှာ ဟိုင်ဂင်အပစ်ရပ်စဲရေး အခက်အခဲဖြစ်လာနိုင်တယ်လို့ ညီနောင် ၃ ဖွဲ့က မနေ့က ကြေညာချက်ထုတ်ပြန်ခဲ့သလို လက်ရှိ ကျောက်မဲဝန်းကျင် စစ်ရေးပြင်ဆင်မှုတွေ ကလည်း တိုက်ပွဲတွေ ဖြစ်လာနိုင်လို့ မြို့လူထုတွေ စိုးရိမ်ထိတ်လန့်နေကြတယ်လို့ သိရပါတယ်။
MK-012
