မဲခေါင်၊ ဒီဇင်ဘာ ၆

ရှမ်းပြည်မြောက်ပိုင်း၊ ကျောက်မဲမြို့နယ်က စစ်ကောင်စီတပ်ရဲ့ မိုင်းလုံစခန်းနဲ့ နမ့်ခမ်းမြို့နယ်က မိုင်းဝီးစခန်းတွေကို တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) က ထပ်မံသိမ်းပိုက်လိုက်တယ်လို့ ဒီနေ့မှာ ထုတ်ပြန်ပါတယ်။

ကျောက်မဲမြို့နယ်က မိုင်းလုံစခန်းကို မနေ့ ဒီဇင်ဘာ ၅ ရက် ညပိုင်းမှာ သိမ်းပိုက်မိခဲ့တာဖြစ်ပြီး အဲ့ဒီ့တပ်က စစ်ကောင်စီအဖွဲ့ဟာ တပ်ပျက်ပြီး ကစဉ့်ကလျားနဲ့ ထွက်ပြေးသွားကြတယ်လို့ TNLA က ထုတ်ပြန်ချက်က ဆိုပါတယ်။

အဲ့ဒီ့စခန်းကနေ ၈၀ မမ၊ ၆၀ မမ လက်နက်ကြီးအမြောက်တွေအပါအဝင် သေနတ် ၁၃ လက်နဲ့ စစ်အသုံးအဆောင်ပစ္စည်းတွေ ရှင်းလင်းသိမ်းဆည်းနိုင်ခဲ့တယ်လို့ သိရပါတယ်။

အလားတူ နမ့်ခမ်းမြို့နယ်က စစ်ကောင်စီတပ်ရဲ့ မိုင်းဝီးစခန်းကိုလည်း TNLA က မနေ့ ဒီဇင်ဘာ ၅ ညသန်းခေါင်ယံမှာ သိမ်းပိုက်နိုင်ခဲ့ပြီး ၆၀ မမ လက်နက်ကြီးအပါအဝင် သေနတ် ၁၀ လက်နက်၊ ခဲယမ်းတွေ သိမ်းမိခဲ့တယ်လို့ ဆိုပါတယ်။

အဲ့ဒီ့ မိုင်းဝီးစခန်းကို TNLA က ဒီဇင်ဘာ ၂ ရက်နေ့မှာ စတင်တိုက်ခိုက်ခဲ့တာဖြစ်ပြီး ၄ ရက်အကြာမှာ အလုံးစုံသိမ်းပိုက်မိခဲ့တာဖြစ်ပါတယ်။

“၁၀၂၇ စစ်ဆင်ရေး” စတင်ခဲ့တဲ့ အောက်တိုဘာ ၂၇ ရက်နေ့ကနေ ဒီဇင်ဘာ ၅ ရက်အထိ တအာင်း(ပလောင်)ဒေသအတွင်းက စစ်ကောင်စီစခန်း ၅၃ ခုကို TNLA က သိမ်းပိုက်ထားပြီးဖြစ်ပါတယ်။

#MeKongNews

#စစ်ကောင်စီ

#TNLA

#သိမ်းပိုက်

#မိုင်းဝီး

#မိုင်းလုံ

#လက်နက်ကြီး

#တအာင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)