မဲခေါင်၊ နိုဝင်ဘာ ၂၀
ဗြိတိန်နာမည်ကြီးသတင်းဌာန The Sun နဲ့ အင်တာဗျူးအစီအစဉ်မှာ ယူကရိန်းသမ္မတ ဇီလန်းစကီးက ရုရှားသမ္မတပူတင်ဟာ အစ္စရေးကို အကြမ်းဖက်တိုက်ခိုက်ခဲ့တဲ့ ဟားမက်စ်တွေကို ကူညီနေပြီး ကမ္ဘာတစ်ဝန်း တတိယကမ္ဘာစစ်ဖြစ်စေမယ့် မီးမွှေးမှုတွေကို လုပ်နေကြောင်း စွပ်စွဲပြောကြားသွားပါတယ်။
ပူတင်ဟာ အောက်တိုဘာလက ပါလက်စတိုင်းမှာ အုပ်စိုးတဲ့ ဟားမက်စ် စစ်တပ်က အစ္စရေးနယ်ထဲဝင်ပြီး အစု လိုက်အပြုံလိုက်သတ်ဖြတ်ပြန်ပေးဆွဲမှုအပေါ် ဖြစ်လာစေဖို့ အရမ်းအားခဲမျှော်မှန်းထားသူဖြစ်တယ်လို့ ဇီလန်းစကီးက ပြောပါတယ်။
ဘော်လ်ကန်ဒေသတွေမှာ ပြဿနာများစွာကို ဖန်တီးပြီး ကမ္ဘာတစ်ဝန်း တတိယကမ္ဘာစစ်ဖြစ်တဲ့အထိ ဆွဲခေါ် မီးမွှေးသွားဖို့ စနစ်တကျပြင်ဆင်နေတာဖြစ်ကြောင်း၊ ယူကရိန်းရဲ့ တွန်းလှန်စစ် အောင်မြင်ရေးက အနောက်မဟာ မိတ်နိုင်ငံတွေရဲ့ အကူအညီ လုံလောက်စွာရရှိမှာဖြစ်ကြောင်း အင်တာဗျူးမှာ ထည့်သွင်းပြောကြားသွားပါတယ်။
“ကျွန်တော်တို့ သိထားတာက ပူတင်ဟာ ဘော်လ်ကန်ဒေသမှာ ပြဿနာတွေ ရစ်ပတ်တက်လာစေဖို့ ခုကတည်းက ပြင်ဆင်နေတယ်ဆိုတာပဲ။ ခြေလှမ်းသစ်တွေနဲ့ ပြင်ဆင်မှုတွေစနေပြီး လူတချို့ကို လေ့ကျင့်သင် ကြားနေပြီ။ အိုင်ဒီယာကတော့ သူတို့မဖန်တီးပါပဲ ဘော်လ်ကန်ဒေသမှာ ပဋိပက္ခတစ်ခုကို ဖြစ်စေမယ်၊ ပြီးရင် သူတို့ဘက်က ဒီပဋိပက္ခကို ရပ်တန့်ဖို့ဝင်မကြိုးစားဘဲ ကမ္ဘာအနှံမီးမွှေးပြီး တတိယကမ္ဘာစစ်ဆီ ခေါ်ဆောင်သွား ဖို့ပါ” လို့ ဇီလန်းစကီးက ပြောသွားတာဖြစ်ပါတယ်။
ဒီအခြေအနေတွေကြောင့် ယူကရိန်းဟာ တတိယကမ္ဘာစစ်မဖြစ်ဖို့ ဗဟိုချက်အဖြစ် ခံတိုက်နေရတာဖြစ်ပြီး အမေရိကန်နဲ့တရုတ်တို့က ရုရှားကို ပြင်းပြင်းထန်းထန် ထိထိရောက်ရောက် ရာဇသံပေးလို့ ယူကရိန်းပိုင်နက်ထဲ ကထွက်သွားဖို့ ဖိအားပေးတာမျိုးမလုပ်သရွေ့ ရုရှားရဲ့ ကျူးကျော်စစ်ရပ်တန့်မှာမဟုတ်ဘူးလို့လည်း ဇီလန်းစကီး က ထပ်လောင်းပြောကြားပါတယ်။
အစ္စရေးနဲ့ ဟားမက်စ်တို့လက်ရှိဖြစ်ပွားနေတဲ့ စစ်ပွဲဟာ ယူကရိန်းစစ်ပွဲကိုချည်း အာရုံရောက်နေမှု လျှော့ချစေတာ မျိုးကို ရုရှားဘက်က လိုချင်နေပြီး ဟားမက်စ်ကို ထောက်ပံ့ပေးထားတဲ့ အီရန်ဟာ ယူကရိန်းကို ရုရှားတိုက်တဲ့ ခါမီကာဇီဒရုန်းတွေထောက်ပံ့ပေးရာနိုင်ငံဖြစ်လို့ ပူတင်ဟာလည်း ဟားမက်စ်ကို ထောက်ပံမြှောက်ပင့်ပေးနေတာ ဖြစ်တယ်လို့ ဇီလန်းစကီးက စွပ်စွဲပါတယ်။
မနှစ်က ဖေဖော်ဝါရီ ၂၄ ရက်မှာ ရုရှားက စတင်ကျူးကျော်စစ်ဆင်နွှဲပြီးနောက် ဒီစစ်ပွဲကနေ ယူကရိန်း နိုင်ငံအတွင်း လူပေါင်း ၆၀၀၀၀၀ ဒဏ်ရာရ ဒါမှမဟုတ် သေဆုံးခဲ့ရပြီး အများစုက ရုရှားစစ်သားတွေဖြစ်တယ်လို့ ဆိုပါတယ်။
လက်ရှိ အနောက်မဟာမိတ်တွေရဲ့ ထောက်ပံ့ကူညီမှုကြောင့် သိမ်းပိုက်ခံနယ်မြေတွေကို ပြန်လည် ထိုးစစ်ဆင်နေ ရာမှာ ကိဗ်၊ ခါကိဗ်နဲ့ ခါဆွန်ဒေသတွေမှာ နယ်မြေပြန်လည် သိမ်းပိုက်မှု အင်အားကောင်းပေမယ့် ၁၀ မိုင်လောက် သာ ပြန်သိမ်းနိုင်သေးပြီး မျှော်လင့်သလို ရုရှားတပ်အားလုံးကို ယူကရိန်းမြေပေါ်က ဆုတ်ခွာသွားစေဖို့ တိုက်ခိုက် ရေးက အထောက်အပံ့တွေ မလုံလောက်လို့ ခရီးမပေါက်ဘူးလို့ သိရပါတယ်။
ယူကရိန်းကျရင် နေတိုးအဖွဲ့ဝင်နိုင်ငံတွေကို ပူတင်က ဆက်လက်တိုက်ခိုက်သိမ်းပိုက်မှာဖြစ်လို့ အသက်ပေါင်းများစွာ ရင်းနှီးပေးဆပ်နေတဲ့ မိမိတို့နိုင်ငံအတွက် ပိုမို ကူညီကြဖို့ ဇီလန်းစကီးက အင်တာဗျူးမှာ တောင်းဆိုသွားပါသေးတယ်။
အီးယူက ယူကရိန်းကို ၂၀၂၇ ခုနှစ်အထိ ပေါင် ၄၄ ဘီလီယံ ထောက်ပံ့ဖို့ ကတိပြုထားပြီး ဗြိတိန်က ရုရှားကို မအောင်နိုင်မချင်း ယူကရိန်းကို ထောက်ပံ့နေဦးမှာဖြစ်ကြောင်းနဲ့ ပေါင် ၇ ဘီလီယံ ထောက်ပံ့ဖို့ ကတိပြုထား ပါတယ်။
ဒါပေမဲ့ အမေရိကန်လွှတ်တော်က အိမ်ဖြူတော်တောင်းဆိုထားတဲ့ ယူကရိန်းအတွက် အကူအညီ ဘတ်ဂျက် ပေါင် ၄၈ ဘီလီယံကို ပေးဖို့အရေး တားဆီးပိတ်ပင်ထားမှု၊ ဆလိုဗက်ကီးယား အစိုးရသစ်က ယူကရိန်း အတွက် ပေါင် ၃၄ သန်းထောက်ပံ့ဖို့အရေး ပြည်သူတွေ ဒုက္ခဝိုင်းနိုင်တာကြောင့် ပြန်လည် ပိတ်ဆို့ငြင်းပယ်ထားမှု တွေဟာ ယူကရိန်းလိုအပ်တဲ့ အထောက်အပံ့တွေကို အတားအဆီးဖြစ်နေစေတာဖြစ်ပါတယ်။
Ref:The Sun
MKF-001
#MeKongNews
#ရုရှား
#ယူကရိန်း
#ဇီလန်းစကီး