မဲခေါင်၊ သြဂုတ် ၂၄
အမေရိကန် ဘဏ္ဍာရေးဌာနက မြန်မာနိုင်ငံမှာ အရပ်သားပြည်သူတွေကို လေကြောင်းကနေ တိုက်ခိုက်သတ်ဖြတ်နေတဲ့ အာဏာသိမ်းစစ်တပ်အတွက် ဂျက်လေယာဉ်ဆီ ဝယ်ယူဖြန့်ဖြူးပေးနေတဲ့ လူ ၂ ယောက်နဲ့ ကုမ္ပဏီ ၃ ခုကို ပိတ်ဆို့အရေးယူမှုစာရင်းမှာ ထပ်တိုးကြောင်း ဩဂုတ် ၂၃ ရက် ရက်စွဲနဲ့ ထုတ်ပြန်သွားပါတယ်။
အမေရိကန်ဟာ မြန်မာစစ်ကောင်စီနဲ့ပတ်သက်တဲ့ လေယာဉ်ဆီ ဖြည့်တင်းပေးတဲ့ မြန်မာနိုင်ငံသားပဲဖြစ်ဖြစ်၊ ပြည်ပနိုင်ငံသား၊ ကုမ္ပဏီပဲဖြစ်ဖြစ် အားလုံးကို ပိတ်ဆို့အရေးယူသွားမယ်လို့ သတိပေးကြေညာထားပြီး အခု သမ္မတဂျိုးဘိုင်ဒန် လက်မှတ်ရေးထိုးလို့ ပိတ်ပင်လိုက်တာဖြစ်ပါတယ်။
ပထမဆုံးပိတ်ပင်လိုက်သူဟာ ၂၀၂၃ မတ် ၂၄ ရက်က စစ်ကောင်စီ လေယာဉ်ဆီရရှိရေးမှာ ပါဝင်ပတ်သက်နေလို့ သတိပေးအဆင့် လုပ်ထားတဲ့ ခင်ဖြူဝင်းဖြစ်ပြီး အခု စင်ကာပူအခြေစိုက် Shoon Energy PTE. LTD (Asia Sun Aviation လို့လည်း လူသိများ) ရဲ့လက်ခွဲကုမ္ပဏီတွေဖြစ်တဲ့ PEIA PTE. LTD နဲ့ P.E.I Energy PTE. LTD တို့ကနေ ဂျက်လေယာဉ်ဆီတွေ ဆက်လက်တင်သွင်းပေးနေလို့ ပိတ်ဆို့အရေးယူလိုက်ရကြောင်း ထုတ်ပြန်ပါတယ်။
နောက်တစ်ယောက်က 11 Asia Sun Group ပိုင်ရှင် ဇော်မင်းထွန်းဖြစ်ကြောင်း၊ သူဟာ ခင်ဖြူဝင်းဆီက တင်သွင်းလာတဲ့ လေယာဉ်ဆီတွေကို လက်ခံလွှဲပြောင်းပေးသူဖြစ်လို့ ဒီလူနှစ်ယောက်ရယ် သူတို့နဲ့ပတ်သက်တဲ့ Shoon Energy PTE. LTD၊ P.E.I Energy PTE. LTD. နဲ့ PEIA PTE. LTD. ကုမ္ပဏီ ၃ ခုကို ပိတ်ဆို့အရေးယူလိုက်ကြောင်း ထုတ်ပြန်ကြေညာခဲ့တာ ဖြစ်ပါတယ်။
ဒီပိတ်ဆို့အရေးယူမှုကြောင့် အမေရိကန်နိုင်ငံတွင်း ပိတ်ဆို့ခံ လူနဲ့ ကုမ္ပဏီတွေရဲ့ ပိုင်ဆိုင်မှုအားလုံး၊ ငွေကြေးတိုက်ရိုက် သို့မဟုတ် တစ်ဆင့်ခံ လွှဲပြောင်းပေးထားသမျှအားလုံး သိမ်းဆည်းမှာဖြစ်ကြောင်း၊ ဒီလူနဲ့ကုမ္ပဏီတွေကို ဘယ် အမေရိကန်တွင်းနေထိုင်သူမဆို အားပေး၊ ထောက်ပံ့ကူညီမှုလည်း လုံး၀ လုပ်ခွင့်မရှိကြောင်း သတ်မှတ်ပြဌာန်း ထားပါတယ်။
Ref: home.treasury.gov
MKF-001
#MeKongNews
#အမေရိကန်
#ပိတ်ဆို့
#လေယာဉ်ဆီ
#အရေးယူ