မဲခေါင်၊ စက်တင်ဘာ ၂၆
ထိုင်းနိုင်ငံရဲ့ ဒုရဲချုပ် ၄ ဦးအနက် နာမည်အကြီးဆုံး ဆူရာချာတီဟက်ခ်ပန်း (အများချစ်စနိုးအခေါ် Big Joke) ရဲ့ ဘန်ကောက်နေအိမ်ဝင်းကို စက်တင်ဘာ ၂၅ ရက်နေ့က ဖမ်းဝရမ်းနဲ့ ဝင်ရောက်စီးနင်းရှာဖွေခံရမှုအတွက် ဒီကနေ့ (စက်တင်ဘာ ၂၆ ရက်) မှာ ရှင်းလင်းပြောဆို မှုတွေ ထုတ်ပြန်ခဲ့ပါတယ်။
ထိုင်းအမျိုးသားရဲတပ်ဖွဲ့ရဲ့ ဒုရဲချုပ် ဆူရာချာတီက သူ့နေအိမ်ဝန်းထဲ ဝင်ရောက်ရှာဖွေမှုကို ဒေါသတကြီး ငြင်းဆန်ပြီး ထိုင်းရဲတပ်ဖွဲ့ ဥပဒေရေးရာနဲ့ တရားစီရင်ရေး ရဲချုပ် သိုင်ရောင်ဖျူဝန်ရဲ့ ဖုန်းဆက် ဖြောင်းဖျမှုလုပ်ပြီးမှ ရှာဖွေခွင့်ပေးခဲ့တာဖြစ်ပါတယ်။
ပြီးခဲ့တဲ့ ဇွန်နဲ့ဇူလိုင်လအတွင်းက ထိုင်းရဲတပ်ဖွဲ့ဟာ တရားမဝင်လောင်းကစား ဝက်ဘ်ဆိုက် ၁၂ ခုထောင်ပြီး ထိုင်းနိုင်ငံအတွင်း တရားမဝင် အွန်လိုင်းလောင်းကစားလုပ်ငန်းကြီးလုပ်နေတဲ့ လူ ၄ ဦးကို ဖမ်းဆီးခဲ့အပြီး နောက်ထပ် ၂၃ ယောက်ကို ဖမ်းဝရမ်းထုတ်ခဲ့ပါတယ်။
ဒီအထဲမှာ ဆူရာချာတီက ယုံကြည်မှုအပြည့်ရှိတယ်လို့ ထောက်ခံချက်ပေးထားတဲ့ ရဲမှူးကြီးတစ်ဦးအပါ ရဲအရာရှိ ပေါင်း ၈ ဦးပါဝင်နေပြီး ဒီရဲတွေဟာ ဆူရာချာတီ ခြံဝင်းထဲက အိမ်တွေမှာ နေထိုင်နေလို့ ဝင်ရောက်ရှာဖွေခဲ့တာဖြစ်ကြောင်း သိုင်ရောင်ဖျူဝန်က ထုတ်ပြန်ခဲ့ပါတယ်။
စက်တင်ဘာ ၂၅ ရက်နေ့က နိုင်ငံတဝန်း နေရာ ၃၀ ကို တစ်ပြိုင်တည်း စီးနင်းရှာဖွေ ရာမှာ စုစုပေါင်း ၁၇ ဦးကို ဖမ်းဆီးခဲ့တာဖြစ်ပါတယ်။
သူ့အိမ်ဝင်းထဲ ဖမ်းဝရမ်းနဲ့ ရှာဖွေရာမှာ သူ့အိမ်ကိုဝင်ဖို့ ဝရမ်းထဲမှာ ရေးမထားကြောင်း၊ ရဲချုပ်ရွေးပွဲနီးချိန် ဂုဏ်သိက္ခာချမှုလုပ်တာလို့ ဆူရာချာတီက ဖြေရှင်းပြောကြားပါတယ်။
တရားမဝင်လောင်းကစား ငွေကြေးလွှဲပြောင်းမှု ကွင်းဆက်နေရာအရ ဆူရာချာတီနေအိမ်ဝန်းကို ညွှန်းဆိုထားတဲ့ အတွက် ဆူရာချာတီအိမ်မဟုတ်တဲ့ ဝန်းထဲက တခြားအိမ်တွေကို ဝင်ရောက်ရှာဖွေတာဖြစ်ကြောင်း၊ ဆူရာချာတီ က ဒီအမှုနဲ့မဆိုင်၊ ဖမ်းဝရမ်းထဲမှာလည်းမပါလို့ စစ်ဆေးမေးမြန်းစရာလည်းမရှိကြောင်း သိုင်ရောင်ဖျူဝန်က ဆက်လက် ရှင်းလင်းပြောဆိုခဲ့ပါတယ်။
သူ့ဝန်းထဲက သူပိုင်အိမ်တွေဟာ သူ့ဆွေမျိုးသားချင်း တပည့်ဖြစ်သူ နေထိုင်ဖို့ တစ်လ ဘတ် ၅ သောင်းနဲ့ ငှားရမ်းထားတာဖြစ်ပြီး အငှားစာချုပ် တရားဝန်ရှိကြောင်း၊ သူ့တပည့်တွေကို ယုံကြည်ပေမယ့် ဒီမှုနဲ့ပတ်သက်လို့ စုံစမ်းမှုမှာ အပြစ်ထင်ရှားရင်တော့ ဥပဒေအတိုင်းသာ ဖြစ်စေရမှာပဲလို့ ဆူရာချာတီက ရှင်းလင်း ပြောဆိုသွားပါ တယ်။
ဆူရာချာတီဟာ ၂၀၁၉ ခုနှစ်က ရဲလူဝင်မှုကြီးကြပ်ရေးဗျူရိုမှာ ဒုရဲချုပ်အဖြစ်ခန့်အပ်ခံရပြီး မကြာခင်မှာပဲ ရာထူး ကဖယ်ရှားခံရကာ ၂၀၁၉ ခုနှစ်အတွင်း လူမြင်ကွင်းက ပျောက်ကွယ်သွားသူဖြစ်ပါတယ်။
၂၀၂၁ မှာ ၂၀၁၄ ခုနှစ်က စစ်အာဏာသိမ်းခဲ့တဲ့ စစ်ခေါင်းဆောင် ပရာယွတ်ကိုယ်တိုင်က သူ့ကို ပြန်ခေါ်ပြီး အမျိုးသားရဲတပ်ဖွဲ့မှာ ရဲချုပ်ရဲ့ အတိုင်ပင်ခံအဖြစ် ပြန်လည်နေရာပေးခဲ့ရာက တခြား စီနီယာ ရဲအရာရှိများစွာကို ကျော်တက်ပြီး ဒုရဲချုပ် ဖြစ်လာ ခဲ့သူလည်းဖြစ်ပါတယ်။
Ref: asahi
MKF-001
#MeKongNews
#ထိုင်း
#ဒုရဲချုပ်
#အိမ်
#ဝင်စီး
