မဲခေါင်၊ မတ် ၁၁
ကရင်နီပြည်၊ ဒီးမော့ဆို အရှေ့ခြမ်းဒေသမှာ စစ်ကောင်စီတပ်က စစ်ကြောင်း ၃ ကြောင်းနဲ့ ထိုးစစ်ဆင်လာလို့ ကြားဖြတ် တိုက်ခိုက်ရာမှာ စုစုပေါင်း စစ်သား ၁၆ ဦး သေဆုံးထားတယ်လို့ ကရင်နီ စစ်ဘက်ဆိုင်ရာ ဗဟိုသတင်းထုတ်ပြန်ရေးအဖွဲ့က ဒီကနေ့ ထုတ်ပြန်လိုက်ပါတယ်။
ဘောလခဲ စစ်ဗျူဟာမှ အင်အား ၇၀ ခန့်ရှိ စစ်ကောင်စီ စစ်ကြောင်းဟာ ဒေါတမကြီးအုပ်စုကို မတ်လ ၇ ရက်က ဦးတည်လာပြီး တောင်ယာခင်းနဲ့ တောင်ယာတဲတွေက လူငယ်နဲ့ အမျိုးသမီး အပါအဝင် ပြည်သူ ၁၄ ဦးကို လမ်းပြ အဖြစ် ဖမ်းဆီးသွားပြီး နောက်တစ်နေ့မှာ အမျိုးသမီး တစ်ဦးနဲ့ ကလေးငယ် ၂ ဦးကို ပြန်လွှတ်ပေးပေမဲ့ အမျိုးသား ၁၁ ဦးကို ဒီကနေ့ထိ ပြန်မလွှတ်သေးဘူးလို့ ဆိုပါတယ်။
ဒါ့အပြင် ဘောလခဲမြို့ ခမရ (၄၂၉) တပ်ရင်းနဲ့ အမှတ် (၇၇) တပ်မ ထုတ်နှုတ်တပ် အပါအဝင် စစ်ကောင်စီ အင်အား ၂၀၀ ခန့် မတ်လ ၉ ရက်မှာ ဒေါတမကြီးအုပ်စုဖက်ကို စစ်ကြောင်းထိုးမယ်လို့ သတင်းရတာကြောင့် ကျေးရွာ ၇ ရွာက ပြည်သူ ၅,၀၀၀ ခန့် တစ်ကိုယ်စာ ရိက္ခာသာယူနိုင်ပြီး စစ်ဘေးရှောင် စခန်းကို ပြောင်းရွှေ့ခဲ့ရတယ်လို့ သိရပါတယ်။
ဘောလခဲဘက်က ဆင်းလာတဲ့ စစ်ကြောင်းကို မတ်လ ၁၀ ရက်က ဒေါညေးခူရွာတောင်ဘက်မှာ တစ်ကြိမ်၊ ဒေါတမြေးရွာ အရှေ့ဖက် တောင်ပေါ်ကို တက်လာတဲ့ စစ်ကြောင်းကို တစ်ကြိမ် ကရင်နီ တပ်မတော်က ကြားဖြတ် တိုက်ခိုက်ခဲ့လို့ စစ်သား ၂ ဦးသေဆုံးပြီး တစ်ချို့ ထိခိုက်ဒဏ်ရာ ရနိုင်တယ်လို့ ပြောပါတယ်။
ဒါ့အပြင် ဒီးမောဆို အရှေ့ခြမ်း၊ ဒေါသဲရွာမှာ စစ်ကောင်စီ စစ်ကြောင်းနဲ့ ကရင်နီ တပ်မတော်-KA နဲ့ KNDF ပူးပေါင်းတပ်ဖွဲ့တို့ မနေ့က မနက်ပိုင်းမှာ တိုက်ပွဲဖြစ်ပွားရာ စစ်ကောင်စီတပ်သား ၁၄ ဦးသေဆုံးပြီး အများအပြား ဒဏ်ရာရခဲ့တယ်လို့ ဆိုပါတယ်။
ဒီစစ်ကြောင်းတွေဟာ ခိုလမ်မြို့ အခြေစိုက် အရှေ့အလယ်ပိုင်းတိုင်း စစ်ဌာနချုပ် လက်အောက်ခံ ခလရ (၁၂) နန့်စန်၊ ကျိုင်းခမ်းမြို့ အခြေစိုက် ခမရ (၅၁၀) တပ်ရင်း စတဲ့ စစ်ကောင်စီ တပ်ရင်းတွေ ပူးပေါင်းကာ ပြီးခဲ့တဲ့ ၂ ရက်ကတည်းက ကရင်နီပြည်ဘက် ဆင်းလာတာလို့ လွိုင်လင်မြို့ခံ ရှမ်းအမျိုးသားက မဲခေါင်သတင်းကို ပြောပါတယ်။
“ခိုလမ်မြို့က အရှေ့အလယ်ပိုင်းတိုင်း စစ်ဌာနချုပ် လက်အောက်ခံ ခြေလျင်တပ်ရင်း (၁၂) ရယ်၊ နန့်စန် ကျိုင်းခမ်းမြို့အခြေစိုက် ခြေမြန်တပ်ရင်း (၅၁၀) တပ်ရင်းတွေ ပေါင်းပြီး ကရင်နီ စစ်ဆင်ရေး ပြုလုပ်ဖို့ဆိုပြီး ပြီးခဲ့တဲ့ ၂ ရက်လောက်ကတည်း ကရင်နီပြည်နယ်ဘက် ဆင်းသွားတယ်” လို့ သူက ပြောပါတယ်။
စစ်ကောင်စီက ကရင်နီပြည် စစ်ဆင်ရေးနဲ့ နယ်မြေရှင်းလင်းရေး ပြုလုပ်ဖို့ ဖေဖော်ဝါရီလ ကတည်းက အင်အားဖြည့်တင်းနေတာ ဖြစ်တယ်လို့ သိရပါတယ်။
လက်ရှိ တက္ကသိုလ်ဝင်တန်း စာမေးပွဲပြီးဆုံးပါက စစ်ဂျက်လေယာဉ်တွေနဲ့ စစ်ဆင်ရေး လုပ်မယ်ဆိုတဲ့ သတင်းတွေကြောင့် ဒေသခံ ပြည်သူတွေ စိုးရိမ်ထိတ်လန့်နေတယ်လို့ သိရပါတယ်။
စာရင်းတွေအရ ဒီးမော့ဆို အရှေ့ခြမ်းမှာ စစ်ဘေးရှောင် ၁၅,၀၀၀ ကျော်ရှိနေပြီး လက်ရှိ စစ်ကြောင်းထိုး တိုက်ခိုက်မှုကြောင့် နေ့စဉ် စစ်ဘေးရှောင်ဦးရေ မြင့်တက်လာတယ်လို့ ကရင်နီ စစ်ဘက်ဆိုင်ရာ ဗဟိုသတင်းထုတ်ပြန်ရေးအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
MK-007
