မဲခေါင်၊ မတ် ၂၁
စစ်မှုထမ်းလူသစ် စုဆောင်းရေးအတွက် အရွယ်ရောက်ပြီး လူငယ်အမျိုးသားများကို ပေါ်တာဆွဲသည့် ကိစ္စရပ်များ တာချီလိတ်မြို့နယ်နှင့် အနီးတဝိုက်တွင် ပိုမိုဆိုးရွာလာကြောင်း ဒေသခံများက မဲခေါင်သို့ ပြောသည်။
ယခုနောက်ပိုင်းတွင် ပျောက်ဆုံးသွားသည့် လူငယ်အများစုမှာ ပေါ်တာဆွဲခံရခြင်းဖြစ်ပြီး ၎င်းတို့ကို ကျိုင်းတုံရှိ စစ်မှုထမ်းသင်တန်းကျောင်းသို့ ပိုဆောင်ခြင်းဖြစ်ကြောင်း ဒေသခံတစ်ဦးက ပြောသည်။
“အခုက တောက်လျောက်ကို ဖမ်းပြီး ပေါ်တာဆွဲနေတာ။ ပြန်ရောင်းတာလည်းရှိတယ်။ တချို့က စာအုပ်ရောင်းဟန်ဆောင်ပြီး ရပ်ကွက်ထဲတွေမှာ လိုက်ကြည့်နေပြီး လက်ထောက်ချတာ။ ကျိုင်းတုံရောက်တာနဲ့ မှတ်ပုံတင်တန်းလုပ်ပေး၊ သွေးစစ်ပြီး သင်တန်းတက်ခိုင်းတာ” ဟု ၎င်းကပြောသည်။
လွန်ခဲ့သည့်တစ်လအတွင်း တာချီလိတ်မြို့နှင့် အနီးတဝိုက်တွင် ပေါ်တာဆွဲဖမ်းဆီးမှု ၃မှုထက်မနည်း မဲခေါင်သတင်းဌာနမှ စုံစမ်းသိရပြီး အားလုံးမှာ ကျိုင်းတုံသို့ ပို့ဆောင် ရောင်းစားခံရခြင်းဖြစ်ကြောင်း၊ ရောင်းစားရာ၌ ကျပ်သိန်း ၃၀ မှ ကျပ်သိန်း ၇၀ အထိပေါက်ဈေးရှိကြောင်း သတင်းရင်းမြစ်များထံမှ သိရသည်။
ထို့ပြင် လူမှုကွန်ယက်များပေါ်တွင် အလုပ်ခေါ်စာများတင်ကာ လူခေါ်ပြီး လူတွေ့သည့်အခါ ဖမ်းဆီးပေါ်တာဆွဲပြီး ရောင်းစားသည့် ကိစ္စရပ်များလည်း ရှိကြောင်း ကိုယ်တွေ့ကြုံရသူများနှင့် နီးစပ်သူတစ်ဦးက ပြောသည်။
“ပန်းရံအလုပ်၊ ကြွေပြားကပ်လူလိုတယ်ဆိုပြီး ခေါ်တာ။ အကုန်အဖမ်းခံရတယ်။ တပ်ထဲရောင်းစားခံရတယ်” ဟု ၎င်းက ပြောသည်။
ယင်းသို့ လိမ်လည်အလုပ်ခေါ်ယူခြင်းကို တာချီလိတ်မြို့နှင့် သက်ဆိုင်သည့် လူမှုကွန်ယက်များပေါ်တွင် ခေါ်ယူခဲ့ခြင်းဖြစ်ပြီး မတ်လ ၁၀ ရက်က လူတွေ့သွားရောက်သူ ၁၈ဦး ရှိပြီး ၁၈ဦးစလုံး အဖမ်းခံရကြောင်း၊ ယင်းထဲမှ ၃ဦးမှာ ထွက်ပြေးခဲ့ရာ ၂ဦးလွတ်မြောက်ပြီး တစ်ဦး ပြန်လည်ဖမ်းဆီးခံခဲ့ရကြောင်း ယင်းနီးစပ်သူထံမှ သိရသည်။
တာချီလိတ်မြို့ပေါ်တွင် ပေါ်တာဆွဲမှုများ ဆက်တိုက်ဖြစ်နေပြီး ပြီးခဲ့သည့် ဇန်နဝါရီလနှင့် ဖေဖော်ဝါရီ လဆန်းပိုင်းတွင်လည်း နေ့စဉ်လိုပင် လူငယ် ၄၊ ၅ဦးခန့်ကို ပေါ်တာဆွဲခံရကြောင်း၊ တာချီလိတ်မြို့နယ်အတွင်း စစ်မှုထမ်းအတွက် လစဉ်ကြေးပေးဆောင်နေကြရသော်လည်း ယခုအခါ ပေါ်တာဆွဲသည့်ဖြစ်စဉ်များ ရှိလာခြင်းဖြစ်ကြောင်း တာချီလိတ်မြို့နေပြည်သူများက ပြောသည်။
ယခင်ဖြစ်ခဲ့သည့် တာချီလိတ်မြို့နယ်အတွင်းမှ ပေါ်တာဆွဲသည့် ကိစ္စများကို မိုင်းဖြတ်အခြေစိုက် စကခ ၁၈ လက်အောက်ခံ ခလရ ၂၂၁ တပ်မှ ဗိုလ်ကြီးဝင်းကိုနှင့် ခမရ ၃၃၀ တပ်မှ ပြုံးချိုတို့ ဦးဆောင်ပြုလုပ်ခြင်းဖြစ်ကြောင်း မဲခေါင်သတင်းဌာနက တင်ပြခဲ့ပြီးဖြစ်သည်။
#MeKongNews
#တာချီလိတ်
#ပေါ်တာဆွဲ
#စစ်မှုထမ်း
#ကျိုင်းတုံ
