မဲခေါင်၊ မေ ၁၃
စာသင်ကြားနေသည့် ကလေးငယ် ၂၀ ဦးနှင့် ဆရာမ ၂ ဦးသေဆုံးခဲ့ပြီး ပြည်သူ ၆၀ ခန့် ဒဏ်ရာရခဲ့သည့် ဒီပဲယင်းမြို့နယ်၊ အိုးထိမ်းတွင်းရွာစာသင်ကြောင်း လေယာဉ်ဖြင့်ဗုံးကြဲတိုက်ခိုက်မှုတွင် အမိန့်ပေးခဲ့သူများ၊ ကာကယံမြောက်ပါဝင်ခဲ့သည့် စစ်ကောင်စီ၏ တိုက်လေယာဉ်မောင်းများနှင့် လေကြောင်းတိုက်ခိုက်ရန် စေခိုင်းသူများအား ထိုက်တန်စွာ အပြစ်ပေးနိုင်ရေး စုံစမ်းရှာဖွေသွားမည်ဟု အမျိုးသားညီညွတ်ရေးအစိုးရ NUG၊ ပညာရေးဝန်ကြီးဌာနက မေလ ၁၂ ရက်နေ့ ညပိုင်းတွင်သတင်းထုတ်ပြန်သည်။
အပြစ်မဲ့သော ကလေးသူငယ် ကျောင်းသား၊ ကျောင်းသူများ၊ ဆရာ၊ ဆရာမများကို လေကြောင်းမှ တိုက်ခိုက်ရန် အမိန့်ပေးသူများ၊ ပြစ်မှုကို ကာယကံမြောက် ကျူးလွန်သူများ၊ ပူးပေါင်းပါဝင်သူများအားလုံးကို ထိုက်ထိုက်တန်တန် အရေးယူအပြစ်ပေးသွားမည်ဖြစ်ပြီး မည်သည့်အကြောင်းကြောင်းကြောင့်မှ ပြစ်ဒဏ်ကင်းလွတ်ခွင့် မရှိစေရေး ကမ္ဘာကြေသော်လည်း ဥဒါန်းကျေမည်မဟုတ်ဘဲ ပြင်းထန်စွာ အပြစ်ပေး အရေးယူနိုင်ရေး စုံစမ်းရှာဖွေ ဖော်ထုတ်သွားမည်ဟု ပညာရေးဝန်ကြီးဌာနမှ ထုတ်ပြန်ချက်တွင်ရေးသားထားသည်။
မေလ ၁၂ ရက်နေ့ မနက်ပိုင်း ၁၀ နာရီခန့်တွင် ကလေးသူငယ်အမြောက်အများစာသင်ကြားနေရာ အိုးထိမ်းတွင်းကျေးရွာစာသင်ကျောင်းကို စစ်ကောင်စီက လေကြောင်းတိုက်ခိုက်ခဲ့ခြင်းကြောင်း အနည်းဆုံး ကလေးငယ် ၂၀ ဦးနှင့် ဆရာမ ၂ ဦး သေဆုံးကာ အနည်းဆုံး ပြည်သူ ၆၀ ဦးခန့် ဒဏ်ရာရရှိခဲ့ခြင်းဖြစ်သည်။
စစ်ကောင်စီ၏ လေကြောင်းတိုက်ခိုက်မှုကို နိုင်ငံတကာအသိုင်းအဝိုင်းအနေဖြင့်လည်း ထိရောက်အကျိုးရှိသော တားဆီးအရေးယူမှုများကို ဆောင်ရွက်ပြီး ကလေးငယ်များအတွက် လုံခြုံစွာပညာသင်ယူခွင့်နှင့် ဘေးကင်းလုံခြုံသောကျောင်းများ ပေါ်ပေါက်လာရေး အားဖြည့်ပံ့ပိုးရန်တာဝန်ရှိကြောင်း ပညာရေးဝန်ကြီးဌာနက တိုက်တွန်းထားသည်။
အခင်းဖြစ်ပွားရာ နေရာတွင်ရှိနေသည့် CDM ကထိကဆရာမကြီး ဒေါ်ရတီအုန်းက “လက်ရှိကတော့ ထိခိုက်ဒဏ်ရာရရှိသူတွေကို ဆေးဝါးကုသမှုပေးနေတယ်။ ကွယ်လွန်သွားသူတွေရဲ့ စျာပနစီစဥ်နေတယ်။ အမေတွေကတော့ ငိုကြပေါ့။ ကွယ်လွန်သွားတဲ့ ကလေးတွေကရော သူတို့ကွယ်လွန်သွားတာ သိပါ့မလား။ စာတွေပဲဆက်သင်နေကြမလား။ အဲဒါတော့ ကျမလည်း တိတိကျကျ မပြောနိုင်ဘူး” ဟု လက်ရှိအခြေအနေအား မဲခေါင်ကိုပြောသည်။
စစ်ကောင်စီမှလေကြောင်းတိုက်ခိုက်မှုအပြီးတွင် စစ်ကောင်စီ၏ ဝါဒဖြန့် မြန်မာ့အသံ အပါအဝင် စစ်တပ်လော်ဘီချန်နယ်များနှင့် စစ်တပ်သြဇာခံ သတင်းသမားများမှ လေကြောင်းတိုက်ခိုက်မှုအား ဖုံးကွယ်ရန် PDF များမှ ဗုံးခွဲခြင်းဖြစ်ကြောင်း သတင်းတုများ ဖြန့်ဝေနေခြင်းအပေါ် စစ်ကောင်စီသည် အစဥ်အမြဲ လိမ်ညာနေကြောင်းနှင့် စစ်ကောင်စီမှ ကျူးလွန်ထားသော သက်သေများရှိကြောင်း မြေပြင်တွင်ရှိနေပြီး ဖြစ်စဉ်အသေးစိတ်သိရှိသူ CDM ကထိက ဆရာမကြီး ဒေါ်ရတီအုန်းက မဲခေါင်ကိုပြောသည်။
“စကစတွေက ဘယ်တုန်းကများ အမှန်တရားကိုပြောဖူးလို့လဲ။ ဒီကိစ္စက လူသက်သေ၊ ပစ္စည်းသက်သေ၊ မျက်မြင်သက်သေ အားလုံး အခိုင်အလုံနဲ့ ရှိနေကြတယ်။ ဘယ်သူကမှတော့ ကိုယ့်သားသမီးကို အရှင်လတ်လတ်သတ်ပြီးတော့မှ လိမ်ညာပြီးပြောနေမှာမဟုတ်ဘူး။ PDF တွေ ဗုံးခွဲတယ်ဆိုတာကို ယုံနေသူတွေကိုလည်း ပြောလိုက်ချင်တယ်။ ကျမတို့တတွေက လူတွေပါလို့ ဘယ်ဘက်ကပဲ ဖြစ်နေပါစေ ကလေးသူငယ်တွေကို ဒီလောက်အောက်တန်းကျကျ လုပ်လောက်တဲ့အထိ ကျမတို့မှာ သတ္တိမရှိပါဘူး” ဟု ၎င်းကဆိုသည်။
ယခုတကြိမ်တိုက်ခိုက်မှုသည် ၂၀၂၃ ခုနှစ် ပဇီကြီးကျေးရွာ လေကြောင်းတိုက်ခိုက်ခံရမှု အပြီးတွင် ကလေးသူငယ် သေဆုံးမှုအများဆုံး လေကြောင်းတိုက်ခိုက်မှု တခုဖြစ်ကြောင်း သိရသည်။
စစ်ကောင်စီသည် အပစ်အခတ်ရပ်စဲရေးကာလ ထပ်မံတိုးမြင့်ကြောင်း ကြေညာထားသော်လည်း မေလ ၁ ရက်နေ့မှ ၁၂ ရက်နေ့အထိ လေကြောင်းတိုက်ခိုက်မှုအနည်းဆုံး ၁၀ ကြိမ်နှင့်အထက် ပြုလုပ်ခဲ့ပြီး ဖြစ်သည်။
ဓာတ်ပုံ – တောကျီးကျန်း
ဂနိုက်
#MeKongNews
#အိုးထိမ်းတွင်း
#ဒီပဲယင်း
#လေကြောင်းတိုက်ခိုက်
#ကလေးသူငယ်
#ဗုံးကြဲ
#စာသင်ကျောင်း
