မဲခေါင်၊ မေ ၁၁
ရွှေတြိဂံဒေသ လာအိုနိုင်ငံပိုင် King Romans ကာစီနိုမြို့အတွင်း မြန်မာနိုင်ငံသား သိန်းနှင့်ချီ သွားရောက်အလုပ်လုပ်ကိုင်နေသော်လည်း နှစ်နိုင်ငံ နားလည်မှုစာချွန်လွှာ (MoU) လက်မှတ်ရေးထိုးထားခြင်း မရှိသဖြင့် တရားမဝင်အလုပ်သမားအဖြစ် အခက်အခဲများစွာ ကြုံတွေ့နေရကြောင်း အလုပ်သမားများထံမှ သိရသည်။
MoU လက်မှတ်ရေးထိုးထားခြင်းမရှိသည့်အတွက် အလုပ်သမားအခွင့်အရေးဆုံးရှုံးခြင်း၊ စိတ်ပိုင်းဆိုင်ရာလုံခြုံမှုမရှိခြင်းနှင့် အသက်အန္တရာယ်များသည့် ခိုးလမ်းများမှ အသွားအပြန်လုပ်ရခြင်းတို့ ရင်ဆိုင်နေရကြောင်း လာအိုရောက်အလုပ်သမားတစ်ဦးက ပြောသည်။
“ဘယ်အချိန် လာဖမ်းမလဲဆိုတာလည်း ထိတ်တလန့်လန့်ပဲ။ သွားရလာရတဲ့ လမ်းခရီးကလည်း အန္တရာယ်များတယ်။ တရားမဝင်ဆိုတော့ မှောင်ခိုကြေးနဲ့ ငွေကြေးကုန်ကျမှုလည်းပိုများတယ်။ ဒါပေမယ့် ကိုယ့်အရပ်၊ ကိုယ်ဒေသမှာ နေလို့မရတော့လည်း လာကြရတာပဲ” ဟု ၎င်းကပြောသည်။
လာအိုနိုင်ငံသို့ မဲခေါင်မြစ်ကို လှေဖြင့်ဖြတ်ကျော်ကာ တရားမဝင် သွားရောက်လုပ်ကိုင်နေရသည့် မြန်မာနိုင်ငံသားများသည် နှစ်စဉ် မိုးရာသီ မြစ်ရေကြီးချိန်တွင် လှေမှောက်ပြီး အသက်ဆုံးရှုံးမှုများ ဖြစ်ပေါ်နေသော်လည်း နှစ်ဖက်တာဝန်ရှိသူများက တာဝန်ယူမှုမရှိဘဲ လျစ်လျူရှုထားကြသည်ဟု ဝေဖန်ခံနေရသည်။
“လာအို King Romans ထဲမှာ မြန်မာတွေ သိန်းနဲ့ချီရှိတယ်။ အများအားဖြင့် ဟိုတယ်၊ စားသောက်ဆိုင်နဲ့ ဂိမ်းခုံတွေမှာ အလုပ်လုပ်ကြတာ။ မြန်မာပြည်အနှံ့က လာကြတာပါ။ မဲခေါင်မြစ်ကို ဖြတ်ကူးတဲ့အခါ မိုးတွင်းဆို အသက်ကယ်အင်္ကျီတောင်မပါဘဲ လှေသေးသေးလေးတွေနဲ့ ကူးနေကြရတာ။ နှစ်တိုင်း လူသေဆုံးမှုတွေရှိပေမဲ့ တာဝန်ရှိသူတွေက မသိချင်ယောင်ဆောင်ထားကြတယ်။ အလုပ်ခိုးလုပ်တာဆိုပေမဲ့ ဒါဟာ မြန်မာနိုင်ငံသားတွေဖြစ်လို့ လူကြီးတွေအနေနဲ့ တစ်ခုခုတော့ လုပ်ပေးသင့်တယ်” ဟု လာအိုနိုင်ငံတွင် ၁၅ နှစ်ကျော် နေထိုင်အလုပ်လုပ်ကိုင်နေသူတစ်ဦးက ပြောသည်။
ပြည်တွင်း၌ အလုပ်အကိုင် ရှားပါးမှုကြောင့် တရားမဝင် ထွက်ခွာနေရမှုကို ပိတ်ပင်နေမည့်အစား တာဝန်ရှိသူများအနေဖြင့် စနစ်တကျဖြစ်စေရန် နှစ်နိုင်ငံ MoU ရေးထိုးပြီး တရားဝင်ဖြစ်အောင် လုပ်ဆောင်ပေးစေလိုကြောင်း အလုပ်သမားများက ဆိုသည်။
ထို့ပြင် ထိုင်း-မြန်မာ နယ်ခြားကော်မတီကဲ့သို့ လာအို-မြန်မာ နယ်ခြားကော်မတီကိုပါ ဖွဲ့စည်းလုပ်ဆောင်ပေးရန် တောင်းဆိုမှုများ ရှိနေသည်။
မဲခေါင်မြစ်ကူးစဉ် လှေတိမ်းမှောက်မှုကြောင့် နှစ်စဉ် လူဦးရေ ၁၀ ဦးထက်မနည်း အသက်ဆုံးရှုံးနေရပြီး သေဆုံးသူအများစုမှာ လူငယ်များဖြစ်ကြကာ အသက် ၁၀ နှစ်အောက် ကလေးငယ်များပင် ပါဝင်နေကြောင်း သိရသည်။
ပြီးခဲ့သည့် ၂၀၂၅ ခုနှစ်၊ နိုဝင်ဘာလ ၂၃ ရက်ကလည်း လာအိုမှ မြန်မာဘက်သို့ကူးသည့်လှေ မဲခေါင်မြစ်အတွင်း တိမ်းမှောက်ခဲ့ပြီး အသက် ၅ နှစ်အရွယ် ကလေးငယ်တစ်ဦး အပါအဝင် ၆ ဦး သေဆုံးခဲ့သည်။
သေဆုံးသူများမှာ လာအိုနိုင်ငံသို့ သွားရောက်အလုပ်လုပ်ကိုင်ပြီးနောက် မြန်မာနိုင်ငံဘက်သို့ ပြန်လာသူများဖြစ်ကြောင်း လာအိုရောက်မြန်မာများထံမှာ သိရသည်။
“လှေသမားတွေကလည်း တွက်ချေကိုက်အောင် လူများများတင်ကြတာ၊ လူတွေရော၊ ပစ္စည်းတွေရော။ အသက်ကယ်အင်္ကျီမပါဘူး။ ရေစီးကြမ်းတဲ့အချိန်ဆို မလွယ်ဘူး” ဟု လာအိုရောက်မြန်မာတစ်ဦးက ပြောသည်။
လာအိုနိုင်ငံ၊ ဘော်ကီယိုခရိုင်ရှိ King Romans ကာစီနိုရှိရာ ဒေသတွင် အာဏာမသိမ်းခင်ကတည်းက မြန်မာလုပ်သား သောင်းဂဏန်း ရောက်ရှိနေပြီး ရခိုင်ရွာဟု အမည်ရသည့် မြန်မာအလုပ်သမားများ စုပေါင်းနေထိုင်ရာ ဒေသတစ်ခု ရှိနေပြီဖြစ်သည်။
အာဏာသိမ်းပြီးနောက်ပိုင်း ပြည်တွင်း၌ စစ်မက်ဖြစ်ပွားမှု၊ အလုပ်အကိုင်ရှားပါးမှုများကြောင့် လာအိုနိုင်ငံဘက်သို့ သွားရောက်အလုပ်လုပ်ကိုင်သူ ပိုမိုများပြားလာပြီး ယခုအခါ လာအိုရောက် မြန်မာလုပ်သား သိန်းဂဏန်းကျော်ပြီဖြစ်ကြောင်း သိရသည်။
ရွှေတြိဂံဒေသ လာအိုနိုင်ငံအတွင်းရှိ King Romans ကို တည်ထောင်သူမှာ တရုတ်လူမျိုး စီးပွားရေးလုပ်ငန်းရှင် Zhao Wei (ကျောက်ဝေ) ဖြစ်သည်။ ၎င်းသည် မိုင်းလားဒေသတွင် ကာစီနိုလုပ်ငန်း လုပ်ကိုင်ခဲ့ပြီးနောက် ၂၀၀၇ ခုနှစ်တွင် လာအိုအစိုးရနှင့် သဘောတူညီချက်ရယူကာ ရွှေတြိဂံအထူးစီးပွားရေးဇုန် (GTSEZ) ကို စတင်တည်ထောင်ခဲ့ခြင်းဖြစ်သည်။
လက်ရှိတွင် ကာစီနိုနှင့် ခရီးသွားလုပ်ငန်းများကို လုပ်ကိုင်နေသော်လည်း အမေရိကန်အစိုးရက ၎င်းကို မူးယစ်ဆေးဝါး ကုန်သွယ်မှု၊ လူကုန်ကူးမှုများနှင့် နာမည်ပျက်စာရင်း သတ်မှတ်ထားကြောင်း သိရသည်။
#MeKongNews
#လာအိုနိုင်ငံ
#မြန်မာရွှေ့ပြောင်းလုပ်သား
#မဲခေါင်မြစ်
#ကာစီနို
#ကျောက်ဝေ
