မဲခေါင်၊ ဇန်နဝါရီ ၅
အခွန်ဆောင်ခွင့်မပေးသဖြင့် ဌာနဆိုင်ရာများ တောင်းသမျှ ငွေလမ်းခင်းပြီး တင်သွင်းလာသည့် ဟင်းခတ် အမွှေးကြိုင်နှင့် အချို့မှုန့် ကုန်စည်များကို အခွန်မဆောင် ဟုဆိုကာ စစ်ကောင်စီ၏ အကောက်ခွန်ဌာနက အောင်ပန်းမြို့ ပွဲရုံအချို့ကို ဝင်ရောက် ဖမ်းဆီးသွားသည်ဟု သတင်းရင်းမြစ်များထံမှ သိရသည်။
ရှမ်းပြည်မြောက်ပိုင်းနှင့် ရှမ်းပြည်အရှေ့ပိုင်း မှတစ်ဆင့် တင်သွင်းလာသည့် တရုတ်နှင့် ထိုင်းနိုင်ငံထုတ် ကုန်ပစ္စည်းများ ရောင်းချနေသည့် ပွဲရုံများကို စစ်ကောင်စီ၏ အကောက်ခွန်နှင့် ဌာနဆိုင်ရာများက ဝင်ရောက် စစ်ဆေးကာ ကုန်ပစ္စည်းများကို သိမ်းဆည်းသွားခြင်း ဖြစ်သည်ဟု သတင်းရင်းမြစ်တစ်ဦးက ပြောသည်။
“ပွဲရုံတွေကို လိုက်စစ်ပြီး သိမ်းသွားတာ ဟင်းခတ်အမွှေးကြိုင်တွေ အချိုမှုန့်တွေကို သိမ်းသွားတာဗျ။ အသိမ်းခံရတဲ့ ပွဲရုံပိုင်ရှင်တွေကတော့ အဖမ်းခံမလားခံ ဝန်ထိုးမလားမေးပြီး ခံဝန်လက်မှတ် ထိုးရတယ်လို့ သိရတယ်ဗျ။ တိုင်တဲ့ လူရှိလို့ ဝင်ဖမ်းတာလား လိုင်းကြေးလိုချင်လို့ ဖမ်းတာလား တစ်ခုခုဖြစ်မယ်” ဟု သတင်းရင်းမြစ်တစ်ဦးက ပြော သည်။
ဌာနဆိုင်ရာ အသီးသီးက တောင်းသည့် ငွေပေးကာ သယ်ဆောင် လာသည့် ယင်းကုန်ပစ္စည်းများကို ဇန်နဝါရီ ၁ ရက် မှ ၄ ရက်အထိ လိုက်လံ သိမ်းဆည်းနေခြင်း ဖြစ်သည်ဟု အောင်ပန်းမြို့သတင်းရင်းမြစ်တစ်ဦးက ပြောသည်။
“ဖမ်းတာကတော့ အခွန်မဆောင်လို့ ဖမ်းတယ်ပြောတာပေါ့။ ဒါပေမယ့် အခွန်ဆောင်ပြီး ဒီပစ္စည်းတွေကို တင်သွင်းမယ် ဆိုပြန်ကျတော့လည်း သူတို့က အခွန်ဆောင်ခွင့် မပေးဘူးလေ။ ဒီဟင်းခတ် အမွှေးကြိုင်တို့ အချိုမှု့န်တို့ ဆိုတာက အောင်ပန်း – မန္တလေးကို နေ့တိုင်း ကားကြီးတွေနဲ့ ဝင်နေတာပဲ။ အခုဟာက အောင်ပန်းပွဲရုံပေါ် ရောက်မှ ဖမ်းတယ်ဆိုတော့ သိပ်မရိုးသားဘူး ထင်တာပဲ”ဟု ၎င်းက ပြောသည်။
ယင်းကုန်များကို တင်သွင်းခွင့် မပြုပါကလည်း နယ်စပ်ဂိတ်များတွင် မဝင်နိုင်အောင် တားဆီးရမည်ဖြစ်ပြီး ယခုကဲ့သို့ အောင်ပန်းမြို့အထိ ရောက်လာပြီးမှ တဖန် ပြန်ဖမ်းဆီးခြင်းသည် ငွေလည်းယူ ပစ္စည်းလည်းယူဆိုသည့် လုပ်ကွက်များဖြစ်သဖြင့် ဌာနဆိုင်ရာများအပေါ် ဝေဖန်မှုများနေသည်။
ယင်းကဲ့သို့ ဖမ်းဆီးခြင်းကြောင့် အောင်ပန်းမြို့ရှိ ပွဲရုံအချို့တွင် တရုတ်နှင့် ထိုင်းနိုင်ငံထုတ် ဟင်းခတ် အမွှေးကြိုင်များ အချို့မှုန့်များကို တင်ပို့ ရောင်းချခြင်း မပြုတော့ကြောင်း ကြေညာထားသည်ကိုလည်း တွေ့ရသည်။
#MeKongNews
#အခွန်ဆောင်ခွင့်
#ငွေလမ်းခင်း
#ဟင်းခတ်အမွှေးကြိုင်
#အချို့မှုန့်
#အကောက်အခွန်
#လိုက်ဖမ်း
