မဲခေါင်၊ ဇူလိုင် ၁
ကမ္ဘောဒီးယားနိုင်ငံ အဓိကခေါင်းဆောင် ဟွမ်ဆန်က မိမိနိုင်ငံကို အကြီးဆုံးကျားဖြန့် ဗဟိုချက်အဖြစ် ပုတ်ခတ်နေကြသော်လည်း ဓားစာခံအသေးစားမျှသာ ဖြစ်ကြောင်းနှင့် ကျားဖြန့်မူလ ပထမဗဟိုချက်သည် ထိုင်းသာလျှင် ဖြစ်သည်ဟု ပြောဆိုခဲ့ကြောင်း ခမာတိုင်းမ် သတင်းက ဖော်ပြသွားခဲ့သည်။
ယခုရက်ပိုင်းအတွင် ဟွမ်ဆန်သည် ထိုင်းဝန်ကြီးချုပ် ပေထောင်တန်နှင့် သီးသန့် ဖုန်းဆက်ပြောဆိုမှုအား လူသိရှင်ကြား ထုတ်ပြန်လိုက်ခြင်းကြောင့် ပေထောင်တန် ထွက်ပေးရန် ထိုင်းအမျိုးသားရေးဝါဒီများ ဘန်ကောက်တွင် ထောင်သောင်းချီ ဆန္ဒပြမှုများ တည်ရှိလာကာ ရာထူးမှ ထွက်ပေးရန် တောင်းဆိုလာကြသည်။
ဟွမ်ဆန်က နောက် ၃ လအတွင်း ထိုင်းဝန်ကြီးချုပ် အပြောင်းအလဲဖြစ်မည်ဟု ပြောခဲ့သလို ပေထောင်တန်နေရာတွင် ယခင် စစ်ဘက်ဆိုင်ရာမှ အဓိက အားထားသူဖြစ်ခဲ့သော အနူတင်ကို အစားထိုးမည်ဟုပင် နာမည်တပ်ပြောဆိုခဲ့သည်။
ထို့အပြင် ပေထောင်တန်သည် ကိုယ့်နိုင်ငံ တပ်မတော်ကို ပြန်လည်သစ္စာဖောက်ခဲ့သူဖြစ်ခြင်းကြောင့် ဆက်လက်တွေ့ဆုံဆွေးနွေးရန် မရှိတော့ကြောင်းနှင့် ထိုင်းတွင် ဗိုလ်ချုပ်ပရာယွတ် စစ်အာဏာသိမ်းပြီးချိန်များ မိမိနှင့် ဆက်ဆံရေးမှာ အကောင်းဆုံးဖြစ်ခဲ့သည်ဟုဆိုကာ စစ်အာဏာသိမ်းရန်ပင် တိုက်တွန်းသည့်သဘော ပြောဆိုနေသည်။
ဇွန် ၂၇ ရက်ကလည်း ထိုင်းတွင် စစ်အာဏာသိမ်းစဉ် သက်ဆင်၏ ညီမ ယင်းလတ် ထွက်ပြေးလွတ်မြောက်စေရန် မိမိကသာ ကမ္ဘောဒီးယားပတ်စ်ပို့တ် ထုတ်ပေးခြင်းဖြင့် ပြည်ပတွင် ပြန်လည်နေထိုင်နိုင်စေခဲ့ခြင်းဖြစ်ကြောင်း၊ ပွိုင်ပတ်မှ စင်ကာပူသို့ ပို့ဆောင်ပေးခဲ့မှုတွင် ထိုင်းကို ဆန့်ကျင်လိုခြင်းမဟုတ်ဘဲ လူသားချင်းစာနာမှုဖြင့် ကူညီခဲ့ခြင်းသာဖြစ်ကြောင်း ပြောဆိုခဲ့သဖြင့် ထိုင်းနှင့် ကမ္ဘောဒီးယားအရေးသည် တင်မာမှုများအပြင် ရှုပ်ထွေးမှုများပါ ပိုဆိုးသထက်ဆိုးလာခဲ့သည်။
ယခင် မာဆက်သူဌေးအဖြစ် နာမည်ကြီးသလို ထိုင်းနိုင်ငံရေးအတွင်းရေးများအား အလွန်သိသူဟု လူသိများခဲ့သော ချူဝစ်ကာမိုဝီဆစ်ကလည်း နိုင်ငံရေးအကြောင်း ဝင်မပြောတော့သည်မှာ ကြာခဲ့ရာမှာ ယခု ၎င်း၏ ဖေ့စ်ဘုတ်တွင် ကမ္ဘောဒီးယားနှင့် ထိုင်းပြဿနာသည် အငြင်းပွားနယ်စပ်ပိုင်နက်ကြောင့် လုံး၀မဟုတ်ဘဲ အမှန်မှာ သက်ဆင်နှင့် သမီးဖြစ်သူသည် ဝင်ငွေ ဘီလီယံများစွာ ရရှိနိုင်ရေး ထိုင်းတွင် ကာစီနိုနှင့်ဖျော်ဖြေရေးလုပ်ငန်းများ တရားဝင်ဖွင့်လှစ်ရန် ဥပဒေရေးဆွဲ အကောင်အထည်ဖော်နေခြင်းကို ဟွမ်ဆန်ဘက်မှ အလွန်ဒေါသထွက်ပြီး ကမ္ဘောဒီးယား အစိုးရ၏ အဓိက ဝင်ငွေရင်းမြစ်ကို လုယူမည်စိုးသောကြောင့် ရင်းနှီးလွန်းခဲ့သည့် သက်ဆင်မိသားစုနှင့် ရန်သူများပြန်ဖြစ်သွားခြင်းကြောင့်သာဖြစ်သည်ဟု ရေးသားသွားခဲ့သည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ကမ္ဘောဒီယား
#ကျားဖြန့်
#ကာစီနို
