ငြိမ်းချမ်းရေးဆွေးနွေးပွဲ ခေါင်းစဉ်တပ်ထားတဲ့ အာဏာသိမ်းစစ်ကောင်စီရဲ့ ဆွေးနွေးပွဲမှာ SSPP ဘက်က ဖက်ဒရယ်ပြည်ထောင်စုတည်ဆောက်ရာမှာ ဖြစ်သင့်ဖြစ်ထိုက်တဲ့ ကိစ္စရပ်တွေကို ဆွေးနွေးရာမှာ ဒီကိစ္စတွေကို ထည့်သွင်းဆွေးနွေးခဲ့တာဖြစ်ပါတယ်။
သူတို့က အရပ်သားအစိုးရအောက်မှာ မနေနိုင်ဘူးပေါ့။ ဗမာပြည်နယ်ဖွဲ့စည်းရေးကိုလည်း လက်မခံဘူး
လို့ SSPP နဲ့ နီးစပ်သူတစ်ဦးက ပြောပါတယ်။
ပြီးခဲ့တဲ့ စက်တင်ဘာ ၂၆ ရက်က နေပြည်တော်မှာ အာဏာသိမ်းစစ်ခေါင်းဆောင် မင်းအောင်လှိုင်နဲ့ ရှမ်းပြည်တိုးတက်ရေးပါတီ (SSPP) အနေနဲ့ ဖက်ဒရယ်ပြည်ထောင်စုအတွက် ဗမာပြည်နယ်ဖွဲ့စည်းဖို့ အပါအဝင် အချက် ၄ ချက်ကို ဆွေးနွေးခဲ့တာပဲ ဖြစ်ပါတယ်။
SSPP နဲ့ စစ်ကောင်စီ လေးရက်တာ ဆွေးနွေးပွဲမှာ ဖက်ဒရယ်ပြည်ထောင်စု တည်ဆောက်မယ်ဆိုရင် ပင်လုံစာချုပ်၊ ပင်လုံကတိကဝတ်ကို အကောင်အထည်ဖော်ဖို့၊ ၁၉၆၁ ခုနှစ်က ပြည်နယ်ပေါင်းစုံညီလာခံမှာ ချမှတ်ခဲ့တဲ့ သဘောတူညီချက်တွေကိုအကောင်အထည်ဖော်ဖို့၊ အမျိုသားတန်းတူရေးကို ဖော်ဆောင်နိုင်ဖို့အတွက် ဗမာပြည်နယ်ကိုဖွဲ့စည်းဖို့နဲ့ ဖက်ဒရယ်ဒီမိုကရေစီ ပြည်ထောင်စုကို တည်ဆောက်ဖို့ဆိုတဲ့ အချက် ၄ ချက် ဖြစ်တယ်လို့ သိရပါတယ်။
စက်တင်ဘာလ ၂၈ ရက်ကလည်း အာဏာသိမ်းစစ်တပ်ကဖွဲ့စည်းတဲ့ ငြိမ်းချမ်းရေးအဖွဲ့နဲ့တွေ့ဆုံခဲ့ပြီး SSPP က ၂၀၀၈ ခြေဥမှာ ပြင်ဆင်ရမယ့်အချက်တွေကို ဆွေးနွေးရာမှာ ဖက်ဒရယ်ပြည်ထောင်စုတည်ဆောက်မယ်ဆိုရင် လက်နက်ကိုင်အဖွဲ့အားလုံးကို အရပ်သားအစိုးရလက်အောက် ထားရှိဖို့နဲ့ သက်ဆိုင်ရာ ပြည်နယ်အစိုးရအဖွဲ့ လက်အောက်မှာ ပြည်နယ်လုံခြုံရေးအဖွဲ့ထားရှိဖို့ SSPP က ဆွေးနွေးခဲ့တယ်လို့ သိရပါတယ်။
၂၀၀၈ အခြေခံဥပဒေကို ပြင်ဆင်ဖို့ဆွေးနွေးရာမှာ ပြည်ထောင်စု ဥပဒေပြုရေးမှာ အာဏာတူတဲ့ ဖက်ဒရယ်အထက်လွှတ်တော်နဲ့ ဖက်ဒရယ်အောက်လွှတ်တော်ဆိုပြီး ထားရှိဖို့၊ ပြည်ထောင်စုအုပ်ချုပ်ရေးမှာ ဝန်ကြီးချုပ်ရော၊ သမ္မတပါထားရှိပြီး သမ္မတကို ဖယ်ဒရယ်အထက်လွှတ်တော်က ရွေးချယ်ဖို့နဲ့ ဝန်ကြီးချုပ်ကို ဖက်ဒရယ် အောက်လွှတ်တော်က ရွေးချယ်ဖို့၊ သမ္မတဟာ နိုင်ငံရဲ့အကြီးအကဲဖြစ်သလို စစ်သေနာပတိချုပ်လည်း ဖြစ်ရမှာ ဖြစ်ပြီး ဝန်ကြီးချုပ်က အစိုးရအကြီးအကဲဖြစ်ရမယ်လို့ SSPP က ဆွေးနွေးခဲ့တာပဲ ဖြစ်ပါတယ်။
အလားတူ အာဏာသိမ်း စစ်ခေါင်းဆောင်ရဲ့ ဖိတ်ခေါ်ချက်အရ အမျိုးသားဒီမိုကရက်တစ် မဟာမိတ်တပ်မတော်(NDAA) ဒုတိယဥက္ကဋ္ဌ ဦးစန်ပေ့ ဦးဆောင်တဲ့အဖွဲ့၊ ရှမ်းပြည်တိုးတက်ရေးပါတီ(SSPP) ဒုတိယဥက္ကဋ္ဌ (၂) စဝ်ခွန်ဆိုင် ဦးဆောင်တဲ့အဖွဲ့နဲ့ “ဝ”ပြည် သွေးစည်းညီညွတ်ရေးပါတီ(UWSP) ဒုတိယဥက္ကဋ္ဌ ဦးလော့ယာကု ဦးဆောင်တဲ့အဖွဲ့တွေဟာ စက်တင်ဘာ ၂၆ ရက်က နေပြည်တော်ကို သွားရောက်ဆွေးနွေးခဲ့ပါတယ်။
စစ်ခေါင်းဆောင် ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို သွားရောက်တဲ့ အဖွဲ့အများစုဟာ ဆယ်စုနှစ်တွေနဲ့ချီပြီး စစ်ကောင်စီတပ်နဲ့ တိုက်ပွဲတွေဖြစ်ပွားတာမရှိခဲ့တဲ့ စစ်တပ်တွေဖြစ်ပြီး အခုလက်ရှိ တိုက်ပွဲတွေဖြစ်ပွားနေတဲ့ KNU၊ KIA၊ KNPP ၊ CNF ၊ AA နဲ့ TNLA စတဲ့ တိုင်းရင်းသားလက်နက်ကိုင်တပ်ဖွဲ့တွေကတော့ နေပြည်တော်ကို သွားရောက်ခြင်းမရှိပါဘူး။
အာဏာသိမ်းစစ်တပ်ဟာ ပြည်သူ့ကာကွယ်ရေးတပ်ဖွဲ့တွေနဲ့ တိုက်ခိုက်ရာမှာ အရေးနိမ့်ပြီး အကျပ်အတည်းတွေ့နေလို့သာ တိုင်းရင်းသားလက်နက်ကိုင်တွေကို ငြိမ်းချမ်းရေးကမ်းလှမ်းတာဖြစ်တယ်လို့ ပြည်သူတွေက ယုံကြည်နေကြပါတယ်။
