မဲခေါင်၊ အောက်တိုဘာ ၂၃

ရှမ်းပြည်တောင်ပိုင်း၊ တောင်ကြီးမြို့မှာ စစ်ကောင်စီက တန်ဆောင်တိုင်ပွဲတော်အတွက် ပြင်ဆင်နေပြီး အစစ်အဆေး တင်းကျပ်နေတယ်လို့ မြို့ခံတွေက ပြောပါတယ်။

ပြီးခဲ့တဲ့ ၂ ရက်ကတည်းက ဗိုလ်ချုပ်အောင်ဆန်းလမ်း၊ လင်းတကုန်းပေါ်မှာ စစ်ကောင်စီတပ်သား ၅ ဦးခန့် စောင့်ကြည့်နေပြီး လမ်းသွားလမ်းလာတိုင်းကိုလည်း စစ်ဆေးနေတယ်လို့ ဆိုပါတယ်။

“အခုလေးတင် ဆိုင်ကယ်တစ်စီး မောင်းပြေးလို့ ရှေ့မှာပိတ်ပြီး တုတ်နဲ့ ရိုက်ချလိုက်တာ ဆိုင်ကယ် လဲကျသွားတယ်။ ဖမ်းမဖမ်းတော့ မကြည့်ရဲတော့လို့ မသိဘူး” လို့ မျက်မြင်တွေ့ရှိသူ တစ်ဦးက ပြောပါတယ်။

လက်ရှိပြင်ဆင်နေတဲ့ အဝေရာ မီးပုံးပျံကွင်း အပါအဝင် တောင်ကြီးအတက်လမ်း၊ ထုံးဖိုဂိတ်၊ စူဠာမုနီဘုရားအနီးက နီလာရိုးမ ဓါတ်ဆီဆိုင်နဲ့ မြို့ဝင်စစ်ဆေးရေးဂိတ်တွေမှာလည်း အစစ်ဆေးတင်းကြပ်နေတယ်လို့ သိရပါတယ်။

“မြို့ဝင်ဂိတ်တွေက ဆိုင်ကယ်ရပ်ခိုင်းပြီး ဘယ်သွားမလဲ၊ ဘာကိစ္စလဲ မေးတာပါ။ လူကဲခတ်တဲ့ သဘောပါပဲ။ မြို့ထဲမှာတော့ အဓိက လူငယ်တွေပေါ့။ လူကြီးပိုင်းတွေ သက်ကြီးရွယ်အိုတွေတော့ ချောင်ပါတယ်” လို့ ထုံးဖိုဂိတ်ကနေ ဖြတ်သွားလာသူ တစ်ဦးက ပြောပါတယ်။

အောက်တိုဘာလ ၁၁ ရက်နေ့ညတုန်းက လင်းတကုန်းမှာ စစ်ဆေးခံရစဉ် လူငယ် ၁၁ ဦး ဖမ်းဆီးခံခဲ့ရပြီး ဘာကြောင့်ဖမ်းတယ် ဆိုတာ မသိရသလို ဒီနေ့အထိလည်း အဆက်အသွယ် မရသေးပါဘူး။

စစ်အာဏာသိမ်းပြီး နောက်ပိုင်းကတည်းက တောင်ကြီးမြို့ပေါ်ရှိ လမ်းအများစုမှာ စစ်ကောင်စီတပ်သားတွေကိုသာ တွေ့ရပြီး စစ်ခေါင်းဆောင်ရာကြီးပိုင်းတွေ လာတဲ့အချိန်နဲ့ ဆိုင်ကယ်ဦးထုပ် ဖမ်းတဲ့အချိန်မှပဲ ယာဉ်ထိန်းရဲတွေ ပေါ်လာတယ်လို့ မြို့ခံတွေဆီက သိရပါတယ်။

MK-014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)