မဲခေါင်၊ အောက်တိုဘာ ၂၃
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ ကြေးစားကုန်းတောင်ရွာမှာ EPC က ထရန်စဖော်မာကြေး ၇ သောင်း ကောက်ခံနေတယ်လို့ ရွာခံတွေက ပြောပါတယ်။
စက်တင်ဘာလအတွင်း ဖြစ်ပွားခဲ့တဲ့ ရေကြီးရေလျှံမှုတွေကြောင့် အင်းလေးဒေသမှာ ထရန်စဖော်မာ အများစု ပျက်စီးခဲ့တာကြောင့် ပြန်လည်ပြင်ဆင်နေရပြီး ကျေးရွာအများစုမှာ လျှပ်စစ်မီး မရသေးဘူးလို့ ဆိုပါတယ်။
“အုပ်ကြီးက မစားဘူး။ EPC က တောင်းတာ။ ဒီရွာက နိုင်ငံရေးတအားလုပ်လို့ တမင်ညစ်ပတ်တာပါ။ မီတာခလည်း ၃ ဆဖြစ်မယ် ကြားတယ်” လို့ ကြေးစားကုန်းတောင်ရွာမှာ နေထိုင်သူ တစ်ဦးက ပြောပါတယ်။
နီးစပ်တဲ့ မင်းချောင်း၊ ရေသာ၊ ကျွန်းကြီး၊ လင်းကင်းရွာတွေကို ကောက်ခံခြင်း မရှိဘဲ ကြေးစားကုန်းတောင်ရွာ တစ်ခုတည်းသာ ကောက်ခံနေပြီး အောက်တိုဘာလမကုန်မှ ထည့်ဝင်ရမယ်လို့ သိရပါတယ်။
“နိုင်ငံရေးလုပ်တဲ့ ရွာတွေကိုပဲ ကောက်တာ။ တချို့ ထရန်စဖော်မာ ၂ လုံးရှိတဲ့ ရွာက ၆ သိန်းထည့်ရမှာ” လို့ EPC နဲ့ နီးစပ်သူ တစ်ဦးက ပြောပါတယ်။
အင်းလေးဒေသမှာ ရေပြန်ကျလာပေမယ့် ဓါတ်တိုင်အများစု ရေမြုပ်နေတာကြောင့် မပြင်ဆင်နိုင်သေးဘဲ ရေမြုပ်တဲ့ ကျေးရွာ ၁၇၁ ရွာထဲက ၃ ပုံတစ်ပုံခန့်သာ မီးလာကြတယ်လို့ ဆိုပါတယ်။
ခရီးသွား အမှီပြုနေရတဲ့ အင်းလေးဒေသမှာ သီတင်းကျွတ်ကာလအတွင်း ခရီးသွားလာရောက် လည်ပတ်သူ မရှိတာကြောင့် ဝင်ငွေနည်းပါးလာပြီး ပြန်လည်ထူထောင်ရေးအတွက် အကူအညီတွေ လိုအပ်နေတယ်လို့ စုံစမ်းသိရပါတယ်။
MK-014
