စစ်အာဏာရှင်စနစ် ယာယီရပ်တန့်နေသည့် ပြီးခဲ့သည့် ၁၀နှစ်တာ ကာလအတွင်း ဒီမိုကရေစီအခွင့်အရေး၊ လူ့အခွင့်အရေးများ ရရှိခဲ့ကြပြီး ယခုအခါ လက်လွတ်ကြရသည့်အတွက် ယနေ့ခေတ်လူငယ်များ ခုခံတော်လှန်နေကြသည့် အပေါ် နားလည်သဘောပေါက်ကြောင်း PPST အလုပ်အမှုဆောင်အဖွဲ့၏ အဖွဲ့ခေါင်းဆောင်ကိုယ်စား ဗိုလ်မှူးကြီးခွန်ဥက္ကာက ဩဂုတ်လ ၅ရက်က ပြောကြားလိုက်သည်။
ငြိမ်းချမ်းရေးအလုပ်အမှုဆောင်အဖွဲ့ – PPST အစည်းအဝေး (၁၈/၂၀၂၁)၏ နိဂုံးချုပ်အမှာစကားတွင် ထည့်သွင်းပြောကြားလိုက်ခြင်း ဖြစ်သည်။
လက်ရှိမြန်မာနိုင်ငံတွင် နိုင်ငံရေးပြိုကွဲမှု ဖြစ်နေပြီး ပြည်သူတစ်ရပ်လုံးမှာလည်း ဆောက်တည်ရာ မရသည့် အခြေအနေမျိုး ဖြစ်နေကြောင်း၊ ကပ်ကြီး ၃ပါးအပြင် ရန်သူမျိုး ၅ပါးကိုလည်း တပြိုင်နက်တည်း ရင်ဆိုင်နေရကြောင်း ဗိုလ်မှူးကြီးခွန်ဥက္ကာက ပြောသည်။
မြန်မာနိုင်ငံအလယ်ပိုင်းနှင့် မြေလတ်ပိုင်းရှိပြည်သူများ နိုးကြားထကြွလာသည်ကို ထင်ရှားစွာတွေ့မြင်ရသည့်အတွက် ချီးကျူးဂုဏ်ပြုကြောင်းကိုလည်း ထည့်သွင်းပြောဆိုထားသည်။
