မဲခေါင်၊ ဇန်နဝါရီ ၂
ဇန်နဝါရီ ၁ ရက် နှစ်သစ်ကူးနေ့မနက်အစောပိုင်းက ဂျပန်နိုင်ငံ အနောက်ပိုင်း ဟွန်းရှူးကျွန်းမကြီးရဲ့ အဓိကကျွန်းဖြစ်တဲ့ အစ်ရှီကာဝါကျွန်းကို ဗဟိုပြုလှုပ်ခတ်ခဲ့တဲ့ ငလျင်ဟာ အပြင်းဆုံးငလျင်အဖြစ် ပြင်းအား ၇.၆ အထိ လှုပ်ခဲ့သလို ထပ်ဆင့်ငလျှင်ငယ်ပေါင်း ၁၅၅ ကြိမ်ပါ လှုပ်ခတ်ခဲ့တဲ့အတွက် သေဆုံးသူပေါင်း ၄၈ ယောက် ရှိလာပြီလို့ ဇန်နဝါရီ ၂ ရက်နေ့မှာ ထုတ်ပြန်ကြေညာခဲ့ပါတယ်။
ဂျပန်ပြည်တွင်းမီဒီယာတွေ ဖော်ပြမှုအရ ပျက်ဆီးပြိုလဲခဲ့တဲ့ အိမ်ပေါင်း သောင်းချီရှိပြီး နေအိမ် ၄၅၀၀၀ ဟာ လျှပ်စစ်မီးမရနိုင်ဘဲ လူပေါင်း ၆၂၀၀၀ ကို ရွှေ့ပြောင်းနေထိုင်ဖို့ အမိန့်ထုတ်ပြန်နေရာချထားပေးရကြောင်း သိရှိရပါတယ်။
ပြင်းထန်လွန်းတဲ့ ငလျှင်ဒဏ်ကြောင့် ဖြစ်ပေါ်လာတဲ့ ဆူနာမီလှိုင်းငယ်တွေဟာ အန္တရာယ်ကြီးမားနိုင်တဲ့ အဆင့်လှိုင်းမျိုး မတွေ့ရတော့လို့ အရေးပေါ် ဆူနာမီသတိပေးချက်ကို ဇန်နဝါရီ ၂ ရက်မှာ အလုံးစုံ ပြန်လည် ရုပ် သိမ်းလိုက်ပေမယ့် ပျက်ဆီးမှုများလွန်းခဲ့ပြီး ဝါဂျီးမား ဆိပ်ကမ်းမြို့ဆိုရင် ဇန်နဝါရီ ၂ ရက်နေ့အထိ မီးမငြိမ်းသတ် နိုင်သေးပါဘူး။
ဂျပန်ဝန်ကြီးချုပ် ကီရှီဒါက ဂျပန်စစ်သား ၁၀၀၀ ကို ကယ်ဆယ်ရေးလုပ်ငန်းတွေမှာ ပါဝင်ဖို့ ထည့်ပေးထားပြီး နေအိမ်အဆောက်အအုံတွေ ပျက်ဆီးမှုက အကြီးစားပျက်ဆီးမှုဖြစ်လို့ ပျက်ဆီးဆုံးရှုံးမှုပမာဏကို ချက်ချင်း မတွက်ချက်နိုင်သေးကြောင်း၊ အပျက်အဆီးတွေကြားမှာ ပိတ်မိနေသူတွေရဲ့ အသက်ကို ကယ်တင်နိုင်ရေးက ကနဦး အရေးအကြီးဆုံး ရည်မှန်းချက်ဖြစ်တယ်လို့ ထုတ်ပြန်ပြောဆိုသွားခဲ့ပါတယ်။
ဂျပန်နိုင်ငံဟာ ပစ္စိဖိတ်သမုဒ္ဒရာရဲ့ မီးတောင်များစွာရှိတဲ့ Ring of Fire ဇုန်ထဲမှာ ရှိနေလို့ နှစ်စဉ် ငလျင်ရာနဲ့ချီ လှုပ်ခတ်လေ့ရှိပေမယ့် အပျက်အဆီးများတဲ့ ငလျင်ရှားပါတယ်။
ဆိုးဝါးလွန်းတဲ့ငလျင်တွေကတော့ ၂၀၁၁ ခုနှစ်က ဂျပန်နိုင်ငံ အရှေ့မြောက်ပိုင်းမှာ ပြင်းအား ၉ .၀ နဲ့လှုပ်သွားတဲ့ ငလျှင်ဖြစ်ပြီး ဆူနာမီလှိုင်းကြောင့် လူပေါင်း ၁၈၅၀၀ ပျောက်ဆုံးသွားခဲ့ရပါတယ်။
ဖူကူရှီးမား နျူကလီးယားစက်ရုံ ဓာတ်ပေါင်းဖို ၃ ခုထဲ ရေစိမ့်ဝင်ပြီး ချာနိုဘိုင်း နျူကလီးယားစက်ရုံပေါက်ကွဲမှုနောက် အဆိုးရွားဆုံး နျူကလီးယားကပ်ဘေးဆိုက်ခဲ့ရပါသေးတယ်။
ခုငလျင်ကတော့ အစ်ရှီကာဝါကျွန်းမှာရှိတဲ့ ရှီကာနျူကလီးယားဓာတ်အားပေးစက်ရုံကို ထိခိုက်ပျက်ဆီးမှု တစ်စုံ တစ်ရာမရှိဘူးလို့ သိရပါတယ်။
Ref: thenationalnews
MKF-001
#MeKongNews
#ဂျပန်
#ငလျင်
#ဆူနာမီ
#သေဆုံး
