တရုတ်မော်ဒယ် ပျောက်ဆုံးမှု မြန်မာနယ်စပ်မှာ ထိုင်းစစ်တပ် လုံခြုံရေးတင်းကျပ် ရှာဖွေနေ
မဲခေါင်၊ ဇန်နဝါရီ ၁၇
ထိုင်း-မြန်မာနယ်စပ်မှာ တရုတ် မော်ဒယ်အမျိုးသား ဇီကျီး ပျောက်ဆုံးသွားလို့ ဖခင်ဖြစ်သူ ထိုင်းကိုလိုက်လာပြီး ရှာဖွေဖို့ အကူအညီတောင်းခံကြောင်းနဲ့ မဲဆောက်-မြ၀တီနယ်စပ် ၁၂ နေရာမှာ ကျားဖြန့်သတိပေးဆိုင်းဘုတ်တွေ လိုက်ထောင်ပြီး ထိုင်းတော်ဝင်စစ်တပ်က ၂၄ နာရီ ဂိတ်ချ စစ်ဆေးမှုတွေ လုပ်ဆောင်နေပြီဖြစ်ကြောင်း ထိုင်း မီဒီယာတွေက ဖော်ပြပါတယ်။
ပြီးခဲ့တဲ့ ရက်ပိုင်းကပဲ တရုတ်နာမည်ရ ရုပ်သံသရုပ်ဆောင် ဝမ်ဇင်းနဲ့ ၂၁ နှစ်အရွယ် ကျန်းဆုပြည်နယ်သူ တရုတ်အမျိုးသမီးတွေကို မြ၀တီဘက်ခြမ်းက ကျားဖြန့်လုပ်ငန်းတွေမှာ လူမှောင်ခိုကူးခံထားရာကနေ ထိုင်း- မြန်မာ တာဝန်ရှိသူတွေ ပူးပေါင်းရှာဖွေ ကယ်တင်နိုင်ခဲ့ပါတယ်။
တရုတ်ကျားဖြန့် လုပ်ငန်းများစွာကို အကာအကွယ်ပေးထားတဲ့ ကရင်နယ်ခြားစောင့်တပ် BGF နဲ့ DKBA တို့ဟာ သူတို့ပိုင်နက်ထဲ လူကုန်မကူးရ၊ အသက်မပြည့်သူတွေကို မခိုင်းစေရ၊ အနိုင်ကျင့်နှိပ်စက်ခြင်းမပြုရ၊ လစာမပေးဘဲ အဓ္ဓမ ခိုင်းစေမှုမလုပ်ရ၊ ကျူးလွန်ရင် ဆက်လက် အလုပ်လုပ်ကိုင်ခွင့် ပိတ်သိမ်းမယ်လို့ ကြေညာခဲ့ပါတယ်။
ဒါပေမဲ့ ၂၀၂၄ ဒီဇင်ဘာ ၂၁ ရက်နေ့က ပေကျင်းကနေ သု၀ဏ္ဏဘူမိလေဆိပ်ကို ရောက်ရှိလာခဲ့ပြီး ဒီဇင်ဘာ ၂၉ ရက်နေ့မှာ မိသားစုနဲ့ လုံး၀အဆက်အသွယ်ပြတ်သွားတဲ့ တရုတ်အမျိုးသားမော်ဒယ် ဇီကျီးကို ဖခင်ဖြစ်သူက ထိုင်းတော်ဝင်ရဲတပ်ဖွဲ့ထံ အကူအညီ တောင်းခံထားမှုဟာ ခုထိ ရှာမတွေ့သေးကြောင်း သိရှိရပါတယ်။
ဒီဇင်ဘာ ၂၉ ရက်က မိခင်နဲ့ WeChat ကနေ ဗီဒီယိုကောခေါ်ရာမှာ မျက်နှာဖူးယောင်ဒဏ်ရာတွေရှိတာ မြင်တွေ့ခဲ့ရပြီးနောက် အဆက်အသွယ်ပြတ်သွားခဲ့လို့ ဖခင်ဖြစ်သူဟာ ထိုင်းကိုလိုက်လာပြီး သားဖြစ်သူကို ရှာဖွေ ကယ်ထုတ်ဖို့ တောင်းဆိုနေခဲ့တာဖြစ်ပါတယ်။
ဇီကျီးကို တာ့ခ်ခရိုင်၊ မဲဆောက်မြို့ ဖုပ်ဖရမှာ နောက်ဆုံးတွေ့ခဲ့ပြီး မြန်မာဘက် ကူးသွားလားဆိုတာလည်း နောက်ကြောင်း လိုက်မရသေးဘဲ ရှိနေတယ်လို့ ထိုင်းတော်ဝင်ရဲတပ်ဖွဲ့က ရှင်းချက် ထုတ်ပြန်ခဲ့ပါတယ်။
Ref:Khaosod
MKF-001
#MeKongNews
