မဲခေါင်၊ သြဂုတ် ၂၉
ထိုင်းနိုင်ငံသမိုင်းမှာ ဖွေထိုင်းပါတီက တင်မြောက်တဲ့ ဝန်ကြီးချုပ် ၂ ဆက်ကို စစ်အာဏာသိမ်းပြီး ဖြုတ်ချခဲ့တဲ့ စစ်တပ်နဲ့ တော်ဝင်ဘုရင်ထောက်ခံ ကာချုပ်ဟောင်း ပရာဝစ် ဦးဆောင်တဲ့ ပါလန်းပရာချာရတ် ပါတီကို မဟာမိတ် ပါတီ ၁၁ ပါတီထဲက ထုတ်ပယ်လိုက်ပြီး အစိုးရသစ်ဖွဲ့စည်းမှုမှာ ထည့်သွင်းတော့မှာမဟုတ်ကြောင်း အာဏာရ ဖွေထိုင်းပါတီက ဩဂုတ် ၂၇ ရက်နေ့မှာ တရားဝင် ထုတ်ပြန်ကြေညာခဲ့ပါတယ်။
ထိုင်းစစ်တပ်နဲ့ ရာဇဝင်နဲ့ချီပြီး ပြင်းထန်တဲ့အတိုက်အခံဖြစ်ခဲ့တဲ့ သက်ဆင်ရဲ့ ဖွေထိုင်းပါတီဟာ မဲအနိုင်ရလို့ ဝန်ကြီးချုပ်တာဝန်ယူစဉ်မှာလည်း ပရာဝစ်ဟာ စစ်အာဏာသိမ်းဖို့ ဦးဆောင်ပါဝင်ခဲ့သူဖြစ်သလို သက်ဆင်ရဲ့ညီမ ယင်းလတ် ဝန်ကြီးချုပ်ဖြစ်စဉ်မှာလည်း စစ်အာဏာထပ်သိမ်းခဲ့ရာမှာ ဦးဆောင်ခဲ့သူဖြစ်ပါတယ်။
မနှစ်က ရွေးကောက်ပွဲအပြီး MFP ပါတီအနိုင်ရမှုကို အသိအမှတ်မပြုဘဲ စစ်တပ်နဲ့ တော်ဝင်ဘုရင်ထောက်ခံ ကွန်ဆာဗေးတစ်တွေက ဝိုင်းတိုက်ခိုက် ကန့်ကွက်ပြီးနောက် ဖွေထိုင်းပါတီသာ ဒုတိယမဲအများဆုံးအနိုင်ရပါတီအဖြစ် အစိုးရဖွဲ့ခွင့်ရရေး ကြိုးပမ်းမှုအစမှာ စစ်တပ်ထောက်ခံပါတီတွေနဲ့ မပူးပေါင်းဘူးပြောခဲ့ပေမယ့် အမတ်နေရာ ၄၀ အနိုင်ရထားတဲ့ ပရာဝစ်ပါတီကို မဟာမိတ်ပါတီ ၁၁ ခုထဲ အံ့အားသင့်ဖွယ်ရာ ထည့်သွင်းခဲ့တာဖြစ်ပါတယ်။
အခုဖွေထိုင်းပါတီ အထွေထွေအတွင်းရေးမှူးက ပါတီတွင်းတာဝန်ရှိသူတွေ တွေ့ဆုံဆွေးနွေးပြီးနောက် သက်ဆင်ရဲ့သမီး ပေထောင်တန်ကို ထိုင်းရဲ့ အသက်အငယ်ဆုံး ဝန်ကြီးချုပ်အဖြစ် လွှတ်တော်မှာ မဲပေးရာမှာ ပရာဝစ်ဟာ မဲပေးဖို့ ပျက်ကွက်ခဲ့လို့ မဟာမိတ်အဖြစ်ကနေ ရပ်ဆိုင်းပြီး ထုတ်ပယ်ကာ စက်တင်ဘာလလယ် အစိုးရသစ် ရွေးချယ်တင်မြှောက်မှုမှာလည်း ပါလန်းပရာချာရတ်ပါတီ ပါဝင်တော့မှာမဟုတ်ဘူးလို့ အတည်ပြု ထုတ်ပြန်သွားပါတယ်။
ဒီအခြေအနေအရ နိုင်ငံရေးဩဇာကြီးတဲ့ ဖွေထိုင်းနဲ့ ထိုင်းစစ်တပ်ထောက်ခံပါတီတွေအကြား သဘောထားကွဲလွဲနေမှုကို မီးမောင်းထိုးပြလိုက်တာဖြစ်ပြီး ပါလန်းပရာချာရတ်ပါတီ ပြောရေးဆိုခွင့်ရှိသူက သူတို့ပါတီ လွှတ်တော်အမတ်အားလုံး ပေထောင်တန်ကို မဲပေးခဲ့ပြီး ပရာဝစ်တစ်ယောက်သာ မဲမပေးခြင်းမှာ သဘောတူထားတဲ့ ကတိကဝတ်တွေကို ဖွေထိုင်းပါတီက ချိုးဖောက်လိုက်တာဖြစ်တယ်လို့ တုံ့ပြန် ဖြေရှင်းသွားပါတယ်။
ဖွေထိုင်းပါတီကတော့ အစိုးရသစ်ဖွဲ့မှုမှာ ပါလန်းပရာချာရတ်ပါတီ အမတ်နေရာတွေ လျော့သွားပေမယ့် လွှတ်တော်အမတ် ၅၀၀ ထဲမှာ ၃၀၀ ကျော်ကို ကျန်မဟာမိတ်ပါတီဝင်တွေနဲ့ ဆက်လက် ရယူထားနိုင်တယ်လို့ ထုတ်ပြန်ခဲ့ပါတယ်။
Ref: asahi
MKF-001
