မဲခေါင်၊ ဇူလိုင် ၁၉
ပတ္တယားတောင်ပိုင်းက Soi Day-Night အဆောက်အအုံက စားသောက်ဆိုင်ပိုင်ရှင် အီရန်သားနဲ့ ဇနီး ထိုင်း အမျိုးသမီးတို့ အခန်းထဲမှာ အသတ်ခံရကြောင်း ရဲတပ်ဖွဲ့က ဇူလိုင် ၁၆ ရက်နေ့မှာ တွေ့ရှိခဲ့ရပြီးနောက် ဒီဆိုင်မှာ အလုပ်လုပ်ရင်း ထွက်ပြေးသွားတဲ့ မြန်မာနိုင်ငံသားစုံတွဲကို သံသယတရားခံအဖြစ် သတ်မှတ်တာကြောင့် မြန်မာ ဘက်က ပြန်လည်ဖမ်းဆီးပေးပို့ဖို့ ချွန်ဘူရီခရိုင် ရဲမှူးချုပ် သာဝပ်ခီယတ်က ထုတ်ပြန်ပြောဆိုသွားပါတယ်။
မြေညီထပ်မှာ စားသောက်ဆိုင်ခန်းဖွင့်ထားပြီး ဒုတိယထပ်မှာ အတူနေထိုင်တဲ့ ဆိုင်ရှင် မိုတဘာဂမ်ဘာရီယာဇက်(၆၄ နှစ်) နဲ့ ဇနီး သာနာပွန် (၄၉ နှစ်)တို့ကို ပထမထပ် အိပ်ခန်းထဲမှာ သေဆုံးလျှက် တွေ့ရှိရတာဖြစ်ပြီး ဂမ်ဘာရီယာဇက်ဟာ အောက်ပိုင်းဗလာဖြစ်နေသလို ဘောင်းဘီနဲ့ လည်ပင်းညှစ်သတ် ခံထားရတာဖြစ်ပြီး ဇနီး သာနာပွန်ကိုတော့ အဝတ်ဗလာနဲ့ ပလပ်စတစ်၊ ဝါယာကြိုးတွေနဲ့ တုပ်လျှက် သေဆုံးနေရာမှာ အခန်းထဲ ထုသတ်ခဲ့ပုံရတဲ့ တူတစ်ချောင်းလည်း တွေ့ရှိခဲ့ရတဲ့အတွက် ရဲတပ်ဖွဲ့က ဆိုင်လုပ်သား ကျော်မြင့်ဦး(၂၃ နှစ်) နဲ့ အိဒီဇင်ဘာ(၁၉ နှစ်) တို့ကို လူသတ်တရားခံအဖြစ် ယူဆပြီး ဇူလိုင် ၁၈ ရက်နေ့မှာ ဖမ်း၀ရမ်းထုတ်ခဲ့တာ ဖြစ်ပါတယ်။
ဒီလူသတ်မှုဖြစ်စဉ်ဟာ ရက်အတော်ကြာခဲ့ပုံရပြီး မြန်မာစုံတွဲဟာ ဇူလိုင် ၁၁ ရက်နေ့က ဆိုင်ရှင်ရဲ့ မော်တော်ဆိုင် ကယ်ကိုစီးလို့ ဆိုင်ကထွက်သွားပြီးနောက် ဆိုင်ကယ်ကို စွန့်ပစ်ခဲ့ကာ တက္ကဆီနဲ့ ဘန်ကောက်ကိုသွား၊ အဲ့ကတဆင့် နာခွန်းပသွန် ခရိုင်ရဲစခန်းမှာ တရားမဝင် ရွှေ့ပြောင်းလုပ်သားအဖြစ် နေထိုင်ခဲ့မှုနဲ့ အဖမ်းခံခဲ့တာဖြစ်ပါ တယ်။
ဒီလို အဖမ်းခံစဉ်မှာ သူတို့ဟာ တာ့ခ်ခရိုင် (မဲဆောက်)ကို နယ်စပ်ဖြတ်ကျော် Border Pass နဲ့ ဝင်လာခဲ့ပြီး ပတ္တယားကို ရောက်တာဖြစ်ကာ သတ်မှတ်ခွင့်ပြုရက် ကျော်ပြီးနေမှုနဲ့ နေထိုင်ကြောင်းဝန်ခံလို့ မြန်မာဘက် ပြန်ပို့ ပေးဖို့ တောင်းဆိုခဲ့ပါတယ်။
အမှုဖြစ်ပွားခြင်းကို မသိရသေးတဲ့အချိန်မို့ ထိုင်းအာဏာပိုင်တွေက တာ့ခ်ခရိုင်ကနေပဲ မြန်မာဘက် ပြန်လွှတ်ပေးခဲ့တာဖြစ်ပြီး ခုမှ ဆိုင်ရှင်သေဆုံးမှုမှာ တရားခံအဖြစ် သံသယရှိလို့ ဖမ်း၀ရမ်းထုတ်ပြီး မြန်မာဘက်က ဖမ်းဆီးပြန်ပို့ဖို့ တောင်းဆိုသွားတာဖြစ်ပါတယ်။
သေဆုံးသူထိုင်းအမျိုးသမီးရဲ့ ၂၉ နှစ်အရွယ် သမီးဖြစ်သူက ဆိုင်ရှင် အီရန်သားဟာ ဆိုင်မှာ ပိုက်ဆံ ပျောက်မှု ကြောင့် မကြာခဏ မြန်မာစုံတွဲကို ဆူပူမာန်မဲမှုတွေရှိခဲ့လို့ အငြှိုးနဲ့ သတ်ဖြတ်သွားပုံရကြောင်းနဲ့ အဖိုးတန် ပစ္စည်းတွေလည်း ယူဆောင်သွားပုံရတယ်လို့ စွပ်စွဲထားပါတယ်။
Ref: bangkokpost
MKF-001
