မဲခေါင်၊ ဇူလိုင် ၁၇
ထိုင်းနိုင်ငံဆိုင်ရာအေဂျင်စီများ ပူးပေါင်းဆောင်ရွက်ရေးကော်မတီ အစည်းအဝေးကို ဇူလိုင် ၁၅ ရက်နေ့က ကျင်းပ ပြုလုပ်အပြီး အစိုးရက ၂၀၂၄ နဲ့ ၂၀၂၅ နိုင်ငံတော်ဘတ်ဂျက်ထဲကနေ ရနိုင်မယ့် ထိုင်းပြည်သူ သန်း ၅၀ အတွက် တစ်ယောက် ဘတ် ၁၀၀၀၀ နှုန်းနဲ့ ဘတ် ဘီလီယံ ၅၀၀ ကို ထုတ်ပေးသွားမယ်လို့ ထိုင်းဘဏ္ဍာရေးဝန်ကြီးက အတည်ပြု ထုတ်ပြန်သွားခဲ့ပါတယ်။
ဒီအစီအစဉ်အစဟာ ပြီးခဲ့တဲ့နှစ်က ထိုင်းရွေးကောက်ပွဲမှာ ဖွေထိုင်းပါတီ မဲဆွယ်စည်းရုံးပြီး တင်သွင်းခဲ့တဲ့ အဆိုဖြစ်ပေမယ့် နိုင်ငံဗဟိုဘဏ် အကြီးအကဲတွေက ဘဏ္ဍာရေးတာဝန်မဲ့မှုဖြစ်လို့ အရင်အစိုးရက ငြင်းပယ်ခြင်းခံခဲ့ရပါတယ်။
ဒါပေမယ့် အခု ဖွေထိုင်းပါတီက အာဏာရလာပြီး ဝန်ကြီးချုပ် ဆရတ်သာကိုလည်း သူတို့ပါတီကပဲ တင်မြှောက်လို့ အစိုးရသစ်ဖွဲ့ခဲ့ပြီးနောက် ကတိအတိုင်း ဒစ်ဂျစ်တယ်ပိုက်ဆံအိတ်ခေါ် ဒစ်ဂျစ်တယ်ငွေကြေး ပလက်ဖောင်းကနေ ရပိုင်ခွင့်ရှိတဲ့ပြည်သူ သန်း ၅၀ ကို ထုတ်ပေးသွားဖို့ အတည်ပြုလိုက်တာဖြစ်ပါတယ်။
ဒစ်ဂျစ်တယ်ငွေကြေး ထုတ်ပေးမှုဟာ ငွေသားပေးတာမဟုတ်ဘဲ ဖုန်းထဲက ဒစ်ဂျစ်တယ်ငွေ Application မှာ ဘတ် ၁၀၀၀၀ ထုတ်ပေးသွားမှာဖြစ်ပြီး ဒီငွေသားကို သတ်မှတ်ထားတဲ့ ကိုယ်နေထိုင်ရာ ဒေသအတွင်းက စတိုးဆိုင်နဲ့ ကုန်တိုက်တွေမှာသာ လိုအပ်တဲ့ပစ္စည်းတွေကို ၆ လအတွင်း ဝယ်ဖို့ ပေးဆောင်သွားမှာဖြစ်ပါတယ်။
ထိုင်းဝန်ကြီးချုပ် ဆရတ်သာက ဩဂုတ် ၁ ရက်နေ့မှာ ပူးပေါင်းပါဝင်မှတ်ပုံတင်မယ့် စတိုး၊ ကုန်တိုက်နဲ့ စျေးဝယ် စင်တာတွေကို ဖိတ်ခေါ် မှတ်ပုံတင်မှု စတင်မှာဖြစ်တယ်လို့လည်း ဇူလိုင် ၁၅ ရက်မှာ ထုတ်ပြန်သွားပါတယ်။
ထိုင်း ဗဟိုဘဏ်အပါအဝင် အစိုးရအဖွဲ့အစည်းအဝေးမှာ ငွေကြေးကို အစိုးရဘဏ်တွေက ထုတ်ပေးသွားဖို့ အစီအစဉ် မဟုတ်ဘဲ ၂၀၂၄ စတုတ္ထသုံးလပတ်ဘတ်ဂျက်ရယ် ၂၀၂၅ ခုနှစ်အတွင်း အစိုးရအသုံးစားရိတ် ဘတ်ဂျက်ထဲကနေ ပေးသွားဖို့ ဆုံးဖြတ်ခဲ့တယ်လို့လည်း အတည်ပြု ထုတ်ပြန်သွားပါတယ်။
ဒါကြောင့် ထိုင်းပြည်သူ သန်း ၅၀ အတွက် စုစုပေါင်း ထုတ်ပေးသွားမယ့် ငွေပမာဏဟာ ဘတ် ၅၀၀ ဘီလီယံ (အမေရိကန်ဒေါ်လာ ၁၃.၈ ဘီလီယံ) ရှိပြီး အစိုးရဘတ်ဂျက်ထဲကနေ ပေးဖို့ လောက်ငှတဲ့ ငွေဖြစ်လို့ ၂၀၂၄ နှစ် ကုန်ပိုင်းမှာ စတင်ပေးသွားနိုင်ဖို့ မျှော်လင့်ထားကြောင်း ထိုင်းဘဏ္ဍာရေးဒုဝန်ကြီး ဂျူလာပန်က မီဒီယာတွေနဲ့ တွေ့ဆုံပြောကြား သွားခဲ့ပါတယ်။
Ref: vnexpress
MKF-001
