မဲခေါင်၊ ဇွန် ၂၀
ထိုင်းနိုင်ငံ၊ ချင်းမိုင်ခရိုင်၊ မဲ့တင်ကစ်ချန့်နယ်က မယ်တမန်းရွာမှာ ဇွန် ၁၈ ရက်က ပိုင်ရှင်ရှိခွေး တစ်ကောင်ကို သေနတ်နဲ့ပစ်သတ်ပြီး ငါးစာကျွေးတဲ့ မြန်မာနိုင်ငံသား ၁ ဦးကို တိရိစ္ဆာန်ညှင်းပန်းနှိပ်စက်မှုနဲ့ ရဲက ဖမ်းဆီးခဲ့တယ်လို့ ထိုင်းသတင်းကိုအခြေပြုပြီး RCSS အာဘော် Tai Freedomက ဖော်ပြလာပါတယ်။
မယ်တမန်းရွာမှာနေတဲ့ စိုင်းအောင်ထွန်း ၃၄ နှစ်ကို ပိုင်ရှင်ရှိခွေးကို သေနတ်နဲ့ပစ်သတ်မှုနဲ့ Watchdog Thailand Foundation နဲ့ရဲတပ်ဖွဲ့က ဖမ်းဆီးခဲ့တာလို့ သိရပါတယ်။
စိုင်းအောင်ထွန်းက သူပစ်သတ်လိုက်တဲ့ခွေးဟာ သူစောင့်တဲ့ခြံက ကြက်တွေကို အမြဲလိုက်ကိုက်သတ်နေလို့ ပိုင်ရှင်ကိုပြောတဲ့အခါ ခွေးပိုင်ရှင်ကိုယ်တိုင်က ခွေးက သတ်ပစ်မှရမှာလို့ပြောလို့ သေနတ်နဲ့ပစ်သတ်ခဲ့တာလို့ ပြောကြောင်းသိရပါတယ်။
သူဟာ ခွေးသေကို ခေါင်းဖြတ်၊ အရေခွံခွာပြီး ခြံထဲမြုပ်ခဲ့ပေမယ့် အသားတွေကိုတော့ ငါးကန်ထဲပစ်ချပြီးငါးစာကျွေးခဲ့တာလို့ ပြောပါတယ်။
ပိုင်ရှင်က သတ်ဖို့ပြောခဲ့ပေမယ့် ခွေးကိုသတ်ပြီးတဲ့နောက်မှာ သူ့ခွေးကိုသတ်ပြီး စိုင်းအောင်ထွန်းစားတယ်လို့စွပ်စွဲကာ သူကိုယ်တိုင်ရဲတိုင်ခဲ့တာဖြစ် တယ်လို့ သိရပါတယ်။
အတူနေ စိုင်းအောင်ထွန်းရဲ့ ညီမဖြစ်သူက ခွေးသားမစားဘဲ ငါးကျွေးတာသာဖြစ်တယ်လို့ ပြောတယ်လို့ သတင်းမှာ ပါရှိပါတယ်။
ထိုင်းရဲတွေက စိုင်းအောင်ထွန်းကို လာရောက်ဖမ်းပြီး သူ့အခန်းကို ရှာဖွေတာမှာ သေနတ် ၁ လက်ကို သိမ်းဆည်းရမိပြီး မြေမြုပ်ထားတဲ့ခွေးခေါင်းနဲ့ သားရေကို ပြန်ဖော်ခိုင်းတယ်လို့ သိရပါတယ်။
ထိုင်းနယ်ခံရဲတွေကတော့ စိုင်းအောင်ထွန်းကို ထိုင်းနိုင်ငံရဲ့ ဥပဒေအတိုင်း တိရိစ္ဆာန်ညှင်းပန်းနှိပ်စက်မှုအပြင် လက်နက်မှုနဲ့ပါ ဖမ်းဆီးအရေးယူထားတယ်လို့ သတင်းမှာ ဖော်ပြထားပါတယ်။
MK-012
