မဲခေါင်၊ ဧပြီ ၂၅
ပြည်ပခရီးသွားတွေ ပိုမိုလာရောက်လည်ပတ်ဖို့ရည်ရွယ်ပြီး ထိုင်းနိုင်ငံဟာ ဒူဘိုင်းက ကမ္ဘာ့အမြင့်ဆုံး Burj Khalifa မိုးမျှော်တိုက်ထက် ပိုမြင့်တဲ့ တိုက်ကြီးဆောက်လုပ်ဖို့ စတင်စီမံဆွေးနွေးနေပြီဖြစ်ပါတယ်။
Burj Khalifa မိုးမျှော်တိုက်ဟာ ၁၆၃ ထပ်မြင့်ပြီး အမြင့် ၈၃၀ မီတာရှိတာကြောင့် ကမ္ဘာ့အမြင့်ဆုံးတိုက်အဖြစ် ရပ်တည်နေပြီး ထိုင်းအစိုးရဟာ ဒီတိုက်ထက် ပိုမြင့်တဲ့ မိုးမျှော်တိုက်ကြီးကို ဘန်ကောက်မှာ တည်ဆောက်ဖို့ စတင် ဆွေးနွေးနေ ပြီဖြစ်ကြောင်း ထိုင်းဝန်ကြီးချုပ် ဆရတ်သာက တရုတ်နဲ့အရှေ့အလယ်ပိုင်း ထိပ်တန်းခေါင်းဆောင်တွေနဲ့ တွေ့ဆုံ ဆွေးနွေးခဲ့ကြောင်း X (ယခင်တွစ်တာ) ကနေ ထုတ်ပြန်သွားပါတယ်။
ဒီတိုက်ကြီးဆောက်လုပ်နိုင်ဖွယ်ရှိရေး Burj Khalifa တိုက်ကြီးဆောက်လုပ်ခဲ့တဲ့ ကုမ္ပဏီနဲ့ပဲ တည်ဆောက်ဖို့ စီမံ နေတာဖြစ်ပြီး ရင်းနှီးမြှုပ်နှံမှုအကျိုးစီးပွားနဲ့ ကမ္ဘာလှည့်ခရီးသွားတွေ ပိုမိုများပြားလာစေဖို့ ရည်ရွယ်ကြောင်း၊ နိုင်ငံစီးပွားရေးတိုးတက်ဖို့၊ ပြည်သူတွေ ဝင်ငွေတိုးပွားဖို့အရေးမှာ ပုဂ္ဂလိက ကဏ္ဍက အထူးအရေးပါကြောင်းနဲ့ ရင်းနှီးမြှုပ်နှံမှုတွေကို ဖိတ်ခေါ်ကမ်းလှမ်းမှာဖြစ်တယ်လို့ ဆရတ်သာက ပြောကြားသွားပါတယ်။
Burj Khalifa မိုးမျှော်တိုက် တည်ဆောက်မှုကုန်ကျစားရိတ်က ဒေါ်လာ ၁ . ၅ ဘီလီယံ ကုန်ကျခဲ့ပြီး အခု ထိုင်းက ဆောက်လုပ်ဖို့ လျာထားတဲ့ ကမ္ဘာ့အမြင့်ဆုံးတိုက် ကုန်ကျစရိတ်ကိုတော့ ထုတ်ပြန်ထားတာမရှိသေးပါဘူး။
လက်ရှိ စီမံကိန်းအစဖြစ်လို့ တိုက်နာမည်မပေးရသေးပေမယ့် ရုံးခန်း၊ ဖျော်ဖြေရေးခန်းမ၊ ဟိုတယ်၊ ကာစီနို၊ ဘဏ္ဍာတိုက်၊ ကြီးမားလှတဲ့ လူနေတိုက်ခန်းတွေနဲ့ စတိုးဆိုင်ကြီးတွေ ပါဝင်ဖွဲ့စည်းသွားဖို့ မျှော်မှန်းထားကြောင်း လည်းသိရှိရပါတယ်။
ထိုင်းအစိုးရ ပြောရေးဆိုခွင့်ရှိသူ ဝက်ချာရွန်ကီက ဝန်ကြီးချုပ်ကိုယ်တိုင်ဟာ ဒူဘိုင်းက တိုက်ထက်ပိုမြင့်တဲ့ ကမ္ဘာ့အမြင့်ဆုံးမိုးမျှော်တိုက် တည်ဆောက်ဖို့ စိန်ခေါ်မှုတွေကို ရင်ဆိုင်သွားမှာဖြစ်ကြောင်း ဒါပေမဲ့ တည်ဆောက်ဖို့ ဆွေးနွေးတဲ့အဆင့်ဟာ အစပိုင်းအဆင့်သာရှိသေးကြောင်း Bloomberg မှာ ပြောကြားသွားပါတယ်။
Ref: metro
MKF-001
