မဲခေါင်၊ မတ် ၁၀
ရန်ကုန်တိုင်း၊ ကမာရွတ်မြို့နယ်၊ အမှတ်(၃) ရပ်ကွက်၊ လှည်းတန်းဈေး အနောက်ပေါက်၊ လှည်းတန်း (၃) လမ်းထိပ်မှာ မတ် ၁၀ ရက်၊ ည ၁၂ နာရီခွဲကျော်က လူငယ် ၅ ဦးနောက်ကို အရပ်ဝတ် အမျိုးသား ၁၀ ဦးကျော် ပြေးလိုက်လာပြီး ဝိုင်းဝန်း ရိုက်နှက် ဖမ်းဆီးသွားတယ်လို့ ဒေသခံ တစ်ဦးက မဲခေါင်သတင်းကို ပြောပါတယ်။
အဖမ်းခံရတဲ့ လူငယ် ၅ ဦးဟာ လမ်းတန်းထိပ်မှ လှည်းတန်း (၂) လမ်းအတိုင်း ပြေးလာပြီးနောက် လှည်းတန်း (၃) လမ်းထိပ်မှာ လိုက်လာတဲ့ အမျိုးသားတွေက ဖမ်းမိသွားပြီး ရိုက်နှက်ဖမ်းဆီး ခံရတာဖြစ်ကာ ဘယ်က လူငယ်တွေ ဆိုတာတော့ မသိရသေးပါဘူး။
“ လှည်းတန်း ထိပ်ဘက်ကနေ ရပ်ကွက်ထဲ ဝင်ပြေးလာတာ ဖြစ်မယ်။ အရပ်ဝတ်တွေနဲ့ စကားပြောစက်တွေ ပါတယ်။ ပြီးတော့ လွယ်အိတ်ဝတ်ထားပြီး နောက်ကနေ လိုက်ဖမ်းတာ။ (၃) လမ်းထိပ်က တိုက်အောက်ဘက်မှာ မိပြီး ရိုက်နေတာ။ လူငယ်ပိုင်း အရွယ်လေးတွေကြီးပဲ။ အသက် ၂၀ ဝန်းကျင်လောက် ၅ ယောက်ကို ရိုက်ပြီး ကန်ပြီး လမ်းထိပ်ဘက်ကို ထွက်သွားတယ်” လို့ မျက်မြင်တွေ့သူ တစ်ဦးက ပြောပါတယ်။
အဆိုပါ လူငယ်များကို ရိုက်နှက် ဖမ်းဆီးနေစဉ် ဈေးလုံခြုံရေးက ဘာအတွက် ဖမ်းတာလဲလို့ မေးမြန်းစဉ် ရိုက်နှက် ဖမ်းဆီးသူ တစ်ဦးက “ မင်းတို့နဲ့ ဆိုင်လား။ မအေပေးတွေ အကုန်သေကုန်မယ်” လို့ ကြိမ်းဝါးခဲ့သေးတယ်လို့ သူကပြောပါတယ်။
ကမာရွတ်မြို့နယ်မှာ စစ်ကောင်စီတပ်က အမဲရောင် ဝတ်ဆင်တဲ့ လူငယ်တွေကို အဓိက ပစ်မှတ်ထား စစ်ဆေးပြီး မကြာခဏ ဖမ်းဆီးမှုတွေ ပြုလုပ်လေ့ရှိကာ နေ့စဉ် အရပ်ဝတ်နဲ့ စစ်ကောင်စီတပ်သားတွေ လူစည်ကားရာ နေရာများတွင် အသွင်ယူ စောင့်ကြည့်နေတယ်လို့ ဒေသခံတွေက ပြောပါတယ်။
MK-005